120 shlokas
- 1
ऋषय ऊचुः
प्रभावो नन्दिनश्चैव लिङ्गपूजाफलं श्रुतम्
श्रुतिभिः संमितं सर्वं रोमहर्षण सुव्रत
ṛṣaya ūcuḥ
prabhāvo nandinaścaiva liṅgapūjāphalaṃ śrutam
śrutibhiḥ saṃmitaṃ sarvaṃ romaharṣaṇa suvrata
- 2
जयाभिषेक ईशेन कथितो मनवे पुरा
हिताय मेरुशिखरे क्षत्रियाणां त्रिशूलिना
jayābhiṣeka īśena kathito manave purā
hitāya meruśikhare kṣatriyāṇāṃ triśūlinā
- 3
तत्कथं षोडशविधं महादानं च शोभनम्
वक्तुमर्हसि चास्माकं सूत बुद्धिमतांवर
tatkathaṃ ṣoḍaśavidhaṃ mahādānaṃ ca śobhanam
vaktumarhasi cāsmākaṃ sūta buddhimatāṃvara
- 4
सूत उवाच
जीवच्छ्राद्धं पुरा कृत्वा मनुः स्वायंभुवः प्रभुः
मेरुमासाद्य देवेशम् अस्तावीन्नीललोहितम्
sūta uvāca
jīvacchrāddhaṃ purā kṛtvā manuḥ svāyaṃbhuvaḥ prabhuḥ
merumāsādya deveśam astāvīnnīlalohitam
- 5
तपसा च विनीताय प्रहृष्टः प्रददौ भवः
दिव्यं दर्शनमीशानस्तेनापश्यत्तम् अव्ययम्
tapasā ca vinītāya prahṛṣṭaḥ pradadau bhavaḥ
divyaṃ darśanamīśānastenāpaśyattam avyayam
- 6
नत्वा सम्पूज्य विधिना कृताञ्जलिपुटः स्थितः
हर्षगद्गदया वाचा प्रोवाच च ननाम च
natvā sampūjya vidhinā kṛtāñjalipuṭaḥ sthitaḥ
harṣagadgadayā vācā provāca ca nanāma ca
- 7
देवदेव जगन्नाथ नमस्ते भुवनेश्वर
जीवच्छ्राद्धं महादेव प्रसादेन विनिर्मितम्
devadeva jagannātha namaste bhuvaneśvara
jīvacchrāddhaṃ mahādeva prasādena vinirmitam
- 8
पूजितश्च ततो देवो दृष्टश्चैव मयाधुना
शक्राय कथितं पूर्वं धर्मकामार्थमोक्षदम्
pūjitaśca tato devo dṛṣṭaścaiva mayādhunā
śakrāya kathitaṃ pūrvaṃ dharmakāmārthamokṣadam
- 9
जयाभिषेकं देवेश वक्तुमर्हसि मे प्रभो
सूत उवाच
तस्मै देवो महादेवो भगवान्नीललोहितः
jayābhiṣekaṃ deveśa vaktumarhasi me prabho
sūta uvāca
tasmai devo mahādevo bhagavānnīlalohitaḥ
- 10
जयाभिषेकमखिलमवदत्परमेश्वरः
श्रीभगवानुवाच
जयाभिषेकं वक्ष्यामि नृपाणां हितकाम्यया
jayābhiṣekamakhilamavadatparameśvaraḥ
śrībhagavānuvāca
jayābhiṣekaṃ vakṣyāmi nṛpāṇāṃ hitakāmyayā
- 11
अपमृत्युजयार्थं च सर्वशत्रुजयाय च
युद्धकाले तु सम्प्राप्ते कृत्वैवमभिषेचनम्
apamṛtyujayārthaṃ ca sarvaśatrujayāya ca
yuddhakāle tu samprāpte kṛtvaivamabhiṣecanam
- 12
स्वपतिं चाभिषिच्यैव गच्छेद्योद्धुं रणाजिरे
विधिना मण्डपं कृत्वा प्रपां वा कूटमेव वा
svapatiṃ cābhiṣicyaiva gacchedyoddhuṃ raṇājire
vidhinā maṇḍapaṃ kṛtvā prapāṃ vā kūṭameva vā
- 13
नवधा स्थापयेद्वह्निं ब्राह्मणो वेदपारगः
ततः सर्वाभिषेकार्थं सूत्रपातं च कारयेत्
navadhā sthāpayedvahniṃ brāhmaṇo vedapāragaḥ
tataḥ sarvābhiṣekārthaṃ sūtrapātaṃ ca kārayet
- 14
प्रागाद्यं वर्णसूत्रं च दक्षिणाद्यं तथा पुनः
सहस्राणां द्वयं तत्र शतानां च चतुष्टयम्
prāgādyaṃ varṇasūtraṃ ca dakṣiṇādyaṃ tathā punaḥ
sahasrāṇāṃ dvayaṃ tatra śatānāṃ ca catuṣṭayam
- 15
शेषमेव शुभं कोष्ठं तेषु कोष्ठं तु संहरेत्
बाह्ये वीथ्यां पदं चैकं समन्तादुपसंहरेत्
śeṣameva śubhaṃ koṣṭhaṃ teṣu koṣṭhaṃ tu saṃharet
bāhye vīthyāṃ padaṃ caikaṃ samantādupasaṃharet
- 16
अङ्गसूत्राणि संगृह्य विधिना पृथगेव तु
प्रागाद्यं वर्णसूत्रं च दक्षिणाद्यं तथा पुनः
aṅgasūtrāṇi saṃgṛhya vidhinā pṛthageva tu
prāgādyaṃ varṇasūtraṃ ca dakṣiṇādyaṃ tathā punaḥ
- 17
प्रागाद्यं दक्षिणाद्यं च षट्त्रिंशत्संहरेत्क्रमात्
प्रागाद्याः पङ्क्तयः सप्त दक्षिणाद्यास्तथा पुनः
prāgādyaṃ dakṣiṇādyaṃ ca ṣaṭtriṃśatsaṃharetkramāt
prāgādyāḥ paṅktayaḥ sapta dakṣiṇādyāstathā punaḥ
- 18
तस्मादेकोनपञ्चाशत्पङ्क्तयः परिकीर्तिताः
नव पङ्क्तीर्हरेन्मध्ये गन्धगोमयवारिणा
tasmādekonapañcāśatpaṅktayaḥ parikīrtitāḥ
nava paṅktīrharenmadhye gandhagomayavāriṇā
- 19
कमलं चालिखेत्तत्र हस्तमात्रेण शोभनम्
अष्टपत्रं सितं वृत्तं कर्णिकाकेसरान्वितम्
kamalaṃ cālikhettatra hastamātreṇa śobhanam
aṣṭapatraṃ sitaṃ vṛttaṃ karṇikākesarānvitam
- 20
अष्टाङ्गुलप्रमाणेन कर्णिका हेमसन्निभा
चतुरङ्गुलमानेन केसरस्थानमुच्यते
aṣṭāṅgulapramāṇena karṇikā hemasannibhā
caturaṅgulamānena kesarasthānamucyate
- 21
धर्मो ज्ञानं च वैराग्यमैश्वर्यं च यथाक्रमम्
आग्नेयादिषु कोणेषु स्थापयेत्प्रणवेन तु
dharmo jñānaṃ ca vairāgyamaiśvaryaṃ ca yathākramam
āgneyādiṣu koṇeṣu sthāpayetpraṇavena tu
- 22
अव्यक्तादीनि वै दिक्षु गात्राकारेण वै न्यसेत्
अव्यक्तं नियतः कालः काली चेति चतुष्टयम्
avyaktādīni vai dikṣu gātrākāreṇa vai nyaset
avyaktaṃ niyataḥ kālaḥ kālī ceti catuṣṭayam
- 23
सितरक्तहिरण्याभकृष्णा धर्मादयः क्रमात्
हंसाकारेण वै गात्रं हेमाभासेन सुव्रताः
sitaraktahiraṇyābhakṛṣṇā dharmādayaḥ kramāt
haṃsākāreṇa vai gātraṃ hemābhāsena suvratāḥ
- 24
आधारशक्तिमध्ये तु कमलं सृष्टिकारणम्
बिन्दुमात्रं कलामध्ये नादाकारमतः परम्
ādhāraśaktimadhye tu kamalaṃ sṛṣṭikāraṇam
bindumātraṃ kalāmadhye nādākāramataḥ param
- 25
नादोपरि शिवं ध्यायेद् ॐकाराख्यं जगद्गुरुम्
मनोन्मनीं च पद्माभं महादेवं च भावयेत्
nādopari śivaṃ dhyāyed oṃkārākhyaṃ jagadgurum
manonmanīṃ ca padmābhaṃ mahādevaṃ ca bhāvayet
- 26
वामादयः क्रमेणैव प्रागाद्याः केसरेषु वै
वामा ज्येष्ठा तथा रौद्री काली विकरणी तथा
vāmādayaḥ krameṇaiva prāgādyāḥ kesareṣu vai
vāmā jyeṣṭhā tathā raudrī kālī vikaraṇī tathā
- 27
बला प्रमथिनी देवी दमनी च यथाक्रमम्
वामदेवादिभिः सार्धं प्रणवेनैव विन्यसेत्
balā pramathinī devī damanī ca yathākramam
vāmadevādibhiḥ sārdhaṃ praṇavenaiva vinyaset
- 28
नमो ऽस्तु वामदेवाय नमो ज्येष्ठाय शूलिने
namo 'stu vāmadevāya namo jyeṣṭhāya śūline
- 29
रुद्राय कालरूपाय कलाविकरणाय च
बलाय च तथा सर्वभूतस्य दमनाय च
rudrāya kālarūpāya kalāvikaraṇāya ca
balāya ca tathā sarvabhūtasya damanāya ca
- 30
मनोन्मनाय देवाय मनोन्मन्यै नमोनमः
मन्त्रैरेतैर्यथान्यायं पूजयेत्परिमण्डलम्
manonmanāya devāya manonmanyai namonamaḥ
mantrairetairyathānyāyaṃ pūjayetparimaṇḍalam

