23 shlokas
- 1
अथ कर्मभिर् आत्मकृतैर्गुरुम् आत्मानं मन्येतात्मार्थे प्रसृतियावकं श्रपयेत्
atha karmabhir ātmakṛtairgurum ātmānaṃ manyetātmārthe prasṛtiyāvakaṃ śrapayet
- 2
न ततो ऽग्नौ जुहुयात्
na tato 'gnau juhuyāt
- 3
न चात्र बलिकर्म
na cātra balikarma
- 4
अशृतं श्रप्यमाणं शृतं चाभिमन्त्रयेत्
aśṛtaṃ śrapyamāṇaṃ śṛtaṃ cābhimantrayet
- 5
श्रप्यमाणे रक्षां कुर्यात्
śrapyamāṇe rakṣāṃ kuryāt
- 6
ब्रह्मा देवानां पदवीः कवीनाम् ऋषिर्विप्राणां महिषो मृगाणाम्
श्येनो गृध्राणां स्वधितिर्वनानां सोमः पवित्रम् अत्येति रेभन्
brahmā devānāṃ padavīḥ kavīnām ṛṣirviprāṇāṃ mahiṣo mṛgāṇām
śyeno gṛdhrāṇāṃ svadhitirvanānāṃ somaḥ pavitram atyeti rebhan
- 7
इति दर्भान्बध्नाति
iti darbhānbadhnāti
- 8
शृतं च तम् अश्नीयात्पात्रे निषिच्य
śṛtaṃ ca tam aśnīyātpātre niṣicya
- 9
ये देवा मनोजाता मनोजुषः सुदक्षा दक्षपितरस्ते नः पान्तु ते नो ऽवन्तु तेभ्यो नमस्तेभ्यः स्वाहेत्य् आत्मनि जुहुयात्
ye devā manojātā manojuṣaḥ sudakṣā dakṣapitaraste naḥ pāntu te no 'vantu tebhyo namastebhyaḥ svāhety ātmani juhuyāt
- 10
अथाचान्तो नाभिम् आलभेत
athācānto nābhim ālabheta
- 11
स्नाताः पीता भवत यूयम् आपो ऽस्माकम् उदरे यवाः ता अस्मभ्यम् अनमीवा अयक्ष्मा अनागसः सन्तु देवीर् अमृता ऋतावृध इति
snātāḥ pītā bhavata yūyam āpo 'smākam udare yavāḥ tā asmabhyam anamīvā ayakṣmā anāgasaḥ santu devīr amṛtā ṛtāvṛdha iti
- 12
त्रिरात्रं मेधार्थी
trirātraṃ medhārthī
- 13
षड्रात्रं पापकृत्
ṣaḍrātraṃ pāpakṛt
- 14
सप्तरात्रं पीत्वा महापातकिनाम् अन्यतमं पुनाति
saptarātraṃ pītvā mahāpātakinām anyatamaṃ punāti
- 15
द्वादशरात्रेण पूर्वपुरुषकृतम् अपि पापं निर्दहति
dvādaśarātreṇa pūrvapuruṣakṛtam api pāpaṃ nirdahati
- 16
मासं पीत्वा सर्वपापानि
māsaṃ pītvā sarvapāpāni
- 17
गोनिहारमुक्तानां यवानाम् एकविंशतिरात्रं च
gonihāramuktānāṃ yavānām ekaviṃśatirātraṃ ca
- 18
यवो ऽसि धान्यराजो ऽसि वारुणो मधुसंयुतः
निर्णोदः सर्वपापानां पवित्रम् ऋषिभिर्धृतम्
yavo 'si dhānyarājo 'si vāruṇo madhusaṃyutaḥ
nirṇodaḥ sarvapāpānāṃ pavitram ṛṣibhirdhṛtam
- 19
घृतं यवा मधु यवा आपो वा अमृतं यवाः
सर्वे पुनीत मे पापं यन्मे किंचन दुष्कृतम्
ghṛtaṃ yavā madhu yavā āpo vā amṛtaṃ yavāḥ
sarve punīta me pāpaṃ yanme kiṃcana duṣkṛtam
- 20
वाचा कृतं कर्मकृतं मनसा दुर्विचिन्तितम्
अलक्ष्मीं कालकर्णीं च नाशयध्वं यवा मम
vācā kṛtaṃ karmakṛtaṃ manasā durvicintitam
alakṣmīṃ kālakarṇīṃ ca nāśayadhvaṃ yavā mama
- 21
श्वसूकरावलीढं च उच्छिष्टोपहतं च यत्
मातापित्रोर् अशुश्रूषां तत्पुनीध्वं यवा मम
śvasūkarāvalīḍhaṃ ca ucchiṣṭopahataṃ ca yat
mātāpitror aśuśrūṣāṃ tatpunīdhvaṃ yavā mama
- 22
गणान्नं गणिकान्नं च शूद्रान्नं श्राद्धसूतकम्
चौरस्यान्नं नवश्राद्धं पुनीध्वं च यवा मम
gaṇānnaṃ gaṇikānnaṃ ca śūdrānnaṃ śrāddhasūtakam
caurasyānnaṃ navaśrāddhaṃ punīdhvaṃ ca yavā mama
- 23
बालधूर्तम् अधर्मं च राजद्वारकृतं च यत्
सुवर्णस्तैन्यम् अव्रात्यम् अयाज्यस्य च याजनम्
ब्राह्मणानां परीवादं पुनीध्वं च यवा मम
bāladhūrtam adharmaṃ ca rājadvārakṛtaṃ ca yat
suvarṇastainyam avrātyam ayājyasya ca yājanam
brāhmaṇānāṃ parīvādaṃ punīdhvaṃ ca yavā mama

