11 shlokas
- 1
सनत्कुमार उवाच
हिरण्यवृषदानं च कथयामि समासतः
वृषरूपं हिरण्येन सहस्रेणाथ कारयेत्
sanatkumāra uvāca
hiraṇyavṛṣadānaṃ ca kathayāmi samāsataḥ
vṛṣarūpaṃ hiraṇyena sahasreṇātha kārayet
- 2
तदर्धार्धेन वा धीमांस्तदर्धार्धेन वा पुनः
अष्टोत्तरशतेनापि वृषभं धर्मरूपिणम्
tadardhārdhena vā dhīmāṃstadardhārdhena vā punaḥ
aṣṭottaraśatenāpi vṛṣabhaṃ dharmarūpiṇam
- 3
ललाटे कारयेत्पुण्ड्रमर्धचन्द्रकलाकृतिम्
स्फटिकेन तु कर्तव्यं खुरं तु रजतेन वै
lalāṭe kārayetpuṇḍramardhacandrakalākṛtim
sphaṭikena tu kartavyaṃ khuraṃ tu rajatena vai
- 4
ग्रीवां तु पद्मरागेण ककुद्गोमेदकेन च
ग्रीवायां घण्टावलयं रत्नचित्रं तु कारयेत्
grīvāṃ tu padmarāgeṇa kakudgomedakena ca
grīvāyāṃ ghaṇṭāvalayaṃ ratnacitraṃ tu kārayet
- 5
वृषाङ्कं कारयेत्तत्र किङ्किणीवलयावृतम्
पूर्वोक्तदेशकाले तु वेदिकोपरिमण्डले
vṛṣāṅkaṃ kārayettatra kiṅkiṇīvalayāvṛtam
pūrvoktadeśakāle tu vedikoparimaṇḍale
- 6
वृषेन्द्रं स्थापयेत्तत्र पश्चिमामुखम् अग्रतः
ईश्वरं पूजयेद्भक्त्या वृषारूढं वृषध्वजम्
vṛṣendraṃ sthāpayettatra paścimāmukham agrataḥ
īśvaraṃ pūjayedbhaktyā vṛṣārūḍhaṃ vṛṣadhvajam
- 7
वृषेन्द्रं पूज्य गायत्र्या नमस्कृत्य समाहितः
तीक्ष्णशृङ्गाय विद्महे धर्मपादाय धीमहि
तन्नो वृषः प्रचोदयात्
vṛṣendraṃ pūjya gāyatryā namaskṛtya samāhitaḥ
tīkṣṇaśṛṅgāya vidmahe dharmapādāya dhīmahi
tanno vṛṣaḥ pracodayāt
- 8
मन्त्रेणानेन सम्पूज्य वृषं धर्मविवृद्धये
होमयेच्च घृतान्नाद्यैर्यथाविभवविस्तरम्
mantreṇānena sampūjya vṛṣaṃ dharmavivṛddhaye
homayecca ghṛtānnādyairyathāvibhavavistaram
- 9
वृषभः पूज्य दातव्यो ब्राह्मणेभ्यः शिवाय वा
दक्षिणा चैव दातव्या यथावित्तानुसारतः
vṛṣabhaḥ pūjya dātavyo brāhmaṇebhyaḥ śivāya vā
dakṣiṇā caiva dātavyā yathāvittānusārataḥ
- 10
एतद्यः कुरुते भक्त्या वृषदानमनुत्तमम्
शिवस्यानुचरो भूत्वा तेनैव सह मोदते
etadyaḥ kurute bhaktyā vṛṣadānamanuttamam
śivasyānucaro bhūtvā tenaiva saha modate
- 11
इति श्रीलिङ्गमहापुराणे उत्तरभागे सुवर्णवृषदानं नामैकचत्वारिंशो ऽध्यायः
iti śrīliṅgamahāpurāṇe uttarabhāge suvarṇavṛṣadānaṃ nāmaikacatvāriṃśo 'dhyāyaḥ

