28 shlokas
- 1
वैशंपायन उवाच
ततस्ते भरतश्रेष्ठाः समाजग्मुः परस्परम्
विगतक्रोधमात्सर्याः सर्वे विगतकल्मषाः
vaiśaṃpāyana uvāca
tataste bharataśreṣṭhāḥ samājagmuḥ parasparam
vigatakrodhamātsaryāḥ sarve vigatakalmaṣāḥ
- 2
विधिं परमम् आस्थाय ब्रह्मर्षिविहितं शुभम्
संप्रीतमनसः सर्वे देवलोक इवामराः
vidhiṃ paramam āsthāya brahmarṣivihitaṃ śubham
saṃprītamanasaḥ sarve devaloka ivāmarāḥ
- 3
पुत्रः पित्रा च मात्रा च भार्या च पतिना सह
भ्राता भ्रात्रा सखा चैव सख्या राजन्समागताः
putraḥ pitrā ca mātrā ca bhāryā ca patinā saha
bhrātā bhrātrā sakhā caiva sakhyā rājansamāgatāḥ
- 4
पाण्डवास्तु महेष्वासं कर्णं सौभद्रम् एव च
संप्रहर्षात्समाजग्मुर्द्रौपदेयांश्च सर्वशः
pāṇḍavāstu maheṣvāsaṃ karṇaṃ saubhadram eva ca
saṃpraharṣātsamājagmurdraupadeyāṃśca sarvaśaḥ
- 5
ततस्ते प्रीयमाणा वै कर्णेन सह पाण्डवाः
समेत्य पृथिवीपालाः सौहृदे ऽवस्थिताभवन्
tataste prīyamāṇā vai karṇena saha pāṇḍavāḥ
sametya pṛthivīpālāḥ sauhṛde 'vasthitābhavan
- 6
ऋषिप्रसादात्ते ऽन्ये च क्षत्रिया नष्टमन्यवः
असौहृदं परित्यज्य सौहृदे पर्यवस्थिताः
ṛṣiprasādātte 'nye ca kṣatriyā naṣṭamanyavaḥ
asauhṛdaṃ parityajya sauhṛde paryavasthitāḥ
- 7
एवं समागताः सर्वे गुरुभिर्बान्धवैस्तथा
पुत्रैश्च पुरुषव्याघ्राः कुरवो ऽन्ये च मानवाः
evaṃ samāgatāḥ sarve gurubhirbāndhavaistathā
putraiśca puruṣavyāghrāḥ kuravo 'nye ca mānavāḥ
- 8
तां रात्रिम् एकां कृत्स्नां ते विहृत्य प्रीतमानसाः
मेनिरे परितोषेण नृपाः स्वर्गसदो यथा
tāṃ rātrim ekāṃ kṛtsnāṃ te vihṛtya prītamānasāḥ
menire paritoṣeṇa nṛpāḥ svargasado yathā
- 9
नात्र शोको भयं त्रासो नारतिर्नायशो ऽभवत्
परस्परं समागम्य योधानां भरतर्षभ
nātra śoko bhayaṃ trāso nāratirnāyaśo 'bhavat
parasparaṃ samāgamya yodhānāṃ bharatarṣabha
- 10
समागतास्ताः पितृभिर्भ्रातृभिः पतिभिः सुतैः
मुदं परमिकां प्राप्य नार्यो दुःखम् अथात्यजन्
samāgatāstāḥ pitṛbhirbhrātṛbhiḥ patibhiḥ sutaiḥ
mudaṃ paramikāṃ prāpya nāryo duḥkham athātyajan
- 11
एकां रात्रिं विहृत्यैवं ते वीरास्ताश्च योषितः
आमन्त्र्यान्योन्यम् आश्लिष्य ततो जग्मुर्यथागतम्
ekāṃ rātriṃ vihṛtyaivaṃ te vīrāstāśca yoṣitaḥ
āmantryānyonyam āśliṣya tato jagmuryathāgatam
- 12
ततो विसर्जयामास लोकांस्तान्मुनिपुंगवः
क्षणेनान्तर्हिताश्चैव प्रेक्षताम् एव ते ऽभवन्
tato visarjayāmāsa lokāṃstānmunipuṃgavaḥ
kṣaṇenāntarhitāścaiva prekṣatām eva te 'bhavan
- 13
अवगाह्य महात्मानः पुण्यां त्रिपथगां नदीम्
सरथाः सध्वजाश्चैव स्वानि स्थानानि भेजिरे
avagāhya mahātmānaḥ puṇyāṃ tripathagāṃ nadīm
sarathāḥ sadhvajāścaiva svāni sthānāni bhejire
- 14
देवलोकं ययुः केचित्केचिद्ब्रह्मसदस्तथा
केचिच्च वारुणं लोकं केचित्कौबेरम् आप्नुवन्
devalokaṃ yayuḥ kecitkecidbrahmasadastathā
kecicca vāruṇaṃ lokaṃ kecitkauberam āpnuvan
- 15
तथा वैवस्वतं लोकं केचिच्चैवाप्नुवन्नृपाः
राक्षसानां पिशाचानां केचिच्चाप्युत्तरान्कुरून्
tathā vaivasvataṃ lokaṃ keciccaivāpnuvannṛpāḥ
rākṣasānāṃ piśācānāṃ keciccāpyuttarānkurūn
- 16
विचित्रगतयः सर्वे या अवाप्यामरैः सह
आजग्मुस्ते महात्मानः सवाहाः सपदानुगाः
vicitragatayaḥ sarve yā avāpyāmaraiḥ saha
ājagmuste mahātmānaḥ savāhāḥ sapadānugāḥ
- 17
गतेषु तेषु सर्वेषु सलिलस्थो महामुनिः
धर्मशीलो महातेजाः कुरूणां हितकृत्सदा
ततः प्रोवाच ताः सर्वाः क्षत्रिया निहतेश्वराः
gateṣu teṣu sarveṣu salilastho mahāmuniḥ
dharmaśīlo mahātejāḥ kurūṇāṃ hitakṛtsadā
tataḥ provāca tāḥ sarvāḥ kṣatriyā nihateśvarāḥ
- 18
या याः पतिकृतांल्लोकान् इच्छन्ति परमस्त्रियः
ता जाह्नवीजलं क्षिप्रम् अवगाहन्त्वतन्द्रिताः
yā yāḥ patikṛtāṃllokān icchanti paramastriyaḥ
tā jāhnavījalaṃ kṣipram avagāhantvatandritāḥ
- 19
ततस्तस्य वचः श्रुत्वा श्रद्दधाना वराङ्गनाः
श्वशुरं समनुज्ञाप्य विविशुर्जाह्नवीजलम्
tatastasya vacaḥ śrutvā śraddadhānā varāṅganāḥ
śvaśuraṃ samanujñāpya viviśurjāhnavījalam
- 20
विमुक्ता मानुषैर्देहैस्ततस्ता भर्तृभिः सह
समाजग्मुस्तदा साध्व्यः सर्वा एव विशां पते
vimuktā mānuṣairdehaistatastā bhartṛbhiḥ saha
samājagmustadā sādhvyaḥ sarvā eva viśāṃ pate
- 21
एवं क्रमेण सर्वास्ताः शीलवत्यः कुलस्त्रियः
प्रविश्य तोयं निर्मुक्ता जग्मुर्भर्तृसलोकताम्
evaṃ krameṇa sarvāstāḥ śīlavatyaḥ kulastriyaḥ
praviśya toyaṃ nirmuktā jagmurbhartṛsalokatām
- 22
दिव्यरूपसमायुक्ता दिव्याभरणभूषिताः
दिव्यमाल्याम्बरधरा यथासां पतयस्तथा
divyarūpasamāyuktā divyābharaṇabhūṣitāḥ
divyamālyāmbaradharā yathāsāṃ patayastathā
- 23
ताः शीलसत्त्वसम्पन्ना वितमस्का गतक्लमाः
सर्वाः सर्वगुणैर्युक्ताः स्वं स्वं स्थानं प्रपेदिरे
tāḥ śīlasattvasampannā vitamaskā gataklamāḥ
sarvāḥ sarvaguṇairyuktāḥ svaṃ svaṃ sthānaṃ prapedire
- 24
यस्य यस्य च यः कामस्तस्मिन्काले ऽभवत्तदा
तं तं विसृष्टवान्व्यासो वरदो धर्मवत्सलः
yasya yasya ca yaḥ kāmastasminkāle 'bhavattadā
taṃ taṃ visṛṣṭavānvyāso varado dharmavatsalaḥ
- 25
तच्छ्रुत्वा नरदेवानां पुनरागमनं नराः
जहृषुर्मुदिताश्चासन्न् अन्यदेहगता अपि
tacchrutvā naradevānāṃ punarāgamanaṃ narāḥ
jahṛṣurmuditāścāsann anyadehagatā api
- 26
प्रियैः समागमं तेषां य इमं शृणुयान्नरः
प्रियाणि लभते नित्यम् इह च प्रेत्य चैव ह
priyaiḥ samāgamaṃ teṣāṃ ya imaṃ śṛṇuyānnaraḥ
priyāṇi labhate nityam iha ca pretya caiva ha
- 27
इष्टबान्धवसंयोगम् अनायासम् अनामयम्
य इमं श्रावयेद्विद्वान्संसिद्धिं प्राप्नुयात्पराम्
iṣṭabāndhavasaṃyogam anāyāsam anāmayam
ya imaṃ śrāvayedvidvānsaṃsiddhiṃ prāpnuyātparām
- 28
स्वाध्याययुक्ताः पुरुषाः क्रियायुक्ताश्च भारत
अध्यात्मयोगयुक्ताश्च धृतिमन्तश्च मानवाः
श्रुत्वा पर्व त्विदं नित्यम् अवाप्स्यन्ति परां गतिम्
svādhyāyayuktāḥ puruṣāḥ kriyāyuktāśca bhārata
adhyātmayogayuktāśca dhṛtimantaśca mānavāḥ
śrutvā parva tvidaṃ nityam avāpsyanti parāṃ gatim

