28 shlokas
- 1
सूत उवाच
एतानुत्पाद्य पुत्रांस्तु प्रजासंतानकारणात्
कश्यपो गोत्रकामस्तु चचार सुमहत्तपः
sūta uvāca
etānutpādya putrāṃstu prajāsaṃtānakāraṇāt
kaśyapo gotrakāmastu cacāra sumahattapaḥ
- 2
तस्य वै तपतो ऽत्यर्थं प्रादुर्भूतौ सुताविमौ
वत्सरश्चासितश्चैव तावुभौ ब्रह्मवादिनौ
tasya vai tapato 'tyarthaṃ prādurbhūtau sutāvimau
vatsaraścāsitaścaiva tāvubhau brahmavādinau
- 3
वत्सरान्नैध्रुवो जज्ञे रैभ्यश्च सुमहायशाः
रैभ्यस्य जज्ञिरे रैभ्याः पुत्रा द्युतिमतां वराः
vatsarānnaidhruvo jajñe raibhyaśca sumahāyaśāḥ
raibhyasya jajñire raibhyāḥ putrā dyutimatāṃ varāḥ
- 4
च्यवनस्य सुता पत्नी नैध्रुवस्य महात्मनः
सुमेधा जनयामास पुत्रान्वै कुण्डपायिनः
cyavanasya sutā patnī naidhruvasya mahātmanaḥ
sumedhā janayāmāsa putrānvai kuṇḍapāyinaḥ
- 5
असितस्यैकपर्णायां ब्रह्मिष्ठः समपद्यत
नाम्ना वै देवलः पुत्रो योगाचार्यो महातपाः
asitasyaikaparṇāyāṃ brahmiṣṭhaḥ samapadyata
nāmnā vai devalaḥ putro yogācāryo mahātapāḥ
- 6
शाण्डिल्यानां परः श्रीमान्सर्वतत्त्वार्थवित्सुधीः
प्रसादात्पार्वतीशस्य योगमुत्तममाप्तवान्
śāṇḍilyānāṃ paraḥ śrīmānsarvatattvārthavitsudhīḥ
prasādātpārvatīśasya yogamuttamamāptavān
- 7
शाण्डिल्या नैध्रुवा रैभ्यास्त्रयः पक्षास्तु काश्यपाः
नरप्रकृतयो विप्राः पुलस्त्यस्य वदामि वः
śāṇḍilyā naidhruvā raibhyāstrayaḥ pakṣāstu kāśyapāḥ
naraprakṛtayo viprāḥ pulastyasya vadāmi vaḥ
- 8
तृणबिन्दोः सुता विप्रा नाम्ना त्विलविला स्मृता
पुलस्त्याय स राजर्षिस्तां कन्यां प्रत्यपादयत्
tṛṇabindoḥ sutā viprā nāmnā tvilavilā smṛtā
pulastyāya sa rājarṣistāṃ kanyāṃ pratyapādayat
- 9
ऋषिस्त्वैलविलिस्तस्यां विश्रवाः समपद्यत
तस्य पत्न्यश्चतस्रस्तु पौलस्त्यकुलवर्धिकाः
ṛṣistvailavilistasyāṃ viśravāḥ samapadyata
tasya patnyaścatasrastu paulastyakulavardhikāḥ
- 10
पुष्पोत्कटा च राका च कैकसी देववर्णिनी
रूपलावण्यसम्पन्नास्तासां वै शृणुत प्रजाः
puṣpotkaṭā ca rākā ca kaikasī devavarṇinī
rūpalāvaṇyasampannāstāsāṃ vai śṛṇuta prajāḥ
- 11
ज्येष्ठं वैश्रवणं तस्य सुषुवे देवरूपिणी
कैकसी जनयत्पुत्रं रावणं राक्षसाधिपम्
jyeṣṭhaṃ vaiśravaṇaṃ tasya suṣuve devarūpiṇī
kaikasī janayatputraṃ rāvaṇaṃ rākṣasādhipam
- 12
कुम्भकर्णं शूर्पणखां तथैव च विभीषणम्
पुष्पोत्कटा व्यजनयत्पुत्रान्विश्रवसः शुभान्
kumbhakarṇaṃ śūrpaṇakhāṃ tathaiva ca vibhīṣaṇam
puṣpotkaṭā vyajanayatputrānviśravasaḥ śubhān
- 13
महोदरं प्रहस्तं च महापार्श्वं खरं तथा
कुम्भीनसीं तथा कन्यां राकायां शृणुत प्रजाः
mahodaraṃ prahastaṃ ca mahāpārśvaṃ kharaṃ tathā
kumbhīnasīṃ tathā kanyāṃ rākāyāṃ śṛṇuta prajāḥ
- 14
त्रिशिरा दूषणश्चैव विद्युज्जिह्वो महाबलः
इत्येते क्रूरकर्माणः पौलस्त्या राक्षसा दश
सर्वे तपोबलोत्कृष्टा रुद्रभक्ताः सुभीषणाः
triśirā dūṣaṇaścaiva vidyujjihvo mahābalaḥ
ityete krūrakarmāṇaḥ paulastyā rākṣasā daśa
sarve tapobalotkṛṣṭā rudrabhaktāḥ subhīṣaṇāḥ
- 15
पुलहस्य मृगाः पुत्राः सर्वे व्यालाश्च दंष्ट्रिणः
भूताः पिशाचाः सर्पाश्च शूकरा हस्तिनस्तथा
pulahasya mṛgāḥ putrāḥ sarve vyālāśca daṃṣṭriṇaḥ
bhūtāḥ piśācāḥ sarpāśca śūkarā hastinastathā
- 16
अनपत्यः क्रतुस्तस्मिन्स्मृतो वैवस्वते ऽन्तरे
मरीचेः कश्यपः पुत्रः स्वयमेव प्रजापतिः
anapatyaḥ kratustasminsmṛto vaivasvate 'ntare
marīceḥ kaśyapaḥ putraḥ svayameva prajāpatiḥ
- 17
भृगोरप्यभवच्छुक्रो दैत्याचार्यो महातपाः
स्वाध्याययोगनिरतो हरभक्तो महाद्युतिः
bhṛgorapyabhavacchukro daityācāryo mahātapāḥ
svādhyāyayoganirato harabhakto mahādyutiḥ
- 18
अत्रेः पत्न्यो ऽभवन्बह्व्यः सोदर्यास्ताः पतिव्रताः
कृशाश्वस्य तु विप्रेन्द्रा घृताच्यामिति मे श्रुतम्
atreḥ patnyo 'bhavanbahvyaḥ sodaryāstāḥ pativratāḥ
kṛśāśvasya tu viprendrā ghṛtācyāmiti me śrutam
- 19
स तासु जनयामास स्वस्त्यात्रेयान्महौजसः
वेदवेदाङ्गनिरतांस्तपसा हतकिल्बिषान्
sa tāsu janayāmāsa svastyātreyānmahaujasaḥ
vedavedāṅganiratāṃstapasā hatakilbiṣān
- 20
नारदस्तु वसिष्ठाय ददौ देवीमरुन्धतीम्
ऊर्ध्वरेतास्तत्र मुनिः शापाद्दक्षस्य नारदः
nāradastu vasiṣṭhāya dadau devīmarundhatīm
ūrdhvaretāstatra muniḥ śāpāddakṣasya nāradaḥ
- 21
हर्यश्वेषु तु नष्टेषु मायया नारदस्य तु
शशाप नारदं दक्षः क्रोधसंरक्तलोचनः
haryaśveṣu tu naṣṭeṣu māyayā nāradasya tu
śaśāpa nāradaṃ dakṣaḥ krodhasaṃraktalocanaḥ
- 22
यस्मान्मम सुताः सर्वे भवतो मायया द्विज
क्षयं नीतास्त्वशेषेण निरपत्यो भविष्यति
yasmānmama sutāḥ sarve bhavato māyayā dvija
kṣayaṃ nītāstvaśeṣeṇa nirapatyo bhaviṣyati
- 23
अरुन्धत्यां वसिष्ठस्तु शक्तिमुत्पादयत्सुतम्
शक्तेः पराशरः श्रीमान्सर्वज्ञस्तपतां वरः
arundhatyāṃ vasiṣṭhastu śaktimutpādayatsutam
śakteḥ parāśaraḥ śrīmānsarvajñastapatāṃ varaḥ
- 24
आराध्य देवदेवेशमीशानं त्रिपुरान्तकम्
लेभे त्वप्रतिमं पुत्रं कृष्णद्वैपायनं प्रभुम्
ārādhya devadeveśamīśānaṃ tripurāntakam
lebhe tvapratimaṃ putraṃ kṛṣṇadvaipāyanaṃ prabhum
- 25
द्वैपायनाच्छुको जज्ञे भगवानेव शङ्करः
अंशांशेनावतीर्योर्व्यां स्वं प्राप परमं पदम्
dvaipāyanācchuko jajñe bhagavāneva śaṅkaraḥ
aṃśāṃśenāvatīryorvyāṃ svaṃ prāpa paramaṃ padam
- 26
शुकस्याप्यभवन्पुत्राः पञ्चात्यन्ततपस्विनः
भूरिश्रवाः प्रभुः शंभुः कृष्णो गौरश्च पञ्चमः
कन्या कीर्तिमती चैव योगमाता धृतव्रता
śukasyāpyabhavanputrāḥ pañcātyantatapasvinaḥ
bhūriśravāḥ prabhuḥ śaṃbhuḥ kṛṣṇo gauraśca pañcamaḥ
kanyā kīrtimatī caiva yogamātā dhṛtavratā
- 27
एते ऽत्र वंश्याः कथिता ब्राह्मणा ब्रह्मवादिनाम्
अत ऊर्ध्वं निबोधध्वं कश्यपाद्राजसंततिम्
ete 'tra vaṃśyāḥ kathitā brāhmaṇā brahmavādinām
ata ūrdhvaṃ nibodhadhvaṃ kaśyapādrājasaṃtatim
- 28
इति श्रीकूर्मपुराणे षट्साहस्र्यां संहितायां पूर्वविभागे अष्टादशो ऽध्यायः
iti śrīkūrmapurāṇe ṣaṭsāhasryāṃ saṃhitāyāṃ pūrvavibhāge aṣṭādaśo 'dhyāyaḥ

