16 shlokas
- 1
मार्कण्डेय उवाच
षष्टिस्तीर्थसहस्राणि षष्टिस्तीर्थशतानि च
माघमासे गमिष्यन्ति गङ्गायमुनसंगमम्
mārkaṇḍeya uvāca
ṣaṣṭistīrthasahasrāṇi ṣaṣṭistīrthaśatāni ca
māghamāse gamiṣyanti gaṅgāyamunasaṃgamam
- 2
गवां शतसहस्रस्य सम्यग्दत्तस्य यत्फलम्
प्रयागे माघमासे तु त्र्यहं स्नातस्य तत्फलम्
gavāṃ śatasahasrasya samyagdattasya yatphalam
prayāge māghamāse tu tryahaṃ snātasya tatphalam
- 3
गङ्गायमुनयोर्मध्ये कार्षाग्निं यस्तु साधयेत्
अहीनाङ्गो ऽप्यरोगश्च पञ्चेन्द्रियसमन्वितः
gaṅgāyamunayormadhye kārṣāgniṃ yastu sādhayet
ahīnāṅgo 'pyarogaśca pañcendriyasamanvitaḥ
- 4
यावन्ति रोमकूपाणि तस्य गात्रेषु मानद
तावद्वर्षसहस्राणि स्वर्गलोके महीयते
yāvanti romakūpāṇi tasya gātreṣu mānada
tāvadvarṣasahasrāṇi svargaloke mahīyate
- 5
ततः स्वर्गात्परिभ्रष्टो जम्बूद्वीपपतिर्भवेत्
स भुक्त्वा विपुलान्भोगांस्तत्तीर्थं भजते पुनः
tataḥ svargātparibhraṣṭo jambūdvīpapatirbhavet
sa bhuktvā vipulānbhogāṃstattīrthaṃ bhajate punaḥ
- 6
जलप्रवेशं यः कुर्यात्संगमे लोकविश्रुते
राहुग्रस्तो यथा सोमो विमुक्तः सर्वपातकैः
jalapraveśaṃ yaḥ kuryātsaṃgame lokaviśrute
rāhugrasto yathā somo vimuktaḥ sarvapātakaiḥ
- 7
सोमलोकमवाप्नोति सोमेन सह मोदते
षष्टिं वर्षसहस्राणि षष्टिं वर्षशतानि च
somalokamavāpnoti somena saha modate
ṣaṣṭiṃ varṣasahasrāṇi ṣaṣṭiṃ varṣaśatāni ca
- 8
स्वर्गतः शक्रलोके ऽसौ मुनिगन्धर्वसेवितः
ततो भ्रष्टस्तु राजेन्द्र समृद्धे जायते कुले
svargataḥ śakraloke 'sau munigandharvasevitaḥ
tato bhraṣṭastu rājendra samṛddhe jāyate kule
- 9
अधःशिरास्त्वयोधाराम् ऊर्ध्वपादः पिबेन्नरः
शतं वर्षसहस्राणि स्वर्गलोके महीयते
adhaḥśirāstvayodhārām ūrdhvapādaḥ pibennaraḥ
śataṃ varṣasahasrāṇi svargaloke mahīyate
- 10
तस्माद्भ्रष्टस्तु राजेन्द्र अग्निहोत्री भवेन्नरः
भुक्त्वा तु विपुलान्भोगांस्तत्तीर्थं भजते पुनः
tasmādbhraṣṭastu rājendra agnihotrī bhavennaraḥ
bhuktvā tu vipulānbhogāṃstattīrthaṃ bhajate punaḥ
- 11
यः स्वदेहं विकर्तेद्वा शकुनिभ्यः प्रयच्छति
विहगैरुपभुक्तस्य शृणु तस्यापि यत्फलम्
yaḥ svadehaṃ vikartedvā śakunibhyaḥ prayacchati
vihagairupabhuktasya śṛṇu tasyāpi yatphalam
- 12
शतं वर्षसहस्राणि सोमलोके महीयते
ततस्तस्मात्परिभ्रष्टो राजा भवति धार्मिकः
śataṃ varṣasahasrāṇi somaloke mahīyate
tatastasmātparibhraṣṭo rājā bhavati dhārmikaḥ
- 13
गुणवान्रूपसम्पन्नो विद्वान्सुप्रियवाक्यवान्
भुक्त्वा तु विपुलान्भोगांस्तत्तीर्थं भजते पुनः
guṇavānrūpasampanno vidvānsupriyavākyavān
bhuktvā tu vipulānbhogāṃstattīrthaṃ bhajate punaḥ
- 14
उत्तरे यमुनातीरे प्रयागस्य तु दक्षिणे
ऋणप्रमोचनं नाम तीर्थं तु परमं स्मृतम्
uttare yamunātīre prayāgasya tu dakṣiṇe
ṛṇapramocanaṃ nāma tīrthaṃ tu paramaṃ smṛtam
- 15
एकरात्रोषितः स्नात्वा ऋणैस्तत्र प्रमुच्यते
सूर्यलोकमवाप्नोति अनृणश्च सदा भवेत्
ekarātroṣitaḥ snātvā ṛṇaistatra pramucyate
sūryalokamavāpnoti anṛṇaśca sadā bhavet
- 16
इति श्रीकूर्मपुराणे षट्साहस्र्यां संहितायां पूर्वविभागे षट्त्रिंशो ऽध्यायः
iti śrīkūrmapurāṇe ṣaṭsāhasryāṃ saṃhitāyāṃ pūrvavibhāge ṣaṭtriṃśo 'dhyāyaḥ

