79 shlokas
- 1
रोमहर्षण उवाच
ऐलः पुरूरवाश्चाथ राजा राज्यमपालयत्
तस्य पुत्रा बभूवुर्हि षडिन्द्रसमतेजसः
romaharṣaṇa uvāca
ailaḥ purūravāścātha rājā rājyamapālayat
tasya putrā babhūvurhi ṣaḍindrasamatejasaḥ
- 2
आयुर्मायुर् अमावायुर्विश्वायुश्चैव वीर्यवान्
शतायुश्च श्रुतायुश्च दिव्याश्चैवोर्वशीसुताः
āyurmāyur amāvāyurviśvāyuścaiva vīryavān
śatāyuśca śrutāyuśca divyāścaivorvaśīsutāḥ
- 3
आयुषस्तनया वीराः पञ्चैवासन्महौजसः
स्वर्भानुतनयायां वै प्रभायामिति नः श्रुतम्
āyuṣastanayā vīrāḥ pañcaivāsanmahaujasaḥ
svarbhānutanayāyāṃ vai prabhāyāmiti naḥ śrutam
- 4
नहुषः प्रथमस्तेषां धर्मज्ञो लोकविश्रुतः
नहुषस्य तु दायादाः षडिन्द्रोपमतेजसः
nahuṣaḥ prathamasteṣāṃ dharmajño lokaviśrutaḥ
nahuṣasya tu dāyādāḥ ṣaḍindropamatejasaḥ
- 5
उत्पन्नाः पितृकन्यायां विरजायां महाबलाः
यतिर्ययातिः संयातिरायातिः पञ्चको ऽश्वकः
utpannāḥ pitṛkanyāyāṃ virajāyāṃ mahābalāḥ
yatiryayātiḥ saṃyātirāyātiḥ pañcako 'śvakaḥ
- 6
तेषां ययातिः पञ्चानां महाबलपराक्रमः
देवयानीम् उशनसः सुतां भार्यामवाप सः
शर्मिष्ठामासुरीं चैव तनयां वृषपर्वणः
teṣāṃ yayātiḥ pañcānāṃ mahābalaparākramaḥ
devayānīm uśanasaḥ sutāṃ bhāryāmavāpa saḥ
śarmiṣṭhāmāsurīṃ caiva tanayāṃ vṛṣaparvaṇaḥ
- 7
यदुं च तुर्वसुं चैव देवयानी व्यजायत
द्रुह्युं चानुं च पूरुं च शर्मिष्ठा चाप्यजीजनत्
yaduṃ ca turvasuṃ caiva devayānī vyajāyata
druhyuṃ cānuṃ ca pūruṃ ca śarmiṣṭhā cāpyajījanat
- 8
सो ऽभ्यषिञ्चदतिक्रम्य ज्येष्ठं यदुम् अनिन्दितम्
पूरुमेव कनीयांसं पितुर्वचनपालकम्
so 'bhyaṣiñcadatikramya jyeṣṭhaṃ yadum aninditam
pūrumeva kanīyāṃsaṃ piturvacanapālakam
- 9
दिशि दक्षिणपूर्वस्यां तुर्वसुं पुत्रमादिशत्
दक्षिणापरयो राजा यदुं ज्येष्ठं न्ययोजयत्
प्रतीच्यामुत्तरायां च द्रुह्युं चानुमकल्पयत्
diśi dakṣiṇapūrvasyāṃ turvasuṃ putramādiśat
dakṣiṇāparayo rājā yaduṃ jyeṣṭhaṃ nyayojayat
pratīcyāmuttarāyāṃ ca druhyuṃ cānumakalpayat
- 10
तैरियं पृथिवी सर्वा धर्मतः परिपालिता
राजापि दारसहितो वनं प्राप महायशाः
tairiyaṃ pṛthivī sarvā dharmataḥ paripālitā
rājāpi dārasahito vanaṃ prāpa mahāyaśāḥ
- 11
यदोरप्यभवन्पुत्राः पञ्च देवसुतोपमाः
सहस्रजित्तथा ज्येष्ठः क्रोष्टुर्नीलो ऽजितो रघुः
yadorapyabhavanputrāḥ pañca devasutopamāḥ
sahasrajittathā jyeṣṭhaḥ kroṣṭurnīlo 'jito raghuḥ
- 12
सहस्रजित्सुतस्तद्वच्छतजिन्नाम पार्थिवः
सुताः शतजितो ऽप्यासंस्त्रयः परमधार्मिकाः
sahasrajitsutastadvacchatajinnāma pārthivaḥ
sutāḥ śatajito 'pyāsaṃstrayaḥ paramadhārmikāḥ
- 13
हैहयश्च हयश्चैव राजा वेणुहयः परः
हैहयस्याभवत्पुत्रो धर्म इत्यभिविश्रुतः
haihayaśca hayaścaiva rājā veṇuhayaḥ paraḥ
haihayasyābhavatputro dharma ityabhiviśrutaḥ
- 14
तस्य पुत्रो ऽभवद्विप्रा धर्मनेत्रः प्रतापवान्
धर्मनेत्रस्य कीर्तिस्तु संजितस्तत्सुतो ऽभवत्
tasya putro 'bhavadviprā dharmanetraḥ pratāpavān
dharmanetrasya kīrtistu saṃjitastatsuto 'bhavat
- 15
महिष्मान्संजितस्याभूद्भद्रश्रेण्यस्तदन्वयः
भद्रश्रेण्यस्य दायादो दुर्दमो नाम पार्थिवः
mahiṣmānsaṃjitasyābhūdbhadraśreṇyastadanvayaḥ
bhadraśreṇyasya dāyādo durdamo nāma pārthivaḥ
- 16
दुर्दमस्य सुतो धीमान्धनको नाम वीर्यवान्
धनकस्य तु दायादाश्चत्वारो लोकसंमताः
durdamasya suto dhīmāndhanako nāma vīryavān
dhanakasya tu dāyādāścatvāro lokasaṃmatāḥ
- 17
कृतवीर्यः कृताग्निश्च कृतवर्मा तथैव च
कृतौजाश्च चतुर्थो ऽभूत्कार्तवीर्यो ऽर्जुनो ऽभवत्
kṛtavīryaḥ kṛtāgniśca kṛtavarmā tathaiva ca
kṛtaujāśca caturtho 'bhūtkārtavīryo 'rjuno 'bhavat
- 18
सहस्रबाहुर्द्युतिमान्धनुर्वेदविदां वरः
तस्य रामो ऽभवन्मृत्युर्जामदग्न्यो जनार्दनः
sahasrabāhurdyutimāndhanurvedavidāṃ varaḥ
tasya rāmo 'bhavanmṛtyurjāmadagnyo janārdanaḥ
- 19
तस्य पुत्रशतान्यासन्पञ्च तत्र महारथाः
कृतास्त्रा बलिनः शूरा धर्मात्मानो नमस्विनः
tasya putraśatānyāsanpañca tatra mahārathāḥ
kṛtāstrā balinaḥ śūrā dharmātmāno namasvinaḥ
- 20
शूरश्च शूरसेनश्च धृष्णः कृष्णस्तथैव च
जयध्वजश्च बलवान्नारायणपरो नृपः
śūraśca śūrasenaśca dhṛṣṇaḥ kṛṣṇastathaiva ca
jayadhvajaśca balavānnārāyaṇaparo nṛpaḥ
- 21
शूरसेनादयः सर्वे चत्वारः प्रथितौजसः
रुद्रभक्ता महात्मानः पूजयन्ति स्म शङ्करम्
śūrasenādayaḥ sarve catvāraḥ prathitaujasaḥ
rudrabhaktā mahātmānaḥ pūjayanti sma śaṅkaram
- 22
जयध्वजस्तु मतिमान्देवं नारायणं हरिम्
जगाम शरणं विष्णुं दैवतं धर्मतत्परः
jayadhvajastu matimāndevaṃ nārāyaṇaṃ harim
jagāma śaraṇaṃ viṣṇuṃ daivataṃ dharmatatparaḥ
- 23
तमूचुरितरे पुत्रा नायं धर्मस्तवानघ
ईश्वराराधनरतः पितास्माकमभूदिति
tamūcuritare putrā nāyaṃ dharmastavānagha
īśvarārādhanarataḥ pitāsmākamabhūditi
- 24
तानब्रवीन्महातेजा एष धर्मः परो मम
विष्णोरंशेन सम्भूता राजानो यन्महीतले
tānabravīnmahātejā eṣa dharmaḥ paro mama
viṣṇoraṃśena sambhūtā rājāno yanmahītale
- 25
राज्यं पालयतावश्यं भगवान्पुरुषोत्तमः
पूजनीयो यतो विष्णुः पालको जगतो हरिः
rājyaṃ pālayatāvaśyaṃ bhagavānpuruṣottamaḥ
pūjanīyo yato viṣṇuḥ pālako jagato hariḥ
- 26
सात्त्विकी राजसी चैव तामसी च स्वयंभुवः
तिस्रस्तु मूर्तयः प्रोक्ताः सृष्टिस्थित्यन्तहेतवः
sāttvikī rājasī caiva tāmasī ca svayaṃbhuvaḥ
tisrastu mūrtayaḥ proktāḥ sṛṣṭisthityantahetavaḥ
- 27
सत्त्वात्मा भगवान्विष्णुः संस्थापयति सर्वदा
सृजेद्ब्रह्मा रजोमूर्तिः संहरेत्तामसो हरः
sattvātmā bhagavānviṣṇuḥ saṃsthāpayati sarvadā
sṛjedbrahmā rajomūrtiḥ saṃharettāmaso haraḥ
- 28
तस्मान्महीपतीनां तु राज्यं पालयतामयम्
आराध्यो भगवान्विष्णुः केशवः केशिमर्दनः
tasmānmahīpatīnāṃ tu rājyaṃ pālayatāmayam
ārādhyo bhagavānviṣṇuḥ keśavaḥ keśimardanaḥ
- 29
निशम्य तस्य वचनं भ्रातरो ऽन्ये मनस्विनः
प्रोचुः संहारकृद्रुद्रः पूजनीयो मुमुक्षुभिः
niśamya tasya vacanaṃ bhrātaro 'nye manasvinaḥ
procuḥ saṃhārakṛdrudraḥ pūjanīyo mumukṣubhiḥ
- 30
अयं हि भगवान्रुद्रः सर्वं जगदिदं शिवः
तमोगुणं समाश्रित्य कल्पान्ते संहरेत्प्रभुः
ayaṃ hi bhagavānrudraḥ sarvaṃ jagadidaṃ śivaḥ
tamoguṇaṃ samāśritya kalpānte saṃharetprabhuḥ

