65 shlokas
- 1
ब्रह्मरात्र्यां व्यतीतायां प्रबुद्धे पद्मसंभवे
विष्णुः सिसृक्षुर्भूतानि ज्ञात्वा भूमिं जलानुगाम्
brahmarātryāṃ vyatītāyāṃ prabuddhe padmasaṃbhave
viṣṇuḥ sisṛkṣurbhūtāni jñātvā bhūmiṃ jalānugām
- 2
जलक्रीडारुचि शुभं कल्पादिषु यथा पुरा
वाराहम् आस्थितो रूपम् उज्जहार वसुंधराम्
jalakrīḍāruci śubhaṃ kalpādiṣu yathā purā
vārāham āsthito rūpam ujjahāra vasuṃdharām
- 3
वेदपादो यूपदंष्ट्रः क्रतुदन्तश्चितीमुखः
अग्निजिह्वो दर्भरोमा ब्रह्मशीर्षो महातपाः
vedapādo yūpadaṃṣṭraḥ kratudantaścitīmukhaḥ
agnijihvo darbharomā brahmaśīrṣo mahātapāḥ
- 4
अहोरात्रेक्षणो दिव्यो वेदाङ्गश्रुतिभूषणः
आज्यनासः स्रुवतुण्डः सामघोषस्वनो महान्
ahorātrekṣaṇo divyo vedāṅgaśrutibhūṣaṇaḥ
ājyanāsaḥ sruvatuṇḍaḥ sāmaghoṣasvano mahān
- 5
धर्मसत्यमयः श्रीमान्क्रमविक्रमसत्कृतः
प्रायश्चित्तमहाघोणः पशुजानुर्महाकृतिः
dharmasatyamayaḥ śrīmānkramavikramasatkṛtaḥ
prāyaścittamahāghoṇaḥ paśujānurmahākṛtiḥ
- 6
उद्गात्रान्त्रो होमलिङ्गो बीजौषधिमहाफलः
वेद्यन्तरात्मा मन्त्रस्फिग्विकृतः सोमशोणितः
udgātrāntro homaliṅgo bījauṣadhimahāphalaḥ
vedyantarātmā mantrasphigvikṛtaḥ somaśoṇitaḥ
- 7
वेदिस्कन्धो हविर्गन्धो हव्यकव्यादिवेगवान्
प्राग्वंशकायो द्युतिमान्नानादीक्षाभिर् अन्वितः
vediskandho havirgandho havyakavyādivegavān
prāgvaṃśakāyo dyutimānnānādīkṣābhir anvitaḥ
- 8
दक्षिणाहृदयो योगमहामन्त्रमयो महान्
उपाकर्मोष्ठरुचिरः प्रवर्ग्यावर्तभूषणः
dakṣiṇāhṛdayo yogamahāmantramayo mahān
upākarmoṣṭharuciraḥ pravargyāvartabhūṣaṇaḥ
- 9
नानाछन्दोगतिपथो गुह्योपनिषदासनः
छायापत्नीसहायो वै मणिशृङ्ग इवोदितः
nānāchandogatipatho guhyopaniṣadāsanaḥ
chāyāpatnīsahāyo vai maṇiśṛṅga ivoditaḥ
- 10
महीं सागरपर्यन्तां सशैलवनकाननां
एकार्णवजलभ्रष्टाम् एकार्णवगतः प्रभुः
mahīṃ sāgaraparyantāṃ saśailavanakānanāṃ
ekārṇavajalabhraṣṭām ekārṇavagataḥ prabhuḥ
- 11
दंष्ट्राग्रेण समुद्धृत्य लोकानां हितकाम्यया
आदिदेवो महायोगी चकार जगतीं पुनः
daṃṣṭrāgreṇa samuddhṛtya lokānāṃ hitakāmyayā
ādidevo mahāyogī cakāra jagatīṃ punaḥ
- 12
एवं यज्ञवराहेण भूत्वा भूतहितार्थिना
उद्धृता पृथिवी देवी रसातलगता पुरा
evaṃ yajñavarāheṇa bhūtvā bhūtahitārthinā
uddhṛtā pṛthivī devī rasātalagatā purā
- 13
उद्धृत्य निश्चले स्थाने स्थापयित्वा तथा स्वके
यथास्थानं विभज्यापस्तद्गता मधुसूदनः
uddhṛtya niścale sthāne sthāpayitvā tathā svake
yathāsthānaṃ vibhajyāpastadgatā madhusūdanaḥ
- 14
सामुद्र्यश्च समुद्रेषु नादेयीश्च नदीषु च
पल्वलेषु च पाल्वल्यः सरःसु च सरोभवाः
sāmudryaśca samudreṣu nādeyīśca nadīṣu ca
palvaleṣu ca pālvalyaḥ saraḥsu ca sarobhavāḥ
- 15
पातालसप्तकं चक्रे लोकानां सप्तकं तथा
द्वीपानाम् उदधीनां च स्थानानि विविधानि च
pātālasaptakaṃ cakre lokānāṃ saptakaṃ tathā
dvīpānām udadhīnāṃ ca sthānāni vividhāni ca
- 16
स्थानपालान्लोकपालान्नदीः शैलवनस्पतीन्
ऋषींश्च सप्त धर्मज्ञान्वेदान्साङ्गान्सुरासुरान्
sthānapālānlokapālānnadīḥ śailavanaspatīn
ṛṣīṃśca sapta dharmajñānvedānsāṅgānsurāsurān
- 17
पिशाचोरगगन्धर्वयक्षराक्षसमानुषान्
पशुपक्षिमृगाद्यांश्च भूतग्रामं चतुर्विधम्
मेघेन्द्रचापशम्पाद्यान्यज्ञांश्च विविधांस्तथा
piśācoragagandharvayakṣarākṣasamānuṣān
paśupakṣimṛgādyāṃśca bhūtagrāmaṃ caturvidham
meghendracāpaśampādyānyajñāṃśca vividhāṃstathā
- 18
एवं वराहो भगवान्कृत्वेदं सचराचरम्
जगज्जगाम लोकानाम् अविज्ञातां तदा गतिम्
evaṃ varāho bhagavānkṛtvedaṃ sacarācaram
jagajjagāma lokānām avijñātāṃ tadā gatim
- 19
अविज्ञातां गतिं याते देवदेवे जनार्दने
वसुधा चिन्तयामास का धृतिर्मे भविष्यति
avijñātāṃ gatiṃ yāte devadeve janārdane
vasudhā cintayāmāsa kā dhṛtirme bhaviṣyati
- 20
पृच्छामि कश्यपं गत्वा स मे वक्ष्यत्य् असंशयम्
मदीयां वहते चिन्तां नित्यम् एव महामुनिः
pṛcchāmi kaśyapaṃ gatvā sa me vakṣyaty asaṃśayam
madīyāṃ vahate cintāṃ nityam eva mahāmuniḥ
- 21
एवं सा निश्चयं कृत्वा देवी स्त्रीरूपधारिणी
जगाम कश्यपं द्रष्टुं दृष्टवांस्तां च कश्यपः
evaṃ sā niścayaṃ kṛtvā devī strīrūpadhāriṇī
jagāma kaśyapaṃ draṣṭuṃ dṛṣṭavāṃstāṃ ca kaśyapaḥ
- 22
नीलपङ्कजपत्राक्षीं शारदेन्दुनिभाननाम्
अलिसंघालकां शुभ्रां बन्धुजीवाधरां शुभाम्
nīlapaṅkajapatrākṣīṃ śāradendunibhānanām
alisaṃghālakāṃ śubhrāṃ bandhujīvādharāṃ śubhām
- 23
सुभ्रूं सुसूक्ष्मदशनां चारुनासां नतभ्रुवम्
कम्बुकण्ठीं संहतोरूं पीनोरुजघनस्थलाम्
subhrūṃ susūkṣmadaśanāṃ cārunāsāṃ natabhruvam
kambukaṇṭhīṃ saṃhatorūṃ pīnorujaghanasthalām
- 24
विरेजतुः स्तनौ यस्याः समौ पीनौ निरन्तरौ
शक्रेभकुम्भसंकाशौ शातकुम्भसमद्युती
virejatuḥ stanau yasyāḥ samau pīnau nirantarau
śakrebhakumbhasaṃkāśau śātakumbhasamadyutī
- 25
मृणालकोमलौ बाहू करौ किसलयोपमौ
रुक्मस्तम्भनिभाव् ऊरू गूढे श्लिष्टे च जानुनी
mṛṇālakomalau bāhū karau kisalayopamau
rukmastambhanibhāv ūrū gūḍhe śliṣṭe ca jānunī
- 26
जङ्घे विरोमे सुसमे पादावतिमनोरमौ
जघनं च घनं मध्यं यथा केसरिणः शिशोः
jaṅghe virome susame pādāvatimanoramau
jaghanaṃ ca ghanaṃ madhyaṃ yathā kesariṇaḥ śiśoḥ
- 27
प्रभायुता नखास्ताम्रा रूपं सर्वमनोहरम्
कुर्वाणां वीक्षितैर्नित्यं नीलोत्पलयुता दिशः
prabhāyutā nakhāstāmrā rūpaṃ sarvamanoharam
kurvāṇāṃ vīkṣitairnityaṃ nīlotpalayutā diśaḥ
- 28
कुर्वाणां प्रभया देवीं तथा वितिमिरा दिशः
सुसूक्ष्मशुक्लवसनां रत्नोत्तमविभूषितां
kurvāṇāṃ prabhayā devīṃ tathā vitimirā diśaḥ
susūkṣmaśuklavasanāṃ ratnottamavibhūṣitāṃ
- 29
पदन्यासैर्वसुमतीं सपद्माम् इव कुर्वतीं
रूपयौवनसम्पन्नां विनीतवद् उपस्थिताम्
padanyāsairvasumatīṃ sapadmām iva kurvatīṃ
rūpayauvanasampannāṃ vinītavad upasthitām
- 30
समीपम् आगतां दृष्ट्वा पूजयित्वाथ कश्यपः
उवाच तां वरारोहे विज्ञातं हृद्गतं मया
samīpam āgatāṃ dṛṣṭvā pūjayitvātha kaśyapaḥ
uvāca tāṃ varārohe vijñātaṃ hṛdgataṃ mayā

