23 shlokas
- 1
अथाशौचव्यपगमे सुस्नातः सुप्रक्षालितपाणिपादः स्वाचान्तस्त्वेवंविधान् एव ब्राह्मणान्यथाशक्ति उदङ्मुखान्गन्धमाल्यवस्त्रालंकारादिभिः पूजितान्भोजयेत्
athāśaucavyapagame susnātaḥ suprakṣālitapāṇipādaḥ svācāntastvevaṃvidhān eva brāhmaṇānyathāśakti udaṅmukhāngandhamālyavastrālaṃkārādibhiḥ pūjitānbhojayet
- 2
एकवन्मन्त्रान् ऊहेद् एकोद्दिष्टे
ekavanmantrān ūhed ekoddiṣṭe
- 3
उच्छिष्टसंनिधावेकम् एव तन्नामगोत्राभ्यां पिण्डं निर्वपेत्
ucchiṣṭasaṃnidhāvekam eva tannāmagotrābhyāṃ piṇḍaṃ nirvapet
- 4
भुक्तवत्सु ब्राह्मणेषु दक्षिणयाभिपूजितेषु प्रेतनामगोत्राभ्यां दत्ताक्षय्योदकः चतुरङ्गुलपृथ्वीः तावदन्तराः तावदधःखाताः वितस्त्यायताः तिस्रः कर्षूः कुर्यात्
bhuktavatsu brāhmaṇeṣu dakṣiṇayābhipūjiteṣu pretanāmagotrābhyāṃ dattākṣayyodakaḥ caturaṅgulapṛthvīḥ tāvadantarāḥ tāvadadhaḥkhātāḥ vitastyāyatāḥ tisraḥ karṣūḥ kuryāt
- 5
कर्षूसमीपे चाग्नित्रयम् उपसमाधाय परिस्तीर्य तत्रैकैकस्मिन् आहुतित्रयं जुहुयात्
karṣūsamīpe cāgnitrayam upasamādhāya paristīrya tatraikaikasmin āhutitrayaṃ juhuyāt
- 6
सोमाय पितृमते स्वधा नमः
somāya pitṛmate svadhā namaḥ
- 7
अग्नये कव्यवाहनाय स्वधा नमः
agnaye kavyavāhanāya svadhā namaḥ
- 8
यमायाङ्गिरसे स्वधा नमः
yamāyāṅgirase svadhā namaḥ
- 9
स्थानत्रये च प्राग्वत्पिण्डनिर्वपणं कुर्यात्
sthānatraye ca prāgvatpiṇḍanirvapaṇaṃ kuryāt
- 10
अन्नदधिघृतमधुमांसैः कर्षूत्रयं पूरयित्वा एतत्त इति जपेत्
annadadhighṛtamadhumāṃsaiḥ karṣūtrayaṃ pūrayitvā etatta iti japet
- 11
एवं मृताहे प्रतिमासं कुर्यात्
evaṃ mṛtāhe pratimāsaṃ kuryāt
- 12
संवत्सरान्ते प्रेताय तत्पित्रे तत्पितामहाय तत्प्रपितामहाय च ब्राह्मणान्देवपूर्वान्भोजयेत्
saṃvatsarānte pretāya tatpitre tatpitāmahāya tatprapitāmahāya ca brāhmaṇāndevapūrvānbhojayet
- 13
अत्राग्नौकरणम् आवाहनं पाद्यं च कुर्यात्
atrāgnaukaraṇam āvāhanaṃ pādyaṃ ca kuryāt
- 14
संसृजतु त्वा पृथिवी समानी च इति च प्रेतपाद्यपात्रे पितृपाद्यपात्रत्रये योजयेत्
saṃsṛjatu tvā pṛthivī samānī ca iti ca pretapādyapātre pitṛpādyapātratraye yojayet
- 15
उच्छिष्टसंनिधौ पिण्डचतुष्टयं कुर्यात्
ucchiṣṭasaṃnidhau piṇḍacatuṣṭayaṃ kuryāt
- 16
ब्राह्मणांश्च स्वाचान्तान्दत्तदक्षिणांश्चानुव्रज्य विसर्जयेत्
brāhmaṇāṃśca svācāntāndattadakṣiṇāṃścānuvrajya visarjayet
- 17
ततः प्रेतपिण्डं पाद्यपात्रोदकवत्पिण्डत्रये निदध्यात्
tataḥ pretapiṇḍaṃ pādyapātrodakavatpiṇḍatraye nidadhyāt
- 18
कर्षूत्रयसंनिकर्षे ऽप्येवम् एव
karṣūtrayasaṃnikarṣe 'pyevam eva
- 19
सपिण्डीकरणं मासिकार्थवत्द्वादशाहं श्राद्धं कृत्वा त्रयोदशे ऽह्नि वा कुर्यात्
sapiṇḍīkaraṇaṃ māsikārthavatdvādaśāhaṃ śrāddhaṃ kṛtvā trayodaśe 'hni vā kuryāt
- 20
मन्त्रवर्जं हि शूद्राणां द्वादशे ऽह्नि
mantravarjaṃ hi śūdrāṇāṃ dvādaśe 'hni
- 21
संवत्सराभ्यन्तरे यद्यधिमासो भवेत्तदा मासिकार्थे दिनम् एकं वर्धयेत्
saṃvatsarābhyantare yadyadhimāso bhavettadā māsikārthe dinam ekaṃ vardhayet
- 22
सपिण्डीकरणं स्त्रीणां कार्यम् एवं तथा भवेत्
यावज्जीवं तथा कुर्याच्छ्राद्धं तु प्रतिवत्सरम्
sapiṇḍīkaraṇaṃ strīṇāṃ kāryam evaṃ tathā bhavet
yāvajjīvaṃ tathā kuryācchrāddhaṃ tu prativatsaram
- 23
अर्वाक्सपिण्डीकरणं यस्य संवत्सरात्कृतं
तस्याप्यन्नं सोदकुम्भं दद्याद्वर्षं द्विजन्मने
arvāksapiṇḍīkaraṇaṃ yasya saṃvatsarātkṛtaṃ
tasyāpyannaṃ sodakumbhaṃ dadyādvarṣaṃ dvijanmane

