14 shlokas
- 1
सनत्कुमार उवाच
तुला ते कथिता ह्येषा आद्या सामान्यरूपिणी
हिरण्यगर्भं वक्ष्यामि द्वितीयं सर्वसिद्धिदम्
sanatkumāra uvāca
tulā te kathitā hyeṣā ādyā sāmānyarūpiṇī
hiraṇyagarbhaṃ vakṣyāmi dvitīyaṃ sarvasiddhidam
- 2
अधः पात्रं सहस्रेण हिरण्येन विधीयते
ऊर्ध्वपात्रं तदर्धेन मुखं संवेशमात्रकम्
adhaḥ pātraṃ sahasreṇa hiraṇyena vidhīyate
ūrdhvapātraṃ tadardhena mukhaṃ saṃveśamātrakam
- 3
हैममेवं शुभं कुर्यात्सर्वालंकारसंयुतम्
अधः पात्रे स्मरेद्देवीं गुणत्रयसमन्विताम्
haimamevaṃ śubhaṃ kuryātsarvālaṃkārasaṃyutam
adhaḥ pātre smareddevīṃ guṇatrayasamanvitām
- 4
चतुर्विंशतिकां देवीं ब्रह्मविष्ण्वग्निरूपिणीम्
ऊर्ध्वपात्रे गुणातीतं षड्विंशकम् उमापतिम्
caturviṃśatikāṃ devīṃ brahmaviṣṇvagnirūpiṇīm
ūrdhvapātre guṇātītaṃ ṣaḍviṃśakam umāpatim
- 5
आत्मानं पुरुषं ध्यायेत्पञ्चविंशकम् अग्रजम्
पूर्वोक्तस्थानमध्ये ऽथ वेदिकोपरि मण्डले
ātmānaṃ puruṣaṃ dhyāyetpañcaviṃśakam agrajam
pūrvoktasthānamadhye 'tha vedikopari maṇḍale
- 6
शालिमध्ये क्षिपेन्नीत्वा नववस्त्रैश्च वेष्टयेत्
माषकल्केन चालिप्य पञ्चद्रव्येण पूजयेत्
śālimadhye kṣipennītvā navavastraiśca veṣṭayet
māṣakalkena cālipya pañcadravyeṇa pūjayet
- 7
ईशानाद्यैर्यथान्यायं पञ्चभिः परिपूजयेत्
पूर्ववच्छिवपूजा च होमश्चैव यथाक्रमम्
īśānādyairyathānyāyaṃ pañcabhiḥ paripūjayet
pūrvavacchivapūjā ca homaścaiva yathākramam
- 8
देवीं गायत्रिकां जप्त्वा प्रविशेत्प्राङ्मुखः स्वयम्
विधिनैव तु सम्पाद्य गर्भाधानादिकां क्रियाम्
devīṃ gāyatrikāṃ japtvā praviśetprāṅmukhaḥ svayam
vidhinaiva tu sampādya garbhādhānādikāṃ kriyām
- 9
कृत्वा षोडशमार्गेण विधिना ब्राह्मणोत्तमः
दूर्वाङ्कुरैस्तु कर्तव्या सेचना दक्षिणे पुटे
kṛtvā ṣoḍaśamārgeṇa vidhinā brāhmaṇottamaḥ
dūrvāṅkuraistu kartavyā secanā dakṣiṇe puṭe
- 10
औदुंबरफलैः सार्धम् एकविंशत्कुशोदकम्
ईशान्यां तावदेवात्र कुर्यात्सीमन्तकर्मणि
auduṃbaraphalaiḥ sārdham ekaviṃśatkuśodakam
īśānyāṃ tāvadevātra kuryātsīmantakarmaṇi
- 11
उद्वहेत्कन्यकां कृत्वा त्रिंशन्निष्केण शोभनाम्
अलंकृत्य तथा हुत्वा शिवाय विनिवेदयेत्
udvahetkanyakāṃ kṛtvā triṃśanniṣkeṇa śobhanām
alaṃkṛtya tathā hutvā śivāya vinivedayet
- 12
अन्नप्राशनके विद्वान्भोजयेत्पायसादिभिः
एवं विश्वजितान्ता वै गर्भाधानादिकाः क्रियाः
annaprāśanake vidvānbhojayetpāyasādibhiḥ
evaṃ viśvajitāntā vai garbhādhānādikāḥ kriyāḥ
- 13
शक्तिबीजेन कर्तव्या ब्राह्मणैर्वेदपारगैः
शेषं सर्वं च विधिवत्तुलाहेमवदाचरेत्
śaktibījena kartavyā brāhmaṇairvedapāragaiḥ
śeṣaṃ sarvaṃ ca vidhivattulāhemavadācaret
- 14
इति श्रीलिङ्गमहापुराणे उत्तरभागे एकोनत्रिंशो ऽध्यायः
iti śrīliṅgamahāpurāṇe uttarabhāge ekonatriṃśo 'dhyāyaḥ

