20 shlokas
- 1
वैशंपायन उवाच
ततस्ते पाण्डवा दूराद् अवतीर्य पदातयः
अभिजग्मुर्नरपतेर् आश्रमं विनयानताः
vaiśaṃpāyana uvāca
tataste pāṇḍavā dūrād avatīrya padātayaḥ
abhijagmurnarapater āśramaṃ vinayānatāḥ
- 2
स च पौरजनः सर्वो ये च राष्ट्रनिवासिनः
स्त्रियश्च कुरुमुख्यानां पद्भिर् एवान्वयुस्तदा
sa ca paurajanaḥ sarvo ye ca rāṣṭranivāsinaḥ
striyaśca kurumukhyānāṃ padbhir evānvayustadā
- 3
आश्रमं ते ततो जग्मुर्धृतराष्ट्रस्य पाण्डवाः
शून्यं मृगगणाकीर्णं कदलीवनशोभितम्
āśramaṃ te tato jagmurdhṛtarāṣṭrasya pāṇḍavāḥ
śūnyaṃ mṛgagaṇākīrṇaṃ kadalīvanaśobhitam
- 4
ततस्तत्र समाजग्मुस्तापसा विविधव्रताः
पाण्डवान् आगतान्द्रष्टुं कौतूहलसमन्विताः
tatastatra samājagmustāpasā vividhavratāḥ
pāṇḍavān āgatāndraṣṭuṃ kautūhalasamanvitāḥ
- 5
तान् अपृच्छत्ततो राजा क्वासौ कौरववंशभृत्
पिता ज्येष्ठो गतो ऽस्माकम् इति बाष्पपरिप्लुतः
tān apṛcchattato rājā kvāsau kauravavaṃśabhṛt
pitā jyeṣṭho gato 'smākam iti bāṣpapariplutaḥ
- 6
तम् ऊचुस्ते ततो वाक्यं यमुनाम् अवगाहितुम्
पुष्पाणाम् उदकुम्भस्य चार्थे गत इति प्रभो
tam ūcuste tato vākyaṃ yamunām avagāhitum
puṣpāṇām udakumbhasya cārthe gata iti prabho
- 7
तैर् आख्यातेन मार्गेण ततस्ते प्रययुस्तदा
ददृशुश्चाविदूरे तान्सर्वान् अथ पदातयः
tair ākhyātena mārgeṇa tataste prayayustadā
dadṛśuścāvidūre tānsarvān atha padātayaḥ
- 8
ततस्ते सत्वरा जग्मुः पितुर्दर्शनकाङ्क्षिणः
सहदेवस्तु वेगेन प्राधावद्येन सा पृथा
tataste satvarā jagmuḥ piturdarśanakāṅkṣiṇaḥ
sahadevastu vegena prādhāvadyena sā pṛthā
- 9
सस्वनं प्ररुदन्धीमान्मातुः पादावुपस्पृशन्
सा च बाष्पाविलमुखी प्रददर्श प्रियं सुतम्
sasvanaṃ prarudandhīmānmātuḥ pādāvupaspṛśan
sā ca bāṣpāvilamukhī pradadarśa priyaṃ sutam
- 10
बाहुभ्यां सम्परिष्वज्य समुन्नाम्य च पुत्रकम्
गान्धार्याः कथयामास सहदेवम् उपस्थितम्
bāhubhyāṃ sampariṣvajya samunnāmya ca putrakam
gāndhāryāḥ kathayāmāsa sahadevam upasthitam
- 11
अनन्तरं च राजानं भीमसेनम् अथार्जुनम्
नकुलं च पृथा दृष्ट्वा त्वरमाणोपचक्रमे
anantaraṃ ca rājānaṃ bhīmasenam athārjunam
nakulaṃ ca pṛthā dṛṣṭvā tvaramāṇopacakrame
- 12
सा ह्यग्रे ऽगच्छत तयोर्दंपत्योर्हतपुत्रयोः
कर्षन्ती तौ ततस्ते तां दृष्ट्वा संन्यपतन्भुवि
sā hyagre 'gacchata tayordaṃpatyorhataputrayoḥ
karṣantī tau tataste tāṃ dṛṣṭvā saṃnyapatanbhuvi
- 13
तान्राजा स्वरयोगेन स्पर्शेन च महामनाः
प्रत्यभिज्ञाय मेधावी समाश्वासयत प्रभुः
tānrājā svarayogena sparśena ca mahāmanāḥ
pratyabhijñāya medhāvī samāśvāsayata prabhuḥ
- 14
ततस्ते बाष्पम् उत्सृज्य गान्धारीसहितं नृपम्
उपतस्थुर्महात्मानो मातरं च यथाविधि
tataste bāṣpam utsṛjya gāndhārīsahitaṃ nṛpam
upatasthurmahātmāno mātaraṃ ca yathāvidhi
- 15
सर्वेषां तोयकलशाञ्जगृहुस्ते स्वयं तदा
पाण्डवा लब्धसंज्ञास्ते मात्रा चाश्वासिताः पुनः
sarveṣāṃ toyakalaśāñjagṛhuste svayaṃ tadā
pāṇḍavā labdhasaṃjñāste mātrā cāśvāsitāḥ punaḥ
- 16
ततो नार्यो नृसिंहानां स च योधजनस्तदा
पौरजानपदाश्चैव ददृशुस्तं नराधिपम्
tato nāryo nṛsiṃhānāṃ sa ca yodhajanastadā
paurajānapadāścaiva dadṛśustaṃ narādhipam
- 17
निवेदयामास तदा जनं तं नामगोत्रतः
युधिष्ठिरो नरपतिः स चैनान्प्रत्यपूजयत्
nivedayāmāsa tadā janaṃ taṃ nāmagotrataḥ
yudhiṣṭhiro narapatiḥ sa cainānpratyapūjayat
- 18
स तैः परिवृतो मेने हर्षबाष्पाविलेक्षणः
राजात्मानं गृहगतं पुरेव गजसाह्वये
sa taiḥ parivṛto mene harṣabāṣpāvilekṣaṇaḥ
rājātmānaṃ gṛhagataṃ pureva gajasāhvaye
- 19
अभिवादितो वधूभिश्च कृष्णाद्याभिः स पार्थिवः
गान्धार्या सहितो धीमान्कुन्त्या च प्रत्यनन्दत
abhivādito vadhūbhiśca kṛṣṇādyābhiḥ sa pārthivaḥ
gāndhāryā sahito dhīmānkuntyā ca pratyanandata
- 20
ततश्चाश्रमम् आगच्छत्सिद्धचारणसेवितम्
दिदृक्षुभिः समाकीर्णं नभस्तारागणैर् इव
tataścāśramam āgacchatsiddhacāraṇasevitam
didṛkṣubhiḥ samākīrṇaṃ nabhastārāgaṇair iva

