43 shlokas
- 1
अथोत्तमर्णो ऽधमर्णाद्यथादत्तम् अर्थं गृह्णीयात्
athottamarṇo 'dhamarṇādyathādattam arthaṃ gṛhṇīyāt
- 2
द्विकं त्रिकं चतुष्कं पञ्चकं च शतं वर्णानुक्रमेण प्रतिमासम्
dvikaṃ trikaṃ catuṣkaṃ pañcakaṃ ca śataṃ varṇānukrameṇa pratimāsam
- 3
सर्वे वर्णा वा स्वप्रतिपन्नां वृद्धिं दद्युः
sarve varṇā vā svapratipannāṃ vṛddhiṃ dadyuḥ
- 4
अकृताम् अपि वत्सरातिक्रमेण यथाविहितम्
akṛtām api vatsarātikrameṇa yathāvihitam
- 5
आध्युपभोगे वृद्ध्यभावः
ādhyupabhoge vṛddhyabhāvaḥ
- 6
दैवराजोपघाताद् ऋते विनष्टम् आधिम् उत्तमर्णो दद्यात्
daivarājopaghātād ṛte vinaṣṭam ādhim uttamarṇo dadyāt
- 7
अन्तवृद्धौ प्रविष्टायाम् अपि
antavṛddhau praviṣṭāyām api
- 8
न स्थावरम् आधिम् ऋते वचनात्
na sthāvaram ādhim ṛte vacanāt
- 9
गृहीतधनप्रवेशार्थम् एव यत्स्थावरं दत्तं तत्गृहीतधनप्रवेशे दद्यात्
gṛhītadhanapraveśārtham eva yatsthāvaraṃ dattaṃ tatgṛhītadhanapraveśe dadyāt
- 10
दीयमानं प्रयुक्तम् अर्थम् उत्तमर्णस्यागृह्णतस्ततः परं न वर्धते
dīyamānaṃ prayuktam artham uttamarṇasyāgṛhṇatastataḥ paraṃ na vardhate
- 11
हिरण्यस्य परा वृद्धिर्द्विगुणा
hiraṇyasya parā vṛddhirdviguṇā
- 12
धान्यस्य त्रिगुणा
dhānyasya triguṇā
- 13
वस्त्रस्य चतुर्गुणा
vastrasya caturguṇā
- 14
रसस्याष्टगुणा
rasasyāṣṭaguṇā
- 15
संततिः स्त्रीपशूनाम्
saṃtatiḥ strīpaśūnām
- 16
किण्वकार्पाससूत्रचर्मायुधेष्टकाङ्गाराणाम् अक्षया
kiṇvakārpāsasūtracarmāyudheṣṭakāṅgārāṇām akṣayā
- 17
अनुक्तानां द्विगुणा
anuktānāṃ dviguṇā
- 18
प्रयुक्तम् अर्थं यथा कथंचित्साधयन्न राज्ञो वाच्यः स्यात्
prayuktam arthaṃ yathā kathaṃcitsādhayanna rājño vācyaḥ syāt
- 19
साध्यमानश्चेद्राजानम् अभिगच्छेत्तत्समं दण्ड्यः
sādhyamānaścedrājānam abhigacchettatsamaṃ daṇḍyaḥ
- 20
उत्तमर्णश्चेद्राजानम् इयात्तद्विभावितो ऽधमर्णो राज्ञे धनदशभागसंमितं दण्डं दद्यात्
uttamarṇaścedrājānam iyāttadvibhāvito 'dhamarṇo rājñe dhanadaśabhāgasaṃmitaṃ daṇḍaṃ dadyāt
- 21
प्राप्तार्थश्चोत्तमर्णो विंशतितमम् अंशम्
prāptārthaścottamarṇo viṃśatitamam aṃśam
- 22
सर्वापलाप्य् एकदेशविभावितो ऽपि सर्वं दद्यात्
sarvāpalāpy ekadeśavibhāvito 'pi sarvaṃ dadyāt
- 23
तस्य च भावनास्तिस्रो भवन्ति लिखितं साक्षिणः समयक्रिया च
tasya ca bhāvanāstisro bhavanti likhitaṃ sākṣiṇaḥ samayakriyā ca
- 24
ससाक्षिकम् आप्तं ससाक्षिकम् एव दद्यात्
sasākṣikam āptaṃ sasākṣikam eva dadyāt
- 25
लिखितार्थे प्रविष्टे लिखितं पाटयेत्
likhitārthe praviṣṭe likhitaṃ pāṭayet
- 26
असमग्रदाने लेख्यासंनिधाने चोत्तमर्णः स्वलिखितं दद्यात्
asamagradāne lekhyāsaṃnidhāne cottamarṇaḥ svalikhitaṃ dadyāt
- 27
धनग्राहिणि प्रेते प्रव्रजिते द्विदशाः समाः प्रवसिते वा तत्पुत्रपौत्रैर्धनं देयम्
dhanagrāhiṇi prete pravrajite dvidaśāḥ samāḥ pravasite vā tatputrapautrairdhanaṃ deyam
- 28
नातः परम् अनिच्छुभिः
nātaḥ param anicchubhiḥ
- 29
सपुत्रस्य वाप्य् अपुत्रस्य वा रिक्थग्राही ऋणं दद्यात्
saputrasya vāpy aputrasya vā rikthagrāhī ṛṇaṃ dadyāt
- 30
निर्धनस्य स्त्रीग्राही
nirdhanasya strīgrāhī

