17 shlokas
- 1
ऋषय ऊचुः
श्रुता वज्रेश्वरी विद्या ब्राह्मी शक्रोपकारिणी
अनया सर्वकार्याणि नृपाणामिति नः श्रुतम्
ṛṣaya ūcuḥ
śrutā vajreśvarī vidyā brāhmī śakropakāriṇī
anayā sarvakāryāṇi nṛpāṇāmiti naḥ śrutam
- 2
विनियोगं वदस्वास्या विद्याया रोमहर्षण
सूत उवाच
वश्यमाकर्षणं चैव विद्वेषणमतः परम्
viniyogaṃ vadasvāsyā vidyāyā romaharṣaṇa
sūta uvāca
vaśyamākarṣaṇaṃ caiva vidveṣaṇamataḥ param
- 3
उच्चाटनं स्तम्भनं च मोहनं ताडनं तथा
उत्सादनं तथा छेदं मारणं प्रतिबन्धनम्
uccāṭanaṃ stambhanaṃ ca mohanaṃ tāḍanaṃ tathā
utsādanaṃ tathā chedaṃ māraṇaṃ pratibandhanam
- 4
सेनास्तंभनकादीनि सावित्र्या सर्वमाचरेत्
आगच्छ वरदे देवि भूम्यां पर्वतमूर्धनि
senāstaṃbhanakādīni sāvitryā sarvamācaret
āgaccha varade devi bhūmyāṃ parvatamūrdhani
- 5
ब्राह्मणेभ्यो ह्यनुज्ञाता गच्छ देवि यथासुखम्
उद्वास्यानेन मन्त्रेण गन्तव्यं नान्यथा द्विजाः
brāhmaṇebhyo hyanujñātā gaccha devi yathāsukham
udvāsyānena mantreṇa gantavyaṃ nānyathā dvijāḥ
- 6
प्रतिकार्यं तथा बाह्यं कृत्वा वश्यादिकां क्रियाम्
उद्वास्य वह्निमाधाय पुनरन्यं यथाविधि
pratikāryaṃ tathā bāhyaṃ kṛtvā vaśyādikāṃ kriyām
udvāsya vahnimādhāya punaranyaṃ yathāvidhi
- 7
देवीमावाह्य च पुनर्जपेत्सम्पूजयेत्पुनः
होमं च विधिना वह्नौ पुनरेव समाचरेत्
devīmāvāhya ca punarjapetsampūjayetpunaḥ
homaṃ ca vidhinā vahnau punareva samācaret
- 8
सर्वकार्याणि विधिना साधयेद्विद्यया पुनः
जातीपुष्पैश्च वश्यार्थी जुहुयादयुतत्रयम्
sarvakāryāṇi vidhinā sādhayedvidyayā punaḥ
jātīpuṣpaiśca vaśyārthī juhuyādayutatrayam
- 9
घृतेन करवीरेण कुर्यादाकर्षणं द्विजाः
विद्वेषणं विशेषेण कुर्याल्लाङ्गलकस्य च
ghṛtena karavīreṇa kuryādākarṣaṇaṃ dvijāḥ
vidveṣaṇaṃ viśeṣeṇa kuryāllāṅgalakasya ca
- 10
तैलेनोच्चाटनं प्रोक्तं स्तंभनं मधुना स्मृतम्
तिलेन मोहनं प्रोक्तं ताडनं रुधिरेण च
tailenoccāṭanaṃ proktaṃ staṃbhanaṃ madhunā smṛtam
tilena mohanaṃ proktaṃ tāḍanaṃ rudhireṇa ca
- 11
खरस्य च गजस्याथ उष्ट्रस्य च यथाक्रमम्
स्तंभनं सर्षपेणापि पाटनं च कुशेन च
kharasya ca gajasyātha uṣṭrasya ca yathākramam
staṃbhanaṃ sarṣapeṇāpi pāṭanaṃ ca kuśena ca
- 12
मारणोच्चाटने चैव रोहीबीजेन सुव्रताः
बन्धनं त्वहिपत्त्रेण सेनास्तंभमतः परम्
māraṇoccāṭane caiva rohībījena suvratāḥ
bandhanaṃ tvahipattreṇa senāstaṃbhamataḥ param
- 13
कुनट्या नियतं विद्यात्पूजयेत्परमेश्वरीम्
घृतेन सर्वसिद्धिः स्यात्पयसा वा विशुध्यते
kunaṭyā niyataṃ vidyātpūjayetparameśvarīm
ghṛtena sarvasiddhiḥ syātpayasā vā viśudhyate
- 14
तिलेन रोगनाशश्च कमलेन धनं भवेत्
कान्तिर्मधूकपुष्पेण सावित्र्या ह्ययुतत्रयम्
tilena roganāśaśca kamalena dhanaṃ bhavet
kāntirmadhūkapuṣpeṇa sāvitryā hyayutatrayam
- 15
जयादिप्रभृतीन्सर्वान्स्विष्टान्तं पूर्ववत्स्मृतम्
एवं संक्षेपतः प्रोक्तो विनियोगो ऽतिविस्तृतः
jayādiprabhṛtīnsarvānsviṣṭāntaṃ pūrvavatsmṛtam
evaṃ saṃkṣepataḥ prokto viniyogo 'tivistṛtaḥ
- 16
जपेद्वा केवलां विद्यां सम्पूज्य च विधानतः
सर्वसिद्धिमवाप्नोति नात्र कार्या विचारणा
japedvā kevalāṃ vidyāṃ sampūjya ca vidhānataḥ
sarvasiddhimavāpnoti nātra kāryā vicāraṇā
- 17
इति श्रीलिङ्गमहापुराणे उत्तरभागे द्विपञ्चाशत्तमो ऽध्यायः
iti śrīliṅgamahāpurāṇe uttarabhāge dvipañcāśattamo 'dhyāyaḥ

