18 shlokas
- 1
ऋषय ऊचुः
अघोरेशस्य माहात्म्यं भवता कथितं पुरा
पूजां प्रतिष्ठां देवस्य भगवन्वक्तुमर्हसि
ṛṣaya ūcuḥ
aghoreśasya māhātmyaṃ bhavatā kathitaṃ purā
pūjāṃ pratiṣṭhāṃ devasya bhagavanvaktumarhasi
- 2
सूत उवाच
अघोरेणाङ्गयुक्तेन विधिवच्च विशेषतः
प्रतिष्ठालिङ्गविधिना नान्यथा मुनिपुङ्गवाः
sūta uvāca
aghoreṇāṅgayuktena vidhivacca viśeṣataḥ
pratiṣṭhāliṅgavidhinā nānyathā munipuṅgavāḥ
- 3
तथाग्निपूजां वै कुर्याद्यथा पूजा तथैव च
सहस्रं वा तदर्धं वा शतमष्टोत्तरं तु वा
tathāgnipūjāṃ vai kuryādyathā pūjā tathaiva ca
sahasraṃ vā tadardhaṃ vā śatamaṣṭottaraṃ tu vā
- 4
तिलैर्होमः प्रकर्तव्यो दधिमध्वाज्यसंयुतैः
घृतसक्तुमधूनां च सर्वदुःखप्रमार्जनम्
tilairhomaḥ prakartavyo dadhimadhvājyasaṃyutaiḥ
ghṛtasaktumadhūnāṃ ca sarvaduḥkhapramārjanam
- 5
व्याधीनां नाशनं चैव तिलहोमस्तु भूतिदः
सहस्रेण महाभूतिः शतेन व्याधिनाशनम्
vyādhīnāṃ nāśanaṃ caiva tilahomastu bhūtidaḥ
sahasreṇa mahābhūtiḥ śatena vyādhināśanam
- 6
सर्वदुःखविनिर्मुक्तो जपेन च न संशयः
अष्टोत्तरशतेनैव त्रिकाले च यथाविधि
sarvaduḥkhavinirmukto japena ca na saṃśayaḥ
aṣṭottaraśatenaiva trikāle ca yathāvidhi
- 7
अष्टोत्तरसहस्रेण षण्मासाज्जायते ध्रुवम्
सिद्धयो नैव संदेहो राज्यमण्डलिनाम् अपि
aṣṭottarasahasreṇa ṣaṇmāsājjāyate dhruvam
siddhayo naiva saṃdeho rājyamaṇḍalinām api
- 8
सहस्रेण ज्वरो याति क्षीरेण च जुहोति यम्
त्रिकालं मासमेकं तु सहस्रं जुहुयात्पयः
sahasreṇa jvaro yāti kṣīreṇa ca juhoti yam
trikālaṃ māsamekaṃ tu sahasraṃ juhuyātpayaḥ
- 9
मासेन सिध्यते तस्य महासौभाग्यमुत्तमम्
सिध्यते चाब्दहोमेन क्षौद्राज्यदधिसंयुतम्
māsena sidhyate tasya mahāsaubhāgyamuttamam
sidhyate cābdahomena kṣaudrājyadadhisaṃyutam
- 10
यवक्षीराज्यहोमेन जातितण्डुलकेन वा
प्रीयेत भगवानीशो ह्यघोरः परमेश्वरः
yavakṣīrājyahomena jātitaṇḍulakena vā
prīyeta bhagavānīśo hyaghoraḥ parameśvaraḥ
- 11
दध्ना पुष्टिर्नृपाणां च क्षीरहोमेन शान्तिकम्
षण्मासं तु घृतं हुत्वा सर्वव्याधिविनाशनम्
dadhnā puṣṭirnṛpāṇāṃ ca kṣīrahomena śāntikam
ṣaṇmāsaṃ tu ghṛtaṃ hutvā sarvavyādhivināśanam
- 12
राजयक्ष्मा तिलैर्होमान्नश्यते वत्सरेण तु
यवहोमेन चायुष्यं घृतेन च जयस्तदा
rājayakṣmā tilairhomānnaśyate vatsareṇa tu
yavahomena cāyuṣyaṃ ghṛtena ca jayastadā
- 13
सर्वकुष्ठक्षयार्थं च मधुनाक्तैश्च तण्डुलैः
जुहुयादयुतं नित्यं षण्मासान्नियतः सदा
sarvakuṣṭhakṣayārthaṃ ca madhunāktaiśca taṇḍulaiḥ
juhuyādayutaṃ nityaṃ ṣaṇmāsānniyataḥ sadā
- 14
आज्यं क्षीरं मधुश्चैव मधुरत्रयमुच्यते
समस्तं तुष्यते तस्य नाशयेद्वै भगन्दरम्
ājyaṃ kṣīraṃ madhuścaiva madhuratrayamucyate
samastaṃ tuṣyate tasya nāśayedvai bhagandaram
- 15
केवलं घृतहोमेन सर्वरोगक्षयः स्मृतः
सर्वव्याधिहरं ध्यानं स्थापनं विधिनार्चनम्
kevalaṃ ghṛtahomena sarvarogakṣayaḥ smṛtaḥ
sarvavyādhiharaṃ dhyānaṃ sthāpanaṃ vidhinārcanam
- 16
एवं संक्षेपतः प्रोक्तमघोरस्य महात्मनः
प्रतिष्ठा यजनं सर्वं नन्दिना कथितं पुरा
evaṃ saṃkṣepataḥ proktamaghorasya mahātmanaḥ
pratiṣṭhā yajanaṃ sarvaṃ nandinā kathitaṃ purā
- 17
ब्रह्मपुत्राय शिष्याय तेन व्यासाय सुव्रताः
brahmaputrāya śiṣyāya tena vyāsāya suvratāḥ
- 18
इति श्रीलिङ्गमहापुराणे उत्तरभागे एकोनपञ्चाशत्तमो ऽध्यायः
iti śrīliṅgamahāpurāṇe uttarabhāge ekonapañcāśattamo 'dhyāyaḥ

