12 shlokas
- 1
सनत्कुमार उवाच
लोकपालाष्टकं दिव्यं साक्षात्परमदुर्लभम्
सर्वसंपत्करं गुह्यं परचक्रविनाशनम्
sanatkumāra uvāca
lokapālāṣṭakaṃ divyaṃ sākṣātparamadurlabham
sarvasaṃpatkaraṃ guhyaṃ paracakravināśanam
- 2
स्वदेशरक्षणं दिव्यं गजवाजिविवर्धनम्
पुत्रवृद्धिकरं पुण्यं गोब्राह्मणहितावहम्
svadeśarakṣaṇaṃ divyaṃ gajavājivivardhanam
putravṛddhikaraṃ puṇyaṃ gobrāhmaṇahitāvaham
- 3
पूर्वोक्तदेशकाले तु वेदिकोपरिमण्डले
मध्ये शिवं समभ्यर्च्य यथान्यायं यथाक्रमम्
pūrvoktadeśakāle tu vedikoparimaṇḍale
madhye śivaṃ samabhyarcya yathānyāyaṃ yathākramam
- 4
दिग्विदिक्षु प्रकर्तव्यं स्थण्डिलं वालुकामयम्
अष्टौ विप्रान्समभ्यर्च्य वेदवेदाङ्गपारगान्
digvidikṣu prakartavyaṃ sthaṇḍilaṃ vālukāmayam
aṣṭau viprānsamabhyarcya vedavedāṅgapāragān
- 5
जितेन्द्रियान्कुलोद्भूतान्सर्वलक्षणसंयुतान्
शिवाभिमुखम् आसीनान् आहतेष्वंबरेषु च
jitendriyānkulodbhūtānsarvalakṣaṇasaṃyutān
śivābhimukham āsīnān āhateṣvaṃbareṣu ca
- 6
वस्त्रैर् आभरणैर्दिव्यैर्लोकपालकमन्त्रकैः
गन्धपुष्पैः सुधूपैश्च ब्राह्मणानर्चयेत्क्रमात्
vastrair ābharaṇairdivyairlokapālakamantrakaiḥ
gandhapuṣpaiḥ sudhūpaiśca brāhmaṇānarcayetkramāt
- 7
पूर्वतो होमयेदग्नौ लोकपालकमन्त्रकैः
समिद्घृताभ्यां होतव्यमग्निकार्यं क्रमेण वा
pūrvato homayedagnau lokapālakamantrakaiḥ
samidghṛtābhyāṃ hotavyamagnikāryaṃ krameṇa vā
- 8
एवं हुत्वा विधानेन आचार्यः शिववत्सलः
यजमानं समाहूय सर्वाभरणभूषितान्
evaṃ hutvā vidhānena ācāryaḥ śivavatsalaḥ
yajamānaṃ samāhūya sarvābharaṇabhūṣitān
- 9
तेन तान्पूजयित्वाथ द्विजेभ्यो दापयेद्धनम्
पृथक्पृथक्तन्मन्त्रैश्च दशनिष्कं च भूषणम्
tena tānpūjayitvātha dvijebhyo dāpayeddhanam
pṛthakpṛthaktanmantraiśca daśaniṣkaṃ ca bhūṣaṇam
- 10
दशनिष्केण कर्तव्यमासनं केवलं पृथक्
स्नपनं तत्र कर्तव्यं शिवस्य विधिपूर्वकम्
daśaniṣkeṇa kartavyamāsanaṃ kevalaṃ pṛthak
snapanaṃ tatra kartavyaṃ śivasya vidhipūrvakam
- 11
दक्षिणा च प्रदातव्या यथाविभवविस्तरम्
एवं यः कुरुते दानं लोकेशानां तु भक्तितः
लोकेशानां चिरं स्थित्वा सार्वभौमो भवेद्बुधः
dakṣiṇā ca pradātavyā yathāvibhavavistaram
evaṃ yaḥ kurute dānaṃ lokeśānāṃ tu bhaktitaḥ
lokeśānāṃ ciraṃ sthitvā sārvabhaumo bhavedbudhaḥ
- 12
इति श्रीलिङ्गमहापुराणे उत्तरभागे त्रिचत्वारिंशो ऽध्यायः
iti śrīliṅgamahāpurāṇe uttarabhāge tricatvāriṃśo 'dhyāyaḥ

