19 shlokas
- 1
ऋषय ऊचुः
निग्रहो घोररूपो ऽयं कथितो ऽस्माकमुत्तमम्
वज्रवाहनिकां विद्यां वक्तुमर्हसि सत्तम
ṛṣaya ūcuḥ
nigraho ghorarūpo 'yaṃ kathito 'smākamuttamam
vajravāhanikāṃ vidyāṃ vaktumarhasi sattama
- 2
सूत उवाच
वज्रवाहनिका नाम सर्वशत्रुभयङ्करी
अनया सेचयेद्वज्रं नृपाणां साधयेत्तथा
sūta uvāca
vajravāhanikā nāma sarvaśatrubhayaṅkarī
anayā secayedvajraṃ nṛpāṇāṃ sādhayettathā
- 3
वज्रं कृत्वा विधानेन तद्वज्रमभिषिच्य च
अनया विद्यया तस्मिन्विन्यसेत्काञ्चनेन च
vajraṃ kṛtvā vidhānena tadvajramabhiṣicya ca
anayā vidyayā tasminvinyasetkāñcanena ca
- 4
ततश्चाक्षरलक्षं च जपेद्विद्वान्समाहितः
वज्रीदशांशं जुहुयाद्वज्रकुण्डे घृतादिभिः
tataścākṣaralakṣaṃ ca japedvidvānsamāhitaḥ
vajrīdaśāṃśaṃ juhuyādvajrakuṇḍe ghṛtādibhiḥ
- 5
तद्वज्रं गोपयेन्नित्यं दापयेन्नृपतेस्ततः
तेन वज्रेण वै गच्छञ्छत्रूञ्जीयाद्रणाजिरे
tadvajraṃ gopayennityaṃ dāpayennṛpatestataḥ
tena vajreṇa vai gacchañchatrūñjīyādraṇājire
- 6
पुरा पितामहेनैव लब्धा विद्या प्रयत्नतः
देवी शक्रोपकारार्थं साक्षाद्वज्रेश्वरी तथा
purā pitāmahenaiva labdhā vidyā prayatnataḥ
devī śakropakārārthaṃ sākṣādvajreśvarī tathā
- 7
पुरा त्वष्टा प्रजानाथो हतपुत्रः सुरेश्वरात्
विद्यया हरतः सोममिन्द्रवैरेण सुव्रताः
purā tvaṣṭā prajānātho hataputraḥ sureśvarāt
vidyayā harataḥ somamindravaireṇa suvratāḥ
- 8
तस्मिन्यज्ञे यथाप्राप्तं विधिनोपकृतं हविः
तदैच्छत महाबाहुर्विश्वरूपविमर्दनः
tasminyajñe yathāprāptaṃ vidhinopakṛtaṃ haviḥ
tadaicchata mahābāhurviśvarūpavimardanaḥ
- 9
मत्पुत्रमवधीः शक्र न दास्ये तव शोभनम्
भागं भागार्हता नैव विश्वरूपो हतस्त्वया
matputramavadhīḥ śakra na dāsye tava śobhanam
bhāgaṃ bhāgārhatā naiva viśvarūpo hatastvayā
- 10
इत्युक्त्वा चाश्रमं सर्वं मोहयामास मायया
ततो मायां विनिर्भिद्य विश्वरूपविमर्दनः
ityuktvā cāśramaṃ sarvaṃ mohayāmāsa māyayā
tato māyāṃ vinirbhidya viśvarūpavimardanaḥ
- 11
प्रसह्य सोममपिबत्सगणैश्च शचीपतिः
ततस्तच्छेषमादाय क्रोधाविष्टः प्रजापतिः
prasahya somamapibatsagaṇaiśca śacīpatiḥ
tatastaccheṣamādāya krodhāviṣṭaḥ prajāpatiḥ
- 12
इन्द्रस्य शत्रोर्वर्धस्व स्वाहेत्यग्नौ जुहाव ह
ततः कालाग्निसंकाशो वर्तनाद्वृत्रसंज्ञितः
indrasya śatrorvardhasva svāhetyagnau juhāva ha
tataḥ kālāgnisaṃkāśo vartanādvṛtrasaṃjñitaḥ
- 13
प्रादुरासीत्सुरेशारिर्दुद्राव च वृषान्तकः
ततः किरीटी भगवान्परित्यज्य दिवं क्षणात्
prādurāsītsureśārirdudrāva ca vṛṣāntakaḥ
tataḥ kirīṭī bhagavānparityajya divaṃ kṣaṇāt
- 14
सहस्रनेत्रः सगणो दुद्राव भयविह्वलः
तदा तमाह स विभुर्हृष्टो ब्रह्मा च विश्वसृट्
sahasranetraḥ sagaṇo dudrāva bhayavihvalaḥ
tadā tamāha sa vibhurhṛṣṭo brahmā ca viśvasṛṭ
- 15
त्यक्त्वा वज्रं तमेतेन जहीत्यरिम् अरिंदमः
सो ऽपि संनह्य देवेन्द्रो देवैः सार्धं महाभुजः
tyaktvā vajraṃ tametena jahītyarim ariṃdamaḥ
so 'pi saṃnahya devendro devaiḥ sārdhaṃ mahābhujaḥ
- 16
निहत्य चाप्रयत्नेन गतवान्विगतज्वरः
तस्माद्वज्रेश्वरीविद्या सर्वशत्रुभयङ्करी
nihatya cāprayatnena gatavānvigatajvaraḥ
tasmādvajreśvarīvidyā sarvaśatrubhayaṅkarī
- 17
मन्देहा राक्षसा नित्यं विजिता विद्ययैव तु
तां विद्यां सम्प्रवक्ष्यामि सर्वपापप्रमोचनीम्
mandehā rākṣasā nityaṃ vijitā vidyayaiva tu
tāṃ vidyāṃ sampravakṣyāmi sarvapāpapramocanīm
- 18
ॐ भूर्भुवः स्वः तत्सवितुर्वरेण्यं भर्गो देवस्य धीमहि
धियो यो नः प्रचोदयात्
ॐ फट्जहि हुं फट्छिन्द्धि भिन्द्धि जहि हन हन स्वाहा
विद्या वज्रेश्वरीत्येषा सर्वशत्रुभयङ्करी
अनया संहृतिः शंभोर्विद्यया मुनिपुङ्गवाः
oṃ bhūrbhuvaḥ svaḥ tatsaviturvareṇyaṃ bhargo devasya dhīmahi
dhiyo yo naḥ pracodayāt
oṃ phaṭjahi huṃ phaṭchinddhi bhinddhi jahi hana hana svāhā
vidyā vajreśvarītyeṣā sarvaśatrubhayaṅkarī
anayā saṃhṛtiḥ śaṃbhorvidyayā munipuṅgavāḥ
- 19
इति श्रीलिङ्गमहापुराणे उत्तरभागे एकपञ्चाशत्तमो ऽध्यायः
iti śrīliṅgamahāpurāṇe uttarabhāge ekapañcāśattamo 'dhyāyaḥ

