10 shlokas
- 1
सनत्कुमार उवाच
हिरण्याश्वप्रदानं च वदामि विजयावहम्
अश्वमेधात्पुनः श्रेष्ठं वदामि शृणु सुव्रत
sanatkumāra uvāca
hiraṇyāśvapradānaṃ ca vadāmi vijayāvaham
aśvamedhātpunaḥ śreṣṭhaṃ vadāmi śṛṇu suvrata
- 2
अष्टोत्तरसहस्रेण अष्टोत्तरशतेन वा
कृत्वाश्वं लक्षणैर्युक्तं सर्वालङ्कारसंयुतम्
aṣṭottarasahasreṇa aṣṭottaraśatena vā
kṛtvāśvaṃ lakṣaṇairyuktaṃ sarvālaṅkārasaṃyutam
- 3
पञ्चकल्याणसम्पन्नं दिव्याकारं तु कारयेत्
सर्वलक्षणसंयुक्तं सर्वाङ्गैश्च समन्वितम्
pañcakalyāṇasampannaṃ divyākāraṃ tu kārayet
sarvalakṣaṇasaṃyuktaṃ sarvāṅgaiśca samanvitam
- 4
सर्वायुधसमोपेतमिन्द्रवाहनमुत्तमम्
तन्मध्यदेशे संस्थाप्य तुरङ्गं स्वगुणान्वितम्
sarvāyudhasamopetamindravāhanamuttamam
tanmadhyadeśe saṃsthāpya turaṅgaṃ svaguṇānvitam
- 5
उच्चैःश्रवसकं मत्वा भक्त्या चैव समर्चयेत्
तस्य पूर्वदिशाभागे ब्राह्मणं वेदपारगम्
uccaiḥśravasakaṃ matvā bhaktyā caiva samarcayet
tasya pūrvadiśābhāge brāhmaṇaṃ vedapāragam
- 6
सुरेन्द्रबुद्ध्या सम्पूज्य पञ्चनिष्कं प्रदापयेत्
स चाश्वः शिवभक्ताय दातव्यो विधिनैव तु
surendrabuddhyā sampūjya pañcaniṣkaṃ pradāpayet
sa cāśvaḥ śivabhaktāya dātavyo vidhinaiva tu
- 7
सुवर्णाश्वं प्रदत्त्वा तु आचार्यमपि पूजयेत्
यथाविभवविस्तारं पञ्चनिष्कम् अथापि वा
suvarṇāśvaṃ pradattvā tu ācāryamapi pūjayet
yathāvibhavavistāraṃ pañcaniṣkam athāpi vā
- 8
दीनान्धकृपणानाथबालवृद्धकृशातुरान्
तोषयेदन्नदानेन ब्राह्मणांश्च विशेषतः
dīnāndhakṛpaṇānāthabālavṛddhakṛśāturān
toṣayedannadānena brāhmaṇāṃśca viśeṣataḥ
- 9
एतद्यः कुरुते भक्त्या दानमश्वस्य मानवः
ऐन्द्रान्भोगांश्चिरं भुक्त्वा रुचिरैश्वर्यवान्भवेत्
etadyaḥ kurute bhaktyā dānamaśvasya mānavaḥ
aindrānbhogāṃściraṃ bhuktvā ruciraiśvaryavānbhavet
- 10
इति श्रीलिङ्गमहापुराणे उत्तरभागे हिरण्याश्वदानं नामैकोनचत्वारिंशो ऽध्यायः
iti śrīliṅgamahāpurāṇe uttarabhāge hiraṇyāśvadānaṃ nāmaikonacatvāriṃśo 'dhyāyaḥ

