32 shlokas
- 1
शैलादिरुवाच
अथ ते सम्प्रवक्ष्यामि शिवार्चनमनुत्तमम्
त्रिसंध्यम् अर्चयेद् ईशम् अग्निकार्यं च शक्तितः
śailādiruvāca
atha te sampravakṣyāmi śivārcanamanuttamam
trisaṃdhyam arcayed īśam agnikāryaṃ ca śaktitaḥ
- 2
शिवस्नानं पुरा कृत्वा तत्त्वशुद्धिं च पूर्ववत्
पुष्पहस्तः प्रविश्याथ पूजास्थानं समाहितः
śivasnānaṃ purā kṛtvā tattvaśuddhiṃ ca pūrvavat
puṣpahastaḥ praviśyātha pūjāsthānaṃ samāhitaḥ
- 3
प्राणायामत्रयं कृत्वा दाहनाप्लावनानि च
गन्धादिवासितकरो महामुद्रां प्रविन्यसेत्
prāṇāyāmatrayaṃ kṛtvā dāhanāplāvanāni ca
gandhādivāsitakaro mahāmudrāṃ pravinyaset
- 4
विज्ञानेन तनुं कृत्वा ब्रह्माग्नेरपि यत्नतः
अव्यक्तबुद्ध्यहङ्कारतन्मात्रासंभवां तनुम्
vijñānena tanuṃ kṛtvā brahmāgnerapi yatnataḥ
avyaktabuddhyahaṅkāratanmātrāsaṃbhavāṃ tanum
- 5
शिवामृतेन संपूतं शिवस्य च यथातथम्
अधोनिष्ट्या वितस्त्यां तु नाभ्यामुपरि तिष्ठति
śivāmṛtena saṃpūtaṃ śivasya ca yathātatham
adhoniṣṭyā vitastyāṃ tu nābhyāmupari tiṣṭhati
- 6
हृदयं तद्विजानीयाद्विश्वस्यायतनं महत्
हृत्पद्मकर्णिकायां तु देवं साक्षात्सदाशिवम्
hṛdayaṃ tadvijānīyādviśvasyāyatanaṃ mahat
hṛtpadmakarṇikāyāṃ tu devaṃ sākṣātsadāśivam
- 7
पञ्चवक्त्रं दशभुजं सर्वाभरणभूषितम्
प्रतिवक्त्रं त्रिनेत्रं च शशाङ्ककृतशेखरम्
pañcavaktraṃ daśabhujaṃ sarvābharaṇabhūṣitam
prativaktraṃ trinetraṃ ca śaśāṅkakṛtaśekharam
- 8
बद्धपद्मासनासीनं शुद्धस्फटिकसन्निभम्
ऊर्ध्वं वक्त्रं सितं ध्यायेत्पूर्वं कुङ्कुमसन्निभम्
baddhapadmāsanāsīnaṃ śuddhasphaṭikasannibham
ūrdhvaṃ vaktraṃ sitaṃ dhyāyetpūrvaṃ kuṅkumasannibham
- 9
नीलाभं दक्षिणं वक्त्रमतिरक्तं तथोत्तरम्
गोक्षीरधवलं दिव्यं पश्चिमं परमेष्ठिनः
nīlābhaṃ dakṣiṇaṃ vaktramatiraktaṃ tathottaram
gokṣīradhavalaṃ divyaṃ paścimaṃ parameṣṭhinaḥ
- 10
शूलं परशुखड्गं च वज्रं शक्तिं च दक्षिणे
वामे पाशाङ्कुशं घण्टां नागं नाराचमुत्तमम्
śūlaṃ paraśukhaḍgaṃ ca vajraṃ śaktiṃ ca dakṣiṇe
vāme pāśāṅkuśaṃ ghaṇṭāṃ nāgaṃ nārācamuttamam
- 11
वरदाभयहस्तं वा शेषं पूर्ववदेव तु
सर्वाभरणसंयुक्तं चित्रांबरधरं शिवम्
varadābhayahastaṃ vā śeṣaṃ pūrvavadeva tu
sarvābharaṇasaṃyuktaṃ citrāṃbaradharaṃ śivam
- 12
ब्रह्माङ्गविग्रहं देवं सर्वदेवोत्तमोत्तमम्
पूजयेत्सर्वभावेन ब्रह्माङ्गैर्ब्रह्मणः पतिम्
brahmāṅgavigrahaṃ devaṃ sarvadevottamottamam
pūjayetsarvabhāvena brahmāṅgairbrahmaṇaḥ patim
- 13
उक्तानि पञ्च ब्रह्माणि शिवाङ्गानि शृणुष्व मे
शक्तिभूतानि च तथा हृदयादीनि सुव्रत
uktāni pañca brahmāṇi śivāṅgāni śṛṇuṣva me
śaktibhūtāni ca tathā hṛdayādīni suvrata
- 14
ॐ ईशानः सर्वविद्यानां हृदयाय शक्तिबीजाय नमः
ॐ ईश्वरः सर्वभूतानाममृताय शिरसे नमः
oṃ īśānaḥ sarvavidyānāṃ hṛdayāya śaktibījāya namaḥ
oṃ īśvaraḥ sarvabhūtānāmamṛtāya śirase namaḥ
- 15
ॐ ब्रह्माधिपतये कालाग्निरूपाय शिखायै नमः
ॐ ब्रह्मणोऽधिपतये कालचण्डमारुताय कवचाय नमः
oṃ brahmādhipataye kālāgnirūpāya śikhāyai namaḥ
oṃ brahmaṇo'dhipataye kālacaṇḍamārutāya kavacāya namaḥ
- 16
ॐ ब्रह्मणे बृंहणाय ज्ञानमूर्तये नेत्राय नमः
ॐ शिवाय सदाशिवाय पाशुपतास्त्राय अप्रतिहताय फट्फट्
oṃ brahmaṇe bṛṃhaṇāya jñānamūrtaye netrāya namaḥ
oṃ śivāya sadāśivāya pāśupatāstrāya apratihatāya phaṭphaṭ
- 17
ॐ सद्योजाताय भवेनानिभवे भवस्य मां भवोद्भवाय शिवमूर्तये नमः
ॐ हंसशिखाय विद्यादेहाय आत्मस्वरूपाय परापराय शिवाय शिवतमाय नमः
oṃ sadyojātāya bhavenānibhave bhavasya māṃ bhavodbhavāya śivamūrtaye namaḥ
oṃ haṃsaśikhāya vidyādehāya ātmasvarūpāya parāparāya śivāya śivatamāya namaḥ
- 18
कथितानि शिवाङ्गानि मूर्तिविद्या च तस्य वै
ब्रह्माङ्गमूर्ति विद्याङ्गसहितां शिवशासने
kathitāni śivāṅgāni mūrtividyā ca tasya vai
brahmāṅgamūrti vidyāṅgasahitāṃ śivaśāsane
- 19
सौराणि च प्रवक्ष्यामि बाष्कलाद्यानि सुव्रत
अङ्गानि सर्ववेदेषु सारभूतानि सुव्रत
saurāṇi ca pravakṣyāmi bāṣkalādyāni suvrata
aṅgāni sarvavedeṣu sārabhūtāni suvrata
- 20
ॐभूः ॐभुवः ॐ स्वः ॐमहः ॐ जनः ॐ तपः ॐसत्यम् ॐऋतम् ॐ ब्रह्मा नवाक्षरमयं मन्त्रं बाष्कलं परिकीर्तितम्
न क्षरतीति लोके ऽस्मिंस्ततो ह्यक्षरमुच्यते
सत्यम् अक्षरम् इत्य् उक्तं प्रणवादिनमोऽन्तकम्
oṃbhūḥ oṃbhuvaḥ oṃ svaḥ oṃmahaḥ oṃ janaḥ oṃ tapaḥ oṃsatyam oṃṛtam oṃ brahmā navākṣaramayaṃ mantraṃ bāṣkalaṃ parikīrtitam
na kṣaratīti loke 'smiṃstato hyakṣaramucyate
satyam akṣaram ity uktaṃ praṇavādinamo'ntakam
- 21
ॐ भूर्भुवः स्वः तत्सवितुर्वरेण्यं भर्गो देवस्य धीमहि
धियो यो नः प्रचोदयात्
नमः सूर्याय खखोल्काय नमः
oṃ bhūrbhuvaḥ svaḥ tatsaviturvareṇyaṃ bhargo devasya dhīmahi
dhiyo yo naḥ pracodayāt
namaḥ sūryāya khakholkāya namaḥ
- 22
मूलमन्त्रमिति प्रोक्तं भास्करस्य महात्मनः
नवाक्षरेण दीप्ताद्यमूलमन्त्रेण भास्करम्
mūlamantramiti proktaṃ bhāskarasya mahātmanaḥ
navākṣareṇa dīptādyamūlamantreṇa bhāskaram
- 23
पूजयेदङ्गमन्त्राणि कथयामि समासतः
वेदादिभिः प्रभूताद्यं प्रणवेन तु मध्यमम्
pūjayedaṅgamantrāṇi kathayāmi samāsataḥ
vedādibhiḥ prabhūtādyaṃ praṇavena tu madhyamam
- 24
ॐभूः ब्रह्मणे हृदयाय नमः
ॐभुवः विष्णवे शिरसे नमः
ॐस्वः रुद्राय शिखायै नमः ॐभूर्भुवः स्वः ज्वालामालिन्यै देवाय नमः ॐमहः महेश्वराय कवचाय नमः
ॐ जनः शिवाय नेत्रेभ्यो नमः
ॐ तपस्तापनाय अस्त्राय नमः
एवं प्रसंगादेवेह सौराणि कथितानि ह
शैवानि च समासेन न्यासयोगेन सुव्रत
oṃbhūḥ brahmaṇe hṛdayāya namaḥ
oṃbhuvaḥ viṣṇave śirase namaḥ
oṃsvaḥ rudrāya śikhāyai namaḥ oṃbhūrbhuvaḥ svaḥ jvālāmālinyai devāya namaḥ oṃmahaḥ maheśvarāya kavacāya namaḥ
oṃ janaḥ śivāya netrebhyo namaḥ
oṃ tapastāpanāya astrāya namaḥ
evaṃ prasaṃgādeveha saurāṇi kathitāni ha
śaivāni ca samāsena nyāsayogena suvrata
- 25
इत्थं मन्त्रमयं देवं पूजयेद्धृदयांबुजे
नाभौ होमं तु कर्तव्यं जनयित्वा यथाक्रमम्
itthaṃ mantramayaṃ devaṃ pūjayeddhṛdayāṃbuje
nābhau homaṃ tu kartavyaṃ janayitvā yathākramam
- 26
मनसा सर्वकार्याणि शिवाग्नौ देवमीश्वरम्
पञ्चब्रह्माङ्गसम्भूतं शिवमूर्तिं सदाशिवम्
manasā sarvakāryāṇi śivāgnau devamīśvaram
pañcabrahmāṅgasambhūtaṃ śivamūrtiṃ sadāśivam
- 27
रक्तपद्मासनासीनं शकलीकृत्य यत्नतः
मूलेन मूर्तिमन्त्रेण ब्रह्माङ्गाद्यैस्तु सुव्रत
raktapadmāsanāsīnaṃ śakalīkṛtya yatnataḥ
mūlena mūrtimantreṇa brahmāṅgādyaistu suvrata
- 28
समिदाज्याहुतीर्हुत्वा मनसा चन्द्रमण्डलात्
चन्द्रस्थानात्समुत्पन्नां पूर्णधारामनुस्मरेत्
samidājyāhutīrhutvā manasā candramaṇḍalāt
candrasthānātsamutpannāṃ pūrṇadhārāmanusmaret
- 29
पूर्णाहुतिविधानेन ज्ञानिनां शिवशासने
शिवं वक्त्रगतं ध्यायेत्तेजोमात्रं च शाङ्करम्
pūrṇāhutividhānena jñānināṃ śivaśāsane
śivaṃ vaktragataṃ dhyāyettejomātraṃ ca śāṅkaram
- 30
ललाटे देवदेवेशं भ्रूमध्ये वा स्मरेत्पुनः
यच्च हृत्कमले सर्वं समाप्य विधिविस्तरम्
lalāṭe devadeveśaṃ bhrūmadhye vā smaretpunaḥ
yacca hṛtkamale sarvaṃ samāpya vidhivistaram

