21 shlokas
- 1
अथ रहस्यप्रायश्चित्तानि भवन्ति
atha rahasyaprāyaścittāni bhavanti
- 2
स्रवन्तीम् आसाद्य स्नातः प्रत्यहं षोडश प्राणायामान्सलक्षणान्कृत्वैककालं हविष्याशी मासेन ब्रह्महा पूतो भवति
sravantīm āsādya snātaḥ pratyahaṃ ṣoḍaśa prāṇāyāmānsalakṣaṇānkṛtvaikakālaṃ haviṣyāśī māsena brahmahā pūto bhavati
- 3
कर्मणो ऽन्ते पयस्विनीं गां दद्यात्
karmaṇo 'nte payasvinīṃ gāṃ dadyāt
- 4
व्रतेनाघमर्षणेन च सुरापः पूतो भवति
vratenāghamarṣaṇena ca surāpaḥ pūto bhavati
- 5
गायत्रीदशसाहस्रजपेन सुवर्णस्तेयकृत्
gāyatrīdaśasāhasrajapena suvarṇasteyakṛt
- 6
त्रिरात्रोपोषितः पुरुषसूक्तजपहोमाभ्यां गुरुतल्पगः
trirātropoṣitaḥ puruṣasūktajapahomābhyāṃ gurutalpagaḥ
- 7
यथाश्वमेधः क्रतुराट्सर्वपापापनोदकः
तथाघमर्षणं सूक्तं सर्वपापापनोदकम्
yathāśvamedhaḥ kraturāṭsarvapāpāpanodakaḥ
tathāghamarṣaṇaṃ sūktaṃ sarvapāpāpanodakam
- 8
प्राणायामं द्विजः कुर्यात्सर्वपापापनुत्तये
दह्यन्ते सर्वपापानि प्राणायामैर्द्विजस्य तु
prāṇāyāmaṃ dvijaḥ kuryātsarvapāpāpanuttaye
dahyante sarvapāpāni prāṇāyāmairdvijasya tu
- 9
सव्याहृतिं सप्रणवां गायत्रीं शिरसा सह
त्रिः पठेद् आयतप्राणः प्राणायामः स उच्यते
savyāhṛtiṃ sapraṇavāṃ gāyatrīṃ śirasā saha
triḥ paṭhed āyataprāṇaḥ prāṇāyāmaḥ sa ucyate
- 10
अकारं चाप्युकारं च मकारं च प्रजापतिः
वेदत्रयान्निरदुहद्भूर्भुवः स्वर् इतीति च
akāraṃ cāpyukāraṃ ca makāraṃ ca prajāpatiḥ
vedatrayānniraduhadbhūrbhuvaḥ svar itīti ca
- 11
त्रिभ्य एव तु वेदेभ्यः पादं पादम् अदूदुहत्
तद् इत्य् ऋचो ऽस्याः सावित्र्याः परमेष्ठी प्रजापतिः
tribhya eva tu vedebhyaḥ pādaṃ pādam adūduhat
tad ity ṛco 'syāḥ sāvitryāḥ parameṣṭhī prajāpatiḥ
- 12
एतद् अक्षरम् एतां च जपन्व्याहृतिपूर्विकाम्
संध्ययोर्वेदविद्विप्रो वेदपुण्येन युज्यते
etad akṣaram etāṃ ca japanvyāhṛtipūrvikām
saṃdhyayorvedavidvipro vedapuṇyena yujyate
- 13
सहस्रकृत्वस्त्वभ्यस्य बहिर् एतत्त्रिकं द्विजः
महतो ऽप्येनसो मासात्त्वचेवाहिर्विमुच्यते
sahasrakṛtvastvabhyasya bahir etattrikaṃ dvijaḥ
mahato 'pyenaso māsāttvacevāhirvimucyate
- 14
एतत्त्रयविसंयुक्तः काले च क्रियया स्वया
विप्रक्षत्रियविड्जातिर्गर्हणां याति साधुषु
etattrayavisaṃyuktaḥ kāle ca kriyayā svayā
viprakṣatriyaviḍjātirgarhaṇāṃ yāti sādhuṣu
- 15
ॐकारपूर्विकास्तिस्रो महाव्याहृतयो ऽव्ययाः
त्रिपदा चैव गायत्री विज्ञेया ब्राह्मणो मुखम्
oṃkārapūrvikāstisro mahāvyāhṛtayo 'vyayāḥ
tripadā caiva gāyatrī vijñeyā brāhmaṇo mukham
- 16
यो ऽधीते ऽहन्यहन्येतां त्रीणि वर्षाण्यतन्द्रितः
स ब्रह्म परम् अभ्येति वायुभूतः खमूर्तिमान्
yo 'dhīte 'hanyahanyetāṃ trīṇi varṣāṇyatandritaḥ
sa brahma param abhyeti vāyubhūtaḥ khamūrtimān
- 17
एकाक्षरं परं ब्रह्म प्राणायामाः परं तपः
सावित्र्यास्तु परं नान्यन्मौनात्सत्यं विशिष्यते
ekākṣaraṃ paraṃ brahma prāṇāyāmāḥ paraṃ tapaḥ
sāvitryāstu paraṃ nānyanmaunātsatyaṃ viśiṣyate
- 18
क्षरन्ति सर्वा वैदिक्यो जुहोतियजतिक्रियाः
अक्षरं त्वक्षरं ज्ञेयं ब्रह्मा चैव प्रजापतिः
kṣaranti sarvā vaidikyo juhotiyajatikriyāḥ
akṣaraṃ tvakṣaraṃ jñeyaṃ brahmā caiva prajāpatiḥ
- 19
विधियज्ञाज्जपयज्ञो विशिष्टो दशभिर्गुणैः
उपांशुः स्याच्छतगुणः सहस्रो मानसः स्मृतः
vidhiyajñājjapayajño viśiṣṭo daśabhirguṇaiḥ
upāṃśuḥ syācchataguṇaḥ sahasro mānasaḥ smṛtaḥ
- 20
ये पाकयज्ञाश्चत्वारो विधियज्ञसमन्विताः
ते सर्वे जपयज्ञस्य कलां नार्हन्ति षोडशीम्
ye pākayajñāścatvāro vidhiyajñasamanvitāḥ
te sarve japayajñasya kalāṃ nārhanti ṣoḍaśīm
- 21
जप्येनैव तु संसिध्येद्ब्राह्मणो नात्र संशयः
कुर्याद् अन्यन्न वा कुर्यान्मैत्रो ब्राह्मण उच्यते
japyenaiva tu saṃsidhyedbrāhmaṇo nātra saṃśayaḥ
kuryād anyanna vā kuryānmaitro brāhmaṇa ucyate

