16 shlokas
- 1
अथ त्याज्याः
atha tyājyāḥ
- 2
व्रात्याः
vrātyāḥ
- 3
पतिताः
patitāḥ
- 4
त्रिपुरुषं मातृतः पितृतश्चाशुद्धाः
tripuruṣaṃ mātṛtaḥ pitṛtaścāśuddhāḥ
- 5
सर्व एवाभोज्याश्चाप्रतिग्राह्याः
sarva evābhojyāścāpratigrāhyāḥ
- 6
अप्रतिग्राह्येभ्यश्च प्रतिग्रहप्रसङ्गं वर्जयेत्
apratigrāhyebhyaśca pratigrahaprasaṅgaṃ varjayet
- 7
प्रतिग्रहेण ब्राह्मणानां ब्राह्मं तेजः प्रणश्यति
pratigraheṇa brāhmaṇānāṃ brāhmaṃ tejaḥ praṇaśyati
- 8
द्रव्याणां वाविज्ञाय प्रतिग्रहविधिं यः प्रतिग्रहं कुर्यात्स दात्रा सह निमज्जति
dravyāṇāṃ vāvijñāya pratigrahavidhiṃ yaḥ pratigrahaṃ kuryātsa dātrā saha nimajjati
- 9
प्रतिग्रहसमर्थश्च यः प्रतिग्रहं वर्जयेत्स दातृलोकम् अवाप्नोति
pratigrahasamarthaśca yaḥ pratigrahaṃ varjayetsa dātṛlokam avāpnoti
- 10
एधोदकमूलफलाभयामिषमधुशय्यासनगृहपुष्पदधिशाकांश्चाभ्युद्यतान्न निर्णुदेत्
edhodakamūlaphalābhayāmiṣamadhuśayyāsanagṛhapuṣpadadhiśākāṃścābhyudyatānna nirṇudet
- 11
आहूयाभ्युद्यतां भिक्षां पुरस्ताद् अनुचोदिताम्
ग्राह्यां प्रजापतिर्मेने अपि दुष्कृतकर्मणः
āhūyābhyudyatāṃ bhikṣāṃ purastād anucoditām
grāhyāṃ prajāpatirmene api duṣkṛtakarmaṇaḥ
- 12
नाश्नन्ति पितरस्तस्य दश वर्षाणि पञ्च च
न च हव्यं वहत्यग्निर्यस्ताम् अभ्यवमन्यते
nāśnanti pitarastasya daśa varṣāṇi pañca ca
na ca havyaṃ vahatyagniryastām abhyavamanyate
- 13
गुरून्भृत्यान् उज्जिहीर्षुर् अर्चिष्यन्पितृदेवताः
सर्वतः प्रतिगृह्णीयान्न तु तृप्येत्स्वयं ततः
gurūnbhṛtyān ujjihīrṣur arciṣyanpitṛdevatāḥ
sarvataḥ pratigṛhṇīyānna tu tṛpyetsvayaṃ tataḥ
- 14
एतेष्व् अपि च कार्येषु समर्थस्तत्प्रतिग्रहे
नादद्यात्कुलटाषण्ढपतितेभ्यस्तथा द्विषः
eteṣv api ca kāryeṣu samarthastatpratigrahe
nādadyātkulaṭāṣaṇḍhapatitebhyastathā dviṣaḥ
- 15
गुरुषु त्वभ्यतीतेषु विना वा तैर्गृहे वसन्
आत्मनो वृत्तिम् अन्विच्छन्गृह्णीयात्साधुतः सदा
guruṣu tvabhyatīteṣu vinā vā tairgṛhe vasan
ātmano vṛttim anvicchangṛhṇīyātsādhutaḥ sadā
- 16
अर्धिकः कुलमित्रं च दासगोपालनापिताः
एते शूद्रेषु भोज्यान्ना यश्चात्मानं निवेदयेत्
ardhikaḥ kulamitraṃ ca dāsagopālanāpitāḥ
ete śūdreṣu bhojyānnā yaścātmānaṃ nivedayet

