34 shlokas
- 1
यः पापात्मा येन सह संयुज्यते स तस्यैव प्रायश्चित्तं कुर्यात्
yaḥ pāpātmā yena saha saṃyujyate sa tasyaiva prāyaścittaṃ kuryāt
- 2
मृतपञ्चनखात्कूपाद् अत्यन्तोपहताच्चोदकं पीत्वा ब्राह्मणस्त्रिरात्रम् उपवसेत्
mṛtapañcanakhātkūpād atyantopahatāccodakaṃ pītvā brāhmaṇastrirātram upavaset
- 3
द्व्यहं राजन्यः
dvyahaṃ rājanyaḥ
- 4
एकाहं वैश्यः
ekāhaṃ vaiśyaḥ
- 5
शूद्रो नक्तम्
śūdro naktam
- 6
सर्वे चान्ते व्रतस्य पञ्चगव्यं पिबेयुः
sarve cānte vratasya pañcagavyaṃ pibeyuḥ
- 7
पञ्चगव्यं पिबेच्छूद्रो ब्राह्मणस्तु सुरां पिबेत्
उभौ तौ नरकं यातो महारौरवसंज्ञितम्
pañcagavyaṃ pibecchūdro brāhmaṇastu surāṃ pibet
ubhau tau narakaṃ yāto mahārauravasaṃjñitam
- 8
पर्वानारोग्यवर्जम् ऋताव् अवगच्छन्पत्नीं त्रिरात्रम् उपवसेत्
parvānārogyavarjam ṛtāv avagacchanpatnīṃ trirātram upavaset
- 9
कूटसाक्षी ब्रह्महत्याव्रतं चरेत्
kūṭasākṣī brahmahatyāvrataṃ caret
- 10
अनुदकमूत्रपुरीषकरणे सचैलं स्नानं महाव्याहृतिहोमश्च
anudakamūtrapurīṣakaraṇe sacailaṃ snānaṃ mahāvyāhṛtihomaśca
- 11
सूर्याभ्युदितनिर्मुक्तः सचैलस्नातः सावित्र्यष्टशतम् आवर्तयेत्
sūryābhyuditanirmuktaḥ sacailasnātaḥ sāvitryaṣṭaśatam āvartayet
- 12
श्वसृगालविड्वराहखरवानरवायसपुंश्चलीभिर्दष्टः स्रवन्तीम् आसाद्य षोडश प्राणायामान्कुर्यात्
śvasṛgālaviḍvarāhakharavānaravāyasapuṃścalībhirdaṣṭaḥ sravantīm āsādya ṣoḍaśa prāṇāyāmānkuryāt
- 13
वेदाग्न्युत्सादी त्रिषवणस्नाय्यधःशायी संवत्सरं सकृद्भैक्ष्येण वर्तेत
vedāgnyutsādī triṣavaṇasnāyyadhaḥśāyī saṃvatsaraṃ sakṛdbhaikṣyeṇa varteta
- 14
समुत्कर्षानृते गुरोश्चालीकनिर्बन्धे तदाक्षेपणे च मासं पयसा वर्तेत
samutkarṣānṛte guroścālīkanirbandhe tadākṣepaṇe ca māsaṃ payasā varteta
- 15
नास्तिको नास्तिकवृत्तिः कृतघ्नः कूटव्यवहारी ब्राह्मणवृत्तिघ्नश्चैते संवत्सरं भैक्ष्येण वर्तेरन्
nāstiko nāstikavṛttiḥ kṛtaghnaḥ kūṭavyavahārī brāhmaṇavṛttighnaścaite saṃvatsaraṃ bhaikṣyeṇa varteran
- 16
परिवित्तिः परिवेत्ता च यया च परिविद्यते दाता याजकश्च चान्द्रायणं कुर्यात्
parivittiḥ parivettā ca yayā ca parividyate dātā yājakaśca cāndrāyaṇaṃ kuryāt
- 17
प्राणिभूपुण्यसोमविक्रयी तप्तकृच्छ्रम्
prāṇibhūpuṇyasomavikrayī taptakṛcchram
- 18
आर्द्रौषधिगन्धपुष्पफलमूलचर्मवेत्रविदलतुषकपालकेशभस्मास्थिगोरसपिण्याकतिलतैलविक्रयी प्राजापत्यम्
ārdrauṣadhigandhapuṣpaphalamūlacarmavetravidalatuṣakapālakeśabhasmāsthigorasapiṇyākatilatailavikrayī prājāpatyam
- 19
श्लेष्मजतुमधूच्छिष्टशङ्खशुक्तित्रपुसीसकृष्णलोहौदुम्बरखड्गपात्रविक्रयी चान्द्रायणं कुर्यात्
śleṣmajatumadhūcchiṣṭaśaṅkhaśuktitrapusīsakṛṣṇalohaudumbarakhaḍgapātravikrayī cāndrāyaṇaṃ kuryāt
- 20
रक्तवस्त्ररङ्गरत्नगन्धगुडमधुरसोर्णाविक्रयी त्रिरात्रम् उपवसेत्
raktavastraraṅgaratnagandhaguḍamadhurasorṇāvikrayī trirātram upavaset
- 21
मांसलवणलाक्षाक्षीरविक्रयी चान्द्रायणं कुर्यात्
māṃsalavaṇalākṣākṣīravikrayī cāndrāyaṇaṃ kuryāt
- 22
तं च भूयश्चोपनयेत्
taṃ ca bhūyaścopanayet
- 23
उष्ट्रेण खरेण वा गत्वा नग्नः स्नात्वा सुप्त्वा भुक्त्वा प्राणायामत्रयम्कुर्यात्
uṣṭreṇa khareṇa vā gatvā nagnaḥ snātvā suptvā bhuktvā prāṇāyāmatrayamkuryāt
- 24
जपित्वा त्रीणि सावित्र्याः सहस्राणि समाहितः
मासं गोष्ठे पयः पीत्वा मुच्यते ऽसत्प्रतिग्रहात्
japitvā trīṇi sāvitryāḥ sahasrāṇi samāhitaḥ
māsaṃ goṣṭhe payaḥ pītvā mucyate 'satpratigrahāt
- 25
अयाज्ययाजनं कृत्वा परेषाम् अन्त्यकर्म च
अभिचारम् अहीनं च त्रिभिः कृच्छ्रैर्व्यपोहति
ayājyayājanaṃ kṛtvā pareṣām antyakarma ca
abhicāram ahīnaṃ ca tribhiḥ kṛcchrairvyapohati
- 26
येषां द्विजानां सावित्री नानूच्येत यथाविधि
तांश्चारयित्वा त्रीन्कृच्छ्रान्यथाविध्युपनाययेत्
yeṣāṃ dvijānāṃ sāvitrī nānūcyeta yathāvidhi
tāṃścārayitvā trīnkṛcchrānyathāvidhyupanāyayet
- 27
प्रायश्चित्तं चिकीर्षन्ति विकर्मस्थास्तु ये द्विजाः
ब्राह्मण्याच्च परित्यक्तास्तेषाम् अप्येतद् आदिशेत्
prāyaścittaṃ cikīrṣanti vikarmasthāstu ye dvijāḥ
brāhmaṇyācca parityaktāsteṣām apyetad ādiśet
- 28
यद्गर्हितेनार्जयन्ति कर्मणा ब्राह्मणा धनम्
तस्योत्सर्गेण शुध्यन्ति जप्येन तपसा तथा
yadgarhitenārjayanti karmaṇā brāhmaṇā dhanam
tasyotsargeṇa śudhyanti japyena tapasā tathā
- 29
वेदोदितानां नित्यानां कर्मणां समतिक्रमे
स्नातकव्रतलोपे च प्रायश्चित्तम् अभोजनम्
vedoditānāṃ nityānāṃ karmaṇāṃ samatikrame
snātakavratalope ca prāyaścittam abhojanam
- 30
अवगूर्य चरेत्कृच्छ्रम् अतिकृच्छ्रं निपातने
कृच्छ्रातिकृच्छ्रं कुर्वीत विप्रस्योत्पाद्य शोणितम्
avagūrya caretkṛcchram atikṛcchraṃ nipātane
kṛcchrātikṛcchraṃ kurvīta viprasyotpādya śoṇitam

