14 shlokas
- 1
अब्राह्मणे दत्तं तत्समम् एव पारलौकिकम्
abrāhmaṇe dattaṃ tatsamam eva pāralaukikam
- 2
द्विगुणं ब्राह्मणब्रुवे
dviguṇaṃ brāhmaṇabruve
- 3
सहस्रगुणं प्राधीते
sahasraguṇaṃ prādhīte
- 4
अनन्तं वेदपारगे
anantaṃ vedapārage
- 5
पुरोहितस्त्व् आत्मन एव पात्रम्
purohitastv ātmana eva pātram
- 6
स्वसा दुहितृजामातरश्च
svasā duhitṛjāmātaraśca
- 7
न वार्यपि प्रयच्छेत बैडालव्रतिके द्विजे
न बकव्रतिके पापे नावेदविदि धर्मवित्
na vāryapi prayaccheta baiḍālavratike dvije
na bakavratike pāpe nāvedavidi dharmavit
- 8
धर्मध्वजी सदा लुब्धश्छाद्मिको लोकदाम्भिकः
बैडालव्रतिको ज्ञेयो हिंस्रः सर्वाभिसंधकः
dharmadhvajī sadā lubdhaśchādmiko lokadāmbhikaḥ
baiḍālavratiko jñeyo hiṃsraḥ sarvābhisaṃdhakaḥ
- 9
अधोदृष्टिर्नैकृतिकः स्वार्थसाधनतत्परः
शठो मिथ्याविनीतश्च बकव्रतपरो द्विजः
adhodṛṣṭirnaikṛtikaḥ svārthasādhanatatparaḥ
śaṭho mithyāvinītaśca bakavrataparo dvijaḥ
- 10
ये बकव्रतिनो लोके ये च मार्जारलिङ्गिनः
ते पतन्त्यन्धतामिस्रे तेन पापेन कर्मणा
ye bakavratino loke ye ca mārjāraliṅginaḥ
te patantyandhatāmisre tena pāpena karmaṇā
- 11
न धर्मस्यापदेशेन पापं कृत्वा व्रतं चरेत्
व्रतेन पापं प्रच्छाद्य कुर्वन्स्त्रीशूद्रदम्भनम्
na dharmasyāpadeśena pāpaṃ kṛtvā vrataṃ caret
vratena pāpaṃ pracchādya kurvanstrīśūdradambhanam
- 12
प्रेत्येह चेदृशो विप्रो गर्ह्यते ब्रह्मवादिभिः
छद्मनाचरितं यच्च व्रतं रक्षांसि गच्छति
pretyeha cedṛśo vipro garhyate brahmavādibhiḥ
chadmanācaritaṃ yacca vrataṃ rakṣāṃsi gacchati
- 13
अलिङ्गी लिङ्गिवेषेण यो वृत्तिम् उपजीवति
स लिङ्गिनां हरत्येनस्तिर्यग्योनौ प्रजायते
aliṅgī liṅgiveṣeṇa yo vṛttim upajīvati
sa liṅgināṃ haratyenastiryagyonau prajāyate
- 14
न दानं यशसे दद्यान्न भयान्नोपकारिणे
न नृत्यगीतशीलेभ्यो धर्मार्थम् इति निश्चितम्
na dānaṃ yaśase dadyānna bhayānnopakāriṇe
na nṛtyagītaśīlebhyo dharmārtham iti niścitam

