10 shlokas
- 1
सनत्कुमार उवाच
अथान्यत्सम्प्रवक्ष्यामि सर्वदानोत्तमोत्तमम्
पूर्वोक्तदेशकाले च मण्डपे च विधानतः
sanatkumāra uvāca
athānyatsampravakṣyāmi sarvadānottamottamam
pūrvoktadeśakāle ca maṇḍape ca vidhānataḥ
- 2
प्रणयात्कुण्डमध्ये च स्थण्डिले शिवसन्निधौ
पूर्वं विष्णुं समासाद्य पद्मयोनिमतः परम्
praṇayātkuṇḍamadhye ca sthaṇḍile śivasannidhau
pūrvaṃ viṣṇuṃ samāsādya padmayonimataḥ param
- 3
मन्त्राभ्यां विधिनोक्ताभ्यां प्रणवादिसमन्त्रकम्
नारायणाय विद्महे वासुदेवाय धीमहि
तन्नो विष्णुः प्रचोदयात्
mantrābhyāṃ vidhinoktābhyāṃ praṇavādisamantrakam
nārāyaṇāya vidmahe vāsudevāya dhīmahi
tanno viṣṇuḥ pracodayāt
- 4
ब्रह्मब्राह्मणवृद्धाय ब्रह्मणे विश्ववेधसे
शिवाय हरये स्वाहा स्वधा वौषड्वषट्तथा
brahmabrāhmaṇavṛddhāya brahmaṇe viśvavedhase
śivāya haraye svāhā svadhā vauṣaḍvaṣaṭtathā
- 5
पूजयित्वा विधानेन पश्चाद्धोमं समाचरेत्
सर्वद्रव्यं हि होतव्यं द्वाभ्यां कुण्डविधानतः
pūjayitvā vidhānena paścāddhomaṃ samācaret
sarvadravyaṃ hi hotavyaṃ dvābhyāṃ kuṇḍavidhānataḥ
- 6
ऋत्विजौ द्वौ प्रकर्तव्यौ गुरुणा वेदपारगौ
तानुद्दिश्य यथान्यायं विप्रेभ्यो दापयेद्धनम्
ṛtvijau dvau prakartavyau guruṇā vedapāragau
tānuddiśya yathānyāyaṃ viprebhyo dāpayeddhanam
- 7
शतमष्टोत्तरं तेभ्यः पृथक्पृथगनुत्तमम्
वस्त्राभरणसंयुक्तं सर्वालङ्कारसंयुतम्
śatamaṣṭottaraṃ tebhyaḥ pṛthakpṛthaganuttamam
vastrābharaṇasaṃyuktaṃ sarvālaṅkārasaṃyutam
- 8
गुरुरेको हि वै श्रीमान्ब्रह्मा विष्णुर्महेश्वरः
तेषां पृथक्पृथग्देयं भोजयेद्ब्राह्मणानपि
gurureko hi vai śrīmānbrahmā viṣṇurmaheśvaraḥ
teṣāṃ pṛthakpṛthagdeyaṃ bhojayedbrāhmaṇānapi
- 9
शिवार्चना च कर्तव्या स्नपनादि यथाक्रमम्
śivārcanā ca kartavyā snapanādi yathākramam
- 10
इति श्रीलिङ्गमहापुराणे उत्तरभागे चतुश्चत्वारिंशो ऽध्यायः
iti śrīliṅgamahāpurāṇe uttarabhāge catuścatvāriṃśo 'dhyāyaḥ

