12 shlokas
- 1
सनत्कुमार उवाच
अथ ते सम्प्रवक्ष्यामि हेमधेनुविधिक्रमम्
सर्वपापप्रशमनं ग्रहदुर्भिक्षनाशनम्
sanatkumāra uvāca
atha te sampravakṣyāmi hemadhenuvidhikramam
sarvapāpapraśamanaṃ grahadurbhikṣanāśanam
- 2
उपसर्गप्रशमनं सर्वव्याधिनिवारणम्
निष्काणां च सहस्रेण सुवर्णेन तु कारयेत्
upasargapraśamanaṃ sarvavyādhinivāraṇam
niṣkāṇāṃ ca sahasreṇa suvarṇena tu kārayet
- 3
तदर्धेनापि वा सम्यक्तदर्धार्धेन वा पुनः
शतेन वा प्रकर्तव्या सर्वरूपगुणान्विता
tadardhenāpi vā samyaktadardhārdhena vā punaḥ
śatena vā prakartavyā sarvarūpaguṇānvitā
- 4
गोरूपं सुखुरं दिव्यं सर्वलक्षणसंयुतम्
खुराग्रे विन्यसेद्वज्रं शृङ्गे वै पद्मरागकम्
gorūpaṃ sukhuraṃ divyaṃ sarvalakṣaṇasaṃyutam
khurāgre vinyasedvajraṃ śṛṅge vai padmarāgakam
- 5
भ्रुवोर्मध्ये न्यसेद्दिव्यं मौक्तिकं मुनिसत्तमाः
वैडूर्येण स्तनाः कार्या लाङ्गूलं नीलतः शुभम्
bhruvormadhye nyaseddivyaṃ mauktikaṃ munisattamāḥ
vaiḍūryeṇa stanāḥ kāryā lāṅgūlaṃ nīlataḥ śubham
- 6
दन्तस्थाने प्रकर्तव्यः पुष्परागः सुशोभनः
पशुवत्कारयित्वा तु वत्सं कुर्यात्सुशोभनम्
dantasthāne prakartavyaḥ puṣparāgaḥ suśobhanaḥ
paśuvatkārayitvā tu vatsaṃ kuryātsuśobhanam
- 7
सुवर्णदशनिष्केण सर्वरत्नसुशोभितम्
पूर्वोक्तवेदिकामध्ये मण्डलं परिकल्प्य तु
suvarṇadaśaniṣkeṇa sarvaratnasuśobhitam
pūrvoktavedikāmadhye maṇḍalaṃ parikalpya tu
- 8
तन्मध्ये सुरभिं स्थाप्य सवत्सां सर्वतत्त्ववित्
सवत्सां सुरभिं तत्र वस्त्रयुग्मेन वेष्टयेत्
tanmadhye surabhiṃ sthāpya savatsāṃ sarvatattvavit
savatsāṃ surabhiṃ tatra vastrayugmena veṣṭayet
- 9
सम्पूजयेद्गां गायत्र्या सवत्सां सुरभिं पुनः
अथैकाग्निविधानेन होमं कुर्याद्यथाविधि
sampūjayedgāṃ gāyatryā savatsāṃ surabhiṃ punaḥ
athaikāgnividhānena homaṃ kuryādyathāvidhi
- 10
समिदाज्यविधानेन पूर्ववच्छेषमाचरेत्
शिवपूजा प्रकर्तव्या लिङ्गं स्नाप्य घृतादिभिः
samidājyavidhānena pūrvavaccheṣamācaret
śivapūjā prakartavyā liṅgaṃ snāpya ghṛtādibhiḥ
- 11
गामालभ्य च गायत्र्या शिवाया दापयेच्छुभाम्
दक्षिणा च प्रकर्तव्या त्रिंशन्निष्का महामते
gāmālabhya ca gāyatryā śivāyā dāpayecchubhām
dakṣiṇā ca prakartavyā triṃśanniṣkā mahāmate
- 12
इति श्रीलिङ्गमहापुराणे उत्तरभागे हेमधेनुदानविधिनिरूपणं नाम पञ्चत्रिंशो ऽध्यायः
iti śrīliṅgamahāpurāṇe uttarabhāge hemadhenudānavidhinirūpaṇaṃ nāma pañcatriṃśo 'dhyāyaḥ

