24 shlokas
- 1
मृतं द्विजं न शूद्रेण निर्हारयेत्
mṛtaṃ dvijaṃ na śūdreṇa nirhārayet
- 2
न शूद्रं द्विजेन
na śūdraṃ dvijena
- 3
पितरं मातरं च पुत्रा निर्हरेयुः
pitaraṃ mātaraṃ ca putrā nirhareyuḥ
- 4
न द्विजं पितरम् अपि शूद्राः
na dvijaṃ pitaram api śūdrāḥ
- 5
ब्राह्मणम् अनाथं ये ब्राह्मणा निर्हरन्ति ते स्वर्गलोकभाजः
brāhmaṇam anāthaṃ ye brāhmaṇā nirharanti te svargalokabhājaḥ
- 6
निर्हृत्य च बान्धवं प्रेतं संष्कृत्याप्रदक्षिणेन चिताम् अभिगम्याप्सु सवाससो निमज्जनं कुर्युः
nirhṛtya ca bāndhavaṃ pretaṃ saṃṣkṛtyāpradakṣiṇena citām abhigamyāpsu savāsaso nimajjanaṃ kuryuḥ
- 7
प्रेतस्योदकनिर्वपणं कृत्वैकं पिण्डं कुशेषु दद्युः
pretasyodakanirvapaṇaṃ kṛtvaikaṃ piṇḍaṃ kuśeṣu dadyuḥ
- 8
परिवर्तितवाससश्च निम्बपत्राणि विदश्य द्वार्यश्मनि पदन्यासं कृत्वा गृहं प्रविशेयुः
parivartitavāsasaśca nimbapatrāṇi vidaśya dvāryaśmani padanyāsaṃ kṛtvā gṛhaṃ praviśeyuḥ
- 9
अक्षतांश्चाग्नौ क्षिपेयुः
akṣatāṃścāgnau kṣipeyuḥ
- 10
चतुर्थे दिवसे ऽस्थिसंचयनं कुर्युः
caturthe divase 'sthisaṃcayanaṃ kuryuḥ
- 11
तेषां गङ्गाम्भसि प्रक्षेपः
teṣāṃ gaṅgāmbhasi prakṣepaḥ
- 12
यावत्संख्यम् अस्थि पुरुषस्य गङ्गाम्भसि तिष्ठति तावद्वर्षसहस्राणि स्वर्गलोकम् अधितिष्ठति
yāvatsaṃkhyam asthi puruṣasya gaṅgāmbhasi tiṣṭhati tāvadvarṣasahasrāṇi svargalokam adhitiṣṭhati
- 13
यावद् आशौचं तावत्प्रेतस्योदकं पिण्डम् एकं च दद्युः
yāvad āśaucaṃ tāvatpretasyodakaṃ piṇḍam ekaṃ ca dadyuḥ
- 14
क्रीतलब्धाशनाश्च भवेयुः
krītalabdhāśanāśca bhaveyuḥ
- 15
अमांसाशनाश्च
amāṃsāśanāśca
- 16
स्थण्डिलशायिनः
sthaṇḍilaśāyinaḥ
- 17
पृथक्शायिनश्च
pṛthakśāyinaśca
- 18
ग्रामान्निष्क्रम्याशौचान्ते कृतश्मश्रुकर्माणस्तिलकल्कैः सर्षपकल्कैर्वा स्नाताः परिवर्तितवाससो गृहं प्रविशेयुः
grāmānniṣkramyāśaucānte kṛtaśmaśrukarmāṇastilakalkaiḥ sarṣapakalkairvā snātāḥ parivartitavāsaso gṛhaṃ praviśeyuḥ
- 19
तत्र शान्तिं कृत्वा ब्राह्मणानां च पूजनं कुर्युः
tatra śāntiṃ kṛtvā brāhmaṇānāṃ ca pūjanaṃ kuryuḥ
- 20
देवाः परोक्षदेवाः प्रत्यक्षदेवा ब्राह्मणाः
devāḥ parokṣadevāḥ pratyakṣadevā brāhmaṇāḥ
- 21
ब्राह्मणैर्लोका धार्यन्ते
brāhmaṇairlokā dhāryante
- 22
ब्राह्मणानां प्रसादेन दिवि तिष्ठन्ति देवताः
ब्राह्मणाभिहितं वाक्यं न मिथ्या जायते क्वचित्
brāhmaṇānāṃ prasādena divi tiṣṭhanti devatāḥ
brāhmaṇābhihitaṃ vākyaṃ na mithyā jāyate kvacit
- 23
यद्ब्राह्मणास्तुष्टतमा वदन्ति तद्देवताः प्रत्यभिनन्दयन्ति
तुष्टेषु तुष्टाः सततं भवन्ति प्रत्यक्षदेवेषु परोक्षदेवाः
yadbrāhmaṇāstuṣṭatamā vadanti taddevatāḥ pratyabhinandayanti
tuṣṭeṣu tuṣṭāḥ satataṃ bhavanti pratyakṣadeveṣu parokṣadevāḥ
- 24
दुःखान्वितानां मृतबान्धवानाम् आश्वासनं कुर्युर् अदीनसत्त्वाः
वाक्यैस्तु यैर्भूमि तवाभिधास्ये वाक्यान्यहं तानि मनोऽभिरामे
duḥkhānvitānāṃ mṛtabāndhavānām āśvāsanaṃ kuryur adīnasattvāḥ
vākyaistu yairbhūmi tavābhidhāsye vākyānyahaṃ tāni mano'bhirāme

