18 shlokas
- 1
वैशंपायन उवाच
आज्ञापयामास ततः सेनां भरतसत्तमः
अर्जुनप्रमुखैर्गुप्तां लोकपालोपमैर्नरैः
vaiśaṃpāyana uvāca
ājñāpayāmāsa tataḥ senāṃ bharatasattamaḥ
arjunapramukhairguptāṃ lokapālopamairnaraiḥ
- 2
योगो योग इति प्रीत्या ततः शब्दो महान् अभूत्
क्रोशतां सादिनां तत्र युज्यतां युज्यताम् इति
yogo yoga iti prītyā tataḥ śabdo mahān abhūt
krośatāṃ sādināṃ tatra yujyatāṃ yujyatām iti
- 3
केचिद्यानैर्नरा जग्मुः केचिद् अश्वैर्मनोजवैः
रथैश्च नगराकारैः प्रदीप्तज्वलनोपमैः
kecidyānairnarā jagmuḥ kecid aśvairmanojavaiḥ
rathaiśca nagarākāraiḥ pradīptajvalanopamaiḥ
- 4
गजेन्द्रैश्च तथैवान्ये केचिद् उष्ट्रैर्नराधिप
पदातिनस्तथैवान्ये नखरप्रासयोधिनः
gajendraiśca tathaivānye kecid uṣṭrairnarādhipa
padātinastathaivānye nakharaprāsayodhinaḥ
- 5
पौरजानपदाश्चैव यानैर्बहुविधैस्तथा
अन्वयुः कुरुराजानं धृतराष्ट्रदिदृक्षया
paurajānapadāścaiva yānairbahuvidhaistathā
anvayuḥ kururājānaṃ dhṛtarāṣṭradidṛkṣayā
- 6
स चापि राजवचनाद् आचार्यो गौतमः कृपः
सेनाम् आदाय सेनानी प्रययावाश्रमं प्रति
sa cāpi rājavacanād ācāryo gautamaḥ kṛpaḥ
senām ādāya senānī prayayāvāśramaṃ prati
- 7
ततो द्विजैर्वृतः श्रीमान्कुरुराजो युधिष्ठिरः
संस्तूयमानो बहुभिः सूतमागधबन्दिभिः
tato dvijairvṛtaḥ śrīmānkururājo yudhiṣṭhiraḥ
saṃstūyamāno bahubhiḥ sūtamāgadhabandibhiḥ
- 8
पाण्डुरेणातपत्रेण ध्रियमाणेन मूर्धनि
रथानीकेन महता निर्ययौ कुरुनन्दनः
pāṇḍureṇātapatreṇa dhriyamāṇena mūrdhani
rathānīkena mahatā niryayau kurunandanaḥ
- 9
गजैश्चाचलसंकाशैर्भीमकर्मा वृकोदरः
सज्जयन्त्रायुधोपेतैः प्रययौ मारुतात्मजः
gajaiścācalasaṃkāśairbhīmakarmā vṛkodaraḥ
sajjayantrāyudhopetaiḥ prayayau mārutātmajaḥ
- 10
माद्रीपुत्रावपि तथा हयारोहैः सुसंवृतौ
जग्मतुः प्रीतिजननौ संनद्धकवचध्वजौ
mādrīputrāvapi tathā hayārohaiḥ susaṃvṛtau
jagmatuḥ prītijananau saṃnaddhakavacadhvajau
- 11
अर्जुनश्च महातेजा रथेनादित्यवर्चसा
वशी श्वेतैर्हयैर्दिव्यैर्युक्तेनान्वगमन्नृपम्
arjunaśca mahātejā rathenādityavarcasā
vaśī śvetairhayairdivyairyuktenānvagamannṛpam
- 12
द्रौपदीप्रमुखाश्चापि स्त्रीसंघाः शिबिकागताः
स्त्र्यध्यक्षयुक्ताः प्रययुर्विसृजन्तो ऽमितं वसु
draupadīpramukhāścāpi strīsaṃghāḥ śibikāgatāḥ
stryadhyakṣayuktāḥ prayayurvisṛjanto 'mitaṃ vasu
- 13
समृद्धनरनागाश्वं वेणुवीणानिनादितम्
शुशुभे पाण्डवं सैन्यं तत्तदा भरतर्षभ
samṛddhanaranāgāśvaṃ veṇuvīṇānināditam
śuśubhe pāṇḍavaṃ sainyaṃ tattadā bharatarṣabha
- 14
नदीतीरेषु रम्येषु सरत्सु च विशां पते
वासान्कृत्वा क्रमेणाथ जग्मुस्ते कुरुपुंगवाः
nadītīreṣu ramyeṣu saratsu ca viśāṃ pate
vāsānkṛtvā krameṇātha jagmuste kurupuṃgavāḥ
- 15
युयुत्सुश्च महातेजा धौम्यश्चैव पुरोहितः
युधिष्ठिरस्य वचनात्पुरगुप्तिं प्रचक्रतुः
yuyutsuśca mahātejā dhaumyaścaiva purohitaḥ
yudhiṣṭhirasya vacanātpuraguptiṃ pracakratuḥ
- 16
ततो युधिष्ठिरो राजा कुरुक्षेत्रम् अवातरत्
क्रमेणोत्तीर्य यमुनां नदीं परमपावनीम्
tato yudhiṣṭhiro rājā kurukṣetram avātarat
krameṇottīrya yamunāṃ nadīṃ paramapāvanīm
- 17
स ददर्शाश्रमं दूराद्राजर्षेस्तस्य धीमतः
शतयूपस्य कौरव्य धृतराष्ट्रस्य चैव ह
sa dadarśāśramaṃ dūrādrājarṣestasya dhīmataḥ
śatayūpasya kauravya dhṛtarāṣṭrasya caiva ha
- 18
ततः प्रमुदितः सर्वो जनस्तद्वनम् अञ्जसा
विवेश सुमहानादैर् आपूर्य भरतर्षभ
tataḥ pramuditaḥ sarvo janastadvanam añjasā
viveśa sumahānādair āpūrya bharatarṣabha

