13 shlokas
- 1
वैशंपायन उवाच
एवं सम्पूजितो राजा पाण्डवैर् अम्बिकासुतः
विजहार यथापूर्वम् ऋषिभिः पर्युपासितः
vaiśaṃpāyana uvāca
evaṃ sampūjito rājā pāṇḍavair ambikāsutaḥ
vijahāra yathāpūrvam ṛṣibhiḥ paryupāsitaḥ
- 2
ब्रह्मदेयाग्रहारांश्च प्रददौ स कुरूद्वहः
तच्च कुन्तीसुतो राजा सर्वम् एवान्वमोदत
brahmadeyāgrahārāṃśca pradadau sa kurūdvahaḥ
tacca kuntīsuto rājā sarvam evānvamodata
- 3
आनृशंस्यपरो राजा प्रीयमाणो युधिष्ठिरः
उवाच स तदा भ्रातॄन् अमात्यांश्च महीपतिः
ānṛśaṃsyaparo rājā prīyamāṇo yudhiṣṭhiraḥ
uvāca sa tadā bhrātṝn amātyāṃśca mahīpatiḥ
- 4
मया चैव भवद्भिश्च मान्य एष नराधिपः
निदेशे धृतराष्ट्रस्य यः स्थास्यति स मे सुहृत्
विपरीतश्च मे शत्रुर्निरस्यश्च भवेन्नरः
mayā caiva bhavadbhiśca mānya eṣa narādhipaḥ
nideśe dhṛtarāṣṭrasya yaḥ sthāsyati sa me suhṛt
viparītaśca me śatrurnirasyaśca bhavennaraḥ
- 5
परिदृष्टेषु चाहःसु पुत्राणां श्राद्धकर्मणि
ददातु राजा सर्वेषां यावद् अस्य चिकीर्षितम्
paridṛṣṭeṣu cāhaḥsu putrāṇāṃ śrāddhakarmaṇi
dadātu rājā sarveṣāṃ yāvad asya cikīrṣitam
- 6
ततः स राजा कौरव्यो धृतराष्ट्रो महामनाः
ब्राह्मणेभ्यो महार्हेभ्यो ददौ वित्तान्यनेकशः
tataḥ sa rājā kauravyo dhṛtarāṣṭro mahāmanāḥ
brāhmaṇebhyo mahārhebhyo dadau vittānyanekaśaḥ
- 7
धर्मराजश्च भीमश्च सव्यसाची यमावपि
तत्सर्वम् अन्ववर्तन्त धृतराष्ट्रव्यपेक्षया
dharmarājaśca bhīmaśca savyasācī yamāvapi
tatsarvam anvavartanta dhṛtarāṣṭravyapekṣayā
- 8
कथं नु राजा वृद्धः सन्पुत्रशोकसमाहतः
शोकम् अस्मत्कृतं प्राप्य न म्रियेतेति चिन्त्यते
kathaṃ nu rājā vṛddhaḥ sanputraśokasamāhataḥ
śokam asmatkṛtaṃ prāpya na mriyeteti cintyate
- 9
यावद्धि कुरुमुख्यस्य जीवत्पुत्रस्य वै सुखम्
बभूव तद् अवाप्नोतु भोगांश्चेति व्यवस्थिताः
yāvaddhi kurumukhyasya jīvatputrasya vai sukham
babhūva tad avāpnotu bhogāṃśceti vyavasthitāḥ
- 10
ततस्ते सहिताः सर्वे भ्रातरः पञ्च पाण्डवाः
तथाशीलाः समातस्थुर्धृतराष्ट्रस्य शासने
tataste sahitāḥ sarve bhrātaraḥ pañca pāṇḍavāḥ
tathāśīlāḥ samātasthurdhṛtarāṣṭrasya śāsane
- 11
धृतराष्ट्रश्च तान्वीरान्विनीतान्विनये स्थितान्
शिष्यवृत्तौ स्थितान्नित्यं गुरुवत्पर्यपश्यत
dhṛtarāṣṭraśca tānvīrānvinītānvinaye sthitān
śiṣyavṛttau sthitānnityaṃ guruvatparyapaśyata
- 12
गान्धारी चैव पुत्राणां विविधैः श्राद्धकर्मभिः
आनृण्यम् अगमत्कामान्विप्रेभ्यः प्रतिपाद्य वै
gāndhārī caiva putrāṇāṃ vividhaiḥ śrāddhakarmabhiḥ
ānṛṇyam agamatkāmānviprebhyaḥ pratipādya vai
- 13
एवं धर्मभृतां श्रेष्ठो धर्मराजो युधिष्ठिरः
भ्रातृभिः सहितो धीमान्पूजयामास तं नृपम्
evaṃ dharmabhṛtāṃ śreṣṭho dharmarājo yudhiṣṭhiraḥ
bhrātṛbhiḥ sahito dhīmānpūjayāmāsa taṃ nṛpam

