18 shlokas
- 1
राजर्त्विक्श्रोत्रियाधर्मप्रतिषेध्युपाध्यायपितृव्यमातामहमातुलश्वशुरज्येष्ठभ्रातृसंबन्धिनश्चाचार्यवत्
rājartvikśrotriyādharmapratiṣedhyupādhyāyapitṛvyamātāmahamātulaśvaśurajyeṣṭhabhrātṛsaṃbandhinaścācāryavat
- 2
पत्न्य एतेषां सवर्णाः
patnya eteṣāṃ savarṇāḥ
- 3
मातृष्वसा पितृष्वसा ज्येष्ठा स्वसा च
mātṛṣvasā pitṛṣvasā jyeṣṭhā svasā ca
- 4
श्वशुरपितृव्यमातुलर्त्विजां कनीयसां प्रत्युत्थानम् एवाभिवादनम्
śvaśurapitṛvyamātulartvijāṃ kanīyasāṃ pratyutthānam evābhivādanam
- 5
हीनवर्णानां गुरुपत्नीनां दूराद् अभिवादनं न पादोपस्पर्शनम्
hīnavarṇānāṃ gurupatnīnāṃ dūrād abhivādanaṃ na pādopasparśanam
- 6
गुरुपत्नीनां गोत्रोत्सादनाञ्जनकेशसंयमनपादप्रक्षालनादीनि न कुर्यात्
gurupatnīnāṃ gotrotsādanāñjanakeśasaṃyamanapādaprakṣālanādīni na kuryāt
- 7
असंस्तुतापि परपत्नी भगिनीति वाच्या पुत्रीति मातेति वा
asaṃstutāpi parapatnī bhaginīti vācyā putrīti māteti vā
- 8
न च गुरूणां त्वम् इति ब्रूयात्
na ca gurūṇāṃ tvam iti brūyāt
- 9
तदतिक्रमे निराहारो दिवसान्ते तं प्रसाद्याश्नीयात्
tadatikrame nirāhāro divasānte taṃ prasādyāśnīyāt
- 10
न च गुरुणा सह विगृह्य कथाः कुर्यात्
na ca guruṇā saha vigṛhya kathāḥ kuryāt
- 11
न चैवास्य परीवादम्
na caivāsya parīvādam
- 12
न चानभिप्रेतम्
na cānabhipretam
- 13
गुरुपत्नी तु युवतिर्नाभिवाद्येह पादयोः
पूर्णविंशतिवर्षेण गुणदोषौ विजानता
gurupatnī tu yuvatirnābhivādyeha pādayoḥ
pūrṇaviṃśativarṣeṇa guṇadoṣau vijānatā
- 14
कामं तु गुरुपत्नीनां युवतीनां युवा भुवि
विधिवद्वन्दनं कुर्याद् असावहम् इति ब्रुवन्
kāmaṃ tu gurupatnīnāṃ yuvatīnāṃ yuvā bhuvi
vidhivadvandanaṃ kuryād asāvaham iti bruvan
- 15
विप्रोष्य पादग्रहणम् अन्वहं चाभिवादनम्
गुरुदारेषु कुर्वीत सतां धर्मम् अनुस्मरन्
viproṣya pādagrahaṇam anvahaṃ cābhivādanam
gurudāreṣu kurvīta satāṃ dharmam anusmaran
- 16
वित्तं बन्धुर्वयः कर्म विद्या भवति पञ्चमी
एतानि मानस्थानानि गरीयो यद्यद् उत्तरम्
vittaṃ bandhurvayaḥ karma vidyā bhavati pañcamī
etāni mānasthānāni garīyo yadyad uttaram
- 17
ब्राह्मणं दशवर्षं च शतवर्षं च भूमिपम्
पितापुत्रौ विजानीयाद्ब्राह्मणस्तु तयोः पिता
brāhmaṇaṃ daśavarṣaṃ ca śatavarṣaṃ ca bhūmipam
pitāputrau vijānīyādbrāhmaṇastu tayoḥ pitā
- 18
विप्राणां ज्ञानतो ज्यैष्ठ्यं क्षत्रियाणां तु वीर्यतः
वैश्यानां धान्यधनतः शूद्राणाम् एव जन्मतः
viprāṇāṃ jñānato jyaiṣṭhyaṃ kṣatriyāṇāṃ tu vīryataḥ
vaiśyānāṃ dhānyadhanataḥ śūdrāṇām eva janmataḥ

