10 shlokas
- 1
सनत्कुमार उवाच
लक्ष्मीदानं प्रवक्ष्यामि महदैश्वर्यवर्धनम्
पूर्वोक्तमण्डपे कार्यं वेदिकोपरिमण्डले
sanatkumāra uvāca
lakṣmīdānaṃ pravakṣyāmi mahadaiśvaryavardhanam
pūrvoktamaṇḍape kāryaṃ vedikoparimaṇḍale
- 2
श्रीदेवीमतुलां कृत्वा हिरण्येन यथाविधि
सहस्रेण तदर्धेन तदर्धार्धेन वा पुनः
śrīdevīmatulāṃ kṛtvā hiraṇyena yathāvidhi
sahasreṇa tadardhena tadardhārdhena vā punaḥ
- 3
अष्टोत्तरशतेनापि सर्वलक्षणसंयुताम्
मण्डले विन्यसेल्लक्ष्मीं सर्वालङ्कारसंयुताम्
aṣṭottaraśatenāpi sarvalakṣaṇasaṃyutām
maṇḍale vinyasellakṣmīṃ sarvālaṅkārasaṃyutām
- 4
तस्यास्तु दक्षिणे भागे स्थण्डिले विष्णुमर्चयेत्
अर्चयित्वा विधानेन श्रीसूक्तेन सुरेश्वरीम्
tasyāstu dakṣiṇe bhāge sthaṇḍile viṣṇumarcayet
arcayitvā vidhānena śrīsūktena sureśvarīm
- 5
अर्चयेद्विष्णुगायत्र्या विष्णुं विश्वगुरुं हरिम्
आराध्य विधिना देवीं पूर्ववद्धोमम् आचरेत्
arcayedviṣṇugāyatryā viṣṇuṃ viśvaguruṃ harim
ārādhya vidhinā devīṃ pūrvavaddhomam ācaret
- 6
समिद्धुत्वा विधानेन आज्याहुतिमथाचरेत्
पृथगष्टोत्तरशतं होमयेद्ब्राह्मणोत्तमैः
samiddhutvā vidhānena ājyāhutimathācaret
pṛthagaṣṭottaraśataṃ homayedbrāhmaṇottamaiḥ
- 7
आहूय यजमानं तु तस्याः पूर्वदिशि स्थले
तस्मै तां दर्शयेद्देवीं दण्डवत्प्रणमेत्क्षितौ
āhūya yajamānaṃ tu tasyāḥ pūrvadiśi sthale
tasmai tāṃ darśayeddevīṃ daṇḍavatpraṇametkṣitau
- 8
प्रणम्य विष्णुं तत्रस्थं शिवं पूर्ववदर्चयेत्
तस्या विंशतिभागं तु दक्षिणा परिकीर्तिता
praṇamya viṣṇuṃ tatrasthaṃ śivaṃ pūrvavadarcayet
tasyā viṃśatibhāgaṃ tu dakṣiṇā parikīrtitā
- 9
तदर्धांशं तु दातव्यमितरेषां यथार्हतः
ततस्तु होमयेच्छंभुं भक्तो योगी विशेषतः
tadardhāṃśaṃ tu dātavyamitareṣāṃ yathārhataḥ
tatastu homayecchaṃbhuṃ bhakto yogī viśeṣataḥ
- 10
इति श्रीलिङ्गमहापुराणे उत्तरभागे लक्ष्मीदानविधिनिरूपणं नाम षट्त्रिंशत्तमो ऽध्यायः
iti śrīliṅgamahāpurāṇe uttarabhāge lakṣmīdānavidhinirūpaṇaṃ nāma ṣaṭtriṃśattamo 'dhyāyaḥ

