23 shlokas
- 1
पिता चेत्पुत्रान्विभजेत्तस्य स्वेच्छा स्वयम् उपार्जिते ऽर्थे
pitā cetputrānvibhajettasya svecchā svayam upārjite 'rthe
- 2
पैतामहे त्वर्थे पितृपुत्रयोस्तुल्यं स्वामित्वम्
paitāmahe tvarthe pitṛputrayostulyaṃ svāmitvam
- 3
पितृविभक्ता विभागानन्तरोत्पन्नस्य भागं दद्युः
pitṛvibhaktā vibhāgānantarotpannasya bhāgaṃ dadyuḥ
- 4
अपुत्रधनं पत्न्यभिगामि
aputradhanaṃ patnyabhigāmi
- 5
तदभावे दुहितृगामि
tadabhāve duhitṛgāmi
- 6
तदभावे पितृगामि
tadabhāve pitṛgāmi
- 7
तदभावे मातृगामि
tadabhāve mātṛgāmi
- 8
तदभावे भ्रातृगामि
tadabhāve bhrātṛgāmi
- 9
तदभावे भ्रातृपुत्रगामि
tadabhāve bhrātṛputragāmi
- 10
तदभावे बन्धुगामि
tadabhāve bandhugāmi
- 11
तदभावे सकुल्यगामि
tadabhāve sakulyagāmi
- 12
तदभावे सहाध्यायिगामि
tadabhāve sahādhyāyigāmi
- 13
तदभावे ब्राह्मणधनवर्जं राजगामि
tadabhāve brāhmaṇadhanavarjaṃ rājagāmi
- 14
ब्राह्मणार्थो ब्राह्मणानाम्
brāhmaṇārtho brāhmaṇānām
- 15
वानप्रस्थधनम् आचार्यो गृह्णीयात्
vānaprasthadhanam ācāryo gṛhṇīyāt
- 16
शिष्यो वा
śiṣyo vā
- 17
संसृष्टिनस्तु संसृष्टी सोदरस्य तु सोदरः
दद्याद् अपहरेच्चांशं जातस्य च मृतस्य च
saṃsṛṣṭinastu saṃsṛṣṭī sodarasya tu sodaraḥ
dadyād apahareccāṃśaṃ jātasya ca mṛtasya ca
- 18
पितृमातृसुतभ्रातृदत्तम् अध्यग्न्युपागतम् आधिवेदनिकं बन्धुदत्तं शुल्कम् अन्वाधेयकम् इति स्त्रीधनम्
pitṛmātṛsutabhrātṛdattam adhyagnyupāgatam ādhivedanikaṃ bandhudattaṃ śulkam anvādheyakam iti strīdhanam
- 19
ब्राह्मादिषु चतुर्षु विवाहेष्वप्रजायाम् अतीतायां तद्भर्तुः
brāhmādiṣu caturṣu vivāheṣvaprajāyām atītāyāṃ tadbhartuḥ
- 20
शेषेषु च पिता हरेत्
śeṣeṣu ca pitā haret
- 21
सर्वेष्व् एव प्रसूतायां यद्धनं तत्दुहितृगामि
sarveṣv eva prasūtāyāṃ yaddhanaṃ tatduhitṛgāmi
- 22
पत्यौ जीवति यः स्त्रीभिर् अलंकारो धृतो भवेत्
न तं भजेरन्दायादा भजमानाः पतन्ति ते
patyau jīvati yaḥ strībhir alaṃkāro dhṛto bhavet
na taṃ bhajerandāyādā bhajamānāḥ patanti te
- 23
अनेकपितृकाणां तु पितृतो ऽंशप्रकल्पना
यस्य यत्पैतृकं रिक्थं स तद्गृह्णीत नेतरः
anekapitṛkāṇāṃ tu pitṛto 'ṃśaprakalpanā
yasya yatpaitṛkaṃ rikthaṃ sa tadgṛhṇīta netaraḥ

