8 shlokas
- 1
तथागतां तां व्यथितामनिन्दितां व्यपेतहर्षां परिदीनमानसाम्
शुभां निमित्तानि शुभानि भेजिरे नरं श्रिया जुष्टमिवोपजीविनः
tathāgatāṃ tāṃ vyathitāmaninditāṃ vyapetaharṣāṃ paridīnamānasām
śubhāṃ nimittāni śubhāni bhejire naraṃ śriyā juṣṭamivopajīvinaḥ
- 2
तस्याः शुभं वाममरालपक्ष्म राजीवृतं कृष्णविशालशुक्लम्
प्रास्पन्दतैकं नयनं सुकेश्या मीनाहतं पद्ममिवाभिताम्रम्
tasyāḥ śubhaṃ vāmamarālapakṣma rājīvṛtaṃ kṛṣṇaviśālaśuklam
prāspandataikaṃ nayanaṃ sukeśyā mīnāhataṃ padmamivābhitāmram
- 3
भुजश्च चार्वञ्चितपीनवृत्तः परार्ध्यकालागुरुचन्दनार्हः
अनुत्तमेनाध्युषितः प्रियेण चिरेण वामः समवेपताशु
bhujaśca cārvañcitapīnavṛttaḥ parārdhyakālāgurucandanārhaḥ
anuttamenādhyuṣitaḥ priyeṇa cireṇa vāmaḥ samavepatāśu
- 4
गजेन्द्रहस्तप्रतिमश्च पीनस्तयोर्द्वयोः संहतयोः सुजातः
प्रस्पन्दमानः पुनरूरुरस्या रामं पुरस्तात्स्थितमाचचक्षे
gajendrahastapratimaśca pīnastayordvayoḥ saṃhatayoḥ sujātaḥ
praspandamānaḥ punarūrurasyā rāmaṃ purastātsthitamācacakṣe
- 5
शुभं पुनर्हेमसमानवर्णमीषद्रजोध्वस्तमिवामलाक्ष्याः
वासः स्थितायाः शिखराग्रदन्त्याः किंचित्परिस्रंसत चारुगात्र्याः
śubhaṃ punarhemasamānavarṇamīṣadrajodhvastamivāmalākṣyāḥ
vāsaḥ sthitāyāḥ śikharāgradantyāḥ kiṃcitparisraṃsata cārugātryāḥ
- 6
एतैर्निमित्तैरपरैश्च सुभ्रूः संबोधिता प्रागपि साधुसिद्धैः
वातातपक्लान्तमिव प्रनष्टं वर्षेण बीजं प्रतिसंजहर्ष
etairnimittairaparaiśca subhrūḥ saṃbodhitā prāgapi sādhusiddhaiḥ
vātātapaklāntamiva pranaṣṭaṃ varṣeṇa bījaṃ pratisaṃjaharṣa
- 7
तस्याः पुनर्बिम्बफलोपमौष्ठं स्वक्षिभ्रुकेशान्तमरालपक्ष्म
वक्त्रं बभासे सितशुक्लदंष्ट्रं राहोर्मुखाच्चन्द्र इव प्रमुक्तः
tasyāḥ punarbimbaphalopamauṣṭhaṃ svakṣibhrukeśāntamarālapakṣma
vaktraṃ babhāse sitaśukladaṃṣṭraṃ rāhormukhāccandra iva pramuktaḥ
- 8
सा वीतशोका व्यपनीततन्द्री शान्तज्वरा हर्षविबुद्धसत्त्वा
अशोभतार्या वदनेन शुक्ले शीतांशुना रात्रिरिवोदितेन
sā vītaśokā vyapanītatandrī śāntajvarā harṣavibuddhasattvā
aśobhatāryā vadanena śukle śītāṃśunā rātririvoditena