12 shlokas
- 1
अथाग्निः
athāgniḥ
- 2
षोडशाङ्गुलं तावदन्तरं मण्डलसप्तकं कुर्यात्
ṣoḍaśāṅgulaṃ tāvadantaraṃ maṇḍalasaptakaṃ kuryāt
- 3
ततः प्राङ्मुखस्य प्रसारितभुजद्वयस्य सप्ताश्वत्थपत्राणि करयोर्दद्यात्
tataḥ prāṅmukhasya prasāritabhujadvayasya saptāśvatthapatrāṇi karayordadyāt
- 4
तानि च करद्वयसहितानि सूत्रेण वेष्टयेत्
tāni ca karadvayasahitāni sūtreṇa veṣṭayet
- 5
ततस्तत्राग्निवर्णं लोहपिण्डं पञ्चाशत्पलिकं समं न्यसेत्
tatastatrāgnivarṇaṃ lohapiṇḍaṃ pañcāśatpalikaṃ samaṃ nyaset
- 6
तम् आदाय नातिद्रुतं नातिविलम्बितं मण्डलेषु पादन्यासं कुर्वन्व्रजेत्
tam ādāya nātidrutaṃ nātivilambitaṃ maṇḍaleṣu pādanyāsaṃ kurvanvrajet
- 7
ततः सप्तमं मण्डलम् अतीत्य भूमौ लोहपिण्डं जह्यात्
tataḥ saptamaṃ maṇḍalam atītya bhūmau lohapiṇḍaṃ jahyāt
- 8
यो हस्तयोः क्वचिद्दग्धस्तम् अशुद्धं विनिर्दिशेत्
न दग्धः सर्वथा यस्तु स विशुद्धो भवेन्नरः
yo hastayoḥ kvaciddagdhastam aśuddhaṃ vinirdiśet
na dagdhaḥ sarvathā yastu sa viśuddho bhavennaraḥ
- 9
भयाद्वा पातयेद्यस्तु दग्धो वा न विभाव्यते
पुनस्तं हारयेल्लोहं समयस्याविशोधनात्
bhayādvā pātayedyastu dagdho vā na vibhāvyate
punastaṃ hārayellohaṃ samayasyāviśodhanāt
- 10
करौ विमृदितव्रीहेस्तस्यादावेव लक्षयेत्
अभिमन्त्र्यास्य करयोर्लोहपिण्डं ततो न्यसेत्
karau vimṛditavrīhestasyādāveva lakṣayet
abhimantryāsya karayorlohapiṇḍaṃ tato nyaset
- 11
त्वम् अग्ने सर्वभूतानाम् अन्तश्चरसि साक्षिवत्
त्वम् एवाग्ने विजानीषे न विदुर्यानि मानवाः
tvam agne sarvabhūtānām antaścarasi sākṣivat
tvam evāgne vijānīṣe na viduryāni mānavāḥ
- 12
व्यवहाराभिशस्तो ऽयं मानुषः शुद्धिम् इच्छति
तद् एनं संशयाद् अस्माद्धर्मतस्त्रातुम् अर्हसि
vyavahārābhiśasto 'yaṃ mānuṣaḥ śuddhim icchati
tad enaṃ saṃśayād asmāddharmatastrātum arhasi

