18 shlokas
- 1
वैशंपायन उवाच
अदृष्ट्वा तु नृपः पुत्रान्दर्शनं प्रतिलब्धवान्
ऋषिप्रसादात्पुत्राणां स्वरूपाणां कुरूद्वह
vaiśaṃpāyana uvāca
adṛṣṭvā tu nṛpaḥ putrāndarśanaṃ pratilabdhavān
ṛṣiprasādātputrāṇāṃ svarūpāṇāṃ kurūdvaha
- 2
स राजा राजधर्मांश्च ब्रह्मोपनिषदं तथा
अवाप्तवान्नरश्रेष्ठो बुद्धिनिश्चयम् एव च
sa rājā rājadharmāṃśca brahmopaniṣadaṃ tathā
avāptavānnaraśreṣṭho buddhiniścayam eva ca
- 3
विदुरश्च महाप्राज्ञो ययौ सिद्धिं तपोबलात्
धृतराष्ट्रः समासाद्य व्यासं चापि तपस्विनम्
viduraśca mahāprājño yayau siddhiṃ tapobalāt
dhṛtarāṣṭraḥ samāsādya vyāsaṃ cāpi tapasvinam
- 4
जनमेजय उवाच
ममापि वरदो व्यासो दर्शयेत्पितरं यदि
तद्रूपवेषवयसं श्रद्दध्यां सर्वम् एव ते
janamejaya uvāca
mamāpi varado vyāso darśayetpitaraṃ yadi
tadrūpaveṣavayasaṃ śraddadhyāṃ sarvam eva te
- 5
प्रियं मे स्यात्कृतार्थश्च स्याम् अहं कृतनिश्चयः
प्रसादाद् ऋषिपुत्रस्य मम कामः समृध्यताम्
priyaṃ me syātkṛtārthaśca syām ahaṃ kṛtaniścayaḥ
prasādād ṛṣiputrasya mama kāmaḥ samṛdhyatām
- 6
सूत उवाच
इत्युक्तवचने तस्मिन्नृपे व्यासः प्रतापवान्
प्रसादम् अकरोद्धीमान् आनयच्च परिक्षितम्
sūta uvāca
ityuktavacane tasminnṛpe vyāsaḥ pratāpavān
prasādam akaroddhīmān ānayacca parikṣitam
- 7
ततस्तद्रूपवयसम् आगतं नृपतिं दिवः
श्रीमन्तं पितरं राजा ददर्श जनमेजयः
tatastadrūpavayasam āgataṃ nṛpatiṃ divaḥ
śrīmantaṃ pitaraṃ rājā dadarśa janamejayaḥ
- 8
शमीकं च महात्मानं पुत्रं तं चास्य शृङ्गिणम्
अमात्या ये बभूवुश्च राज्ञस्तांश्च ददर्श ह
śamīkaṃ ca mahātmānaṃ putraṃ taṃ cāsya śṛṅgiṇam
amātyā ye babhūvuśca rājñastāṃśca dadarśa ha
- 9
ततः सो ऽवभृथे राजा मुदितो जनमेजयः
पितरं स्नापयामास स्वयं सस्नौ च पार्थिवः
tataḥ so 'vabhṛthe rājā mudito janamejayaḥ
pitaraṃ snāpayāmāsa svayaṃ sasnau ca pārthivaḥ
- 10
स्नात्वा च भरतश्रेष्ठः सो ऽऽस्तीकम् इदम् अब्रवीत्
यायावरकुलोत्पन्नं जरत्कारुसुतं तदा
snātvā ca bharataśreṣṭhaḥ so ''stīkam idam abravīt
yāyāvarakulotpannaṃ jaratkārusutaṃ tadā
- 11
आस्तीक विविधाश्चर्यो यज्ञो ऽयम् इति मे मतिः
यद् अद्यायं पिता प्राप्तो मम शोकप्रणाशनः
āstīka vividhāścaryo yajño 'yam iti me matiḥ
yad adyāyaṃ pitā prāpto mama śokapraṇāśanaḥ
- 12
आस्तीक उवाच
ऋषिर्द्वैपायनो यत्र पुराणस्तपसो निधिः
यज्ञे कुरुकुलश्रेष्ठ तस्य लोकावुभौ जितौ
āstīka uvāca
ṛṣirdvaipāyano yatra purāṇastapaso nidhiḥ
yajñe kurukulaśreṣṭha tasya lokāvubhau jitau
- 13
श्रुतं विचित्रम् आख्यानं त्वया पाण्डवनन्दन
सर्पाश्च भस्मसान्नीता गताश्च पदवीं पितुः
śrutaṃ vicitram ākhyānaṃ tvayā pāṇḍavanandana
sarpāśca bhasmasānnītā gatāśca padavīṃ pituḥ
- 14
कथंचित्तक्षको मुक्तः सत्यत्वात्तव पार्थिव
ऋषयः पूजिताः सर्वे गतिं दृष्ट्वा महात्मनः
kathaṃcittakṣako muktaḥ satyatvāttava pārthiva
ṛṣayaḥ pūjitāḥ sarve gatiṃ dṛṣṭvā mahātmanaḥ
- 15
प्राप्तः सुविपुलो धर्मः श्रुत्वा पापविनाशनम्
विमुक्तो हृदयग्रन्थिर् उदारजनदर्शनात्
prāptaḥ suvipulo dharmaḥ śrutvā pāpavināśanam
vimukto hṛdayagranthir udārajanadarśanāt
- 16
ये च पक्षधरा धर्मे सद्वृत्तरुचयश्च ये
यान्दृष्ट्वा हीयते पापं तेभ्यः कार्या नमस्क्रियाः
ye ca pakṣadharā dharme sadvṛttarucayaśca ye
yāndṛṣṭvā hīyate pāpaṃ tebhyaḥ kāryā namaskriyāḥ
- 17
सूत उवाच
एतच्छ्रुत्वा द्विजश्रेष्ठात्स राजा जनमेजयः
पूजयामास तम् ऋषिम् अनुमान्य पुनः पुनः
sūta uvāca
etacchrutvā dvijaśreṣṭhātsa rājā janamejayaḥ
pūjayāmāsa tam ṛṣim anumānya punaḥ punaḥ
- 18
पप्रच्छ तम् ऋषिं चापि वैशंपायनम् अच्युतम्
कथावशेषं धर्मज्ञो वनवासस्य सत्तम
papraccha tam ṛṣiṃ cāpi vaiśaṃpāyanam acyutam
kathāvaśeṣaṃ dharmajño vanavāsasya sattama

