17 shlokas
- 1
सुवर्णस्तेयकृद्राज्ञे कर्माचक्षाणो मुसलम् अर्पयेत्
suvarṇasteyakṛdrājñe karmācakṣāṇo musalam arpayet
- 2
वधात्त्यागाद्वा प्रयतो भवति
vadhāttyāgādvā prayato bhavati
- 3
महाव्रतं द्वादशाब्दानि वा कुर्यात्
mahāvrataṃ dvādaśābdāni vā kuryāt
- 4
निक्षेपापहारी च
nikṣepāpahārī ca
- 5
धान्यधनापहारी च कृच्छ्रम् अब्दम्
dhānyadhanāpahārī ca kṛcchram abdam
- 6
मनुष्यस्त्रीकूपक्षेत्रवापीनाम् अपहारे चान्द्रायणम्
manuṣyastrīkūpakṣetravāpīnām apahāre cāndrāyaṇam
- 7
द्रव्याणाम् अल्पसाराणां सांतपनम्
dravyāṇām alpasārāṇāṃ sāṃtapanam
- 8
भक्ष्यभोज्ययानशय्यासनपुष्पमूलफलानां पञ्चगव्यपानम्
bhakṣyabhojyayānaśayyāsanapuṣpamūlaphalānāṃ pañcagavyapānam
- 9
तृणकाष्ठद्रुमशुष्कान्नगुडवस्त्रचर्मामिषाणां त्रिरात्रम् उपवसेत्
tṛṇakāṣṭhadrumaśuṣkānnaguḍavastracarmāmiṣāṇāṃ trirātram upavaset
- 10
मणिमुक्ताप्रवालताम्ररजतायःकांस्यानां द्वादशाहं कणान् अश्नीयात्
maṇimuktāpravālatāmrarajatāyaḥkāṃsyānāṃ dvādaśāhaṃ kaṇān aśnīyāt
- 11
कार्पासकीटजोर्णाद्यपहरणे त्रिरात्रं पयसा वर्तेत
kārpāsakīṭajorṇādyapaharaṇe trirātraṃ payasā varteta
- 12
द्विशफैकशफापहरणे द्विरात्रम् उपवसेत्
dviśaphaikaśaphāpaharaṇe dvirātram upavaset
- 13
पक्षिगन्धौषधिरज्जुवैदलानाम् अपहरणे दिनम् उपवसेत्
pakṣigandhauṣadhirajjuvaidalānām apaharaṇe dinam upavaset
- 14
दत्त्वैवापहृतं द्रव्यं धनिकस्याप्य् उपायतः
प्रायश्चित्तं ततः कुर्यात्कल्मषस्यापनुत्तये
dattvaivāpahṛtaṃ dravyaṃ dhanikasyāpy upāyataḥ
prāyaścittaṃ tataḥ kuryātkalmaṣasyāpanuttaye
- 15
यद्यत्परेभ्यस्त्व् आदद्यात्पुरुषस्तु निरङ्कुशः
तेन तेन विहीनः स्याद्यत्र यत्राभिजायते
yadyatparebhyastv ādadyātpuruṣastu niraṅkuśaḥ
tena tena vihīnaḥ syādyatra yatrābhijāyate
- 16
जीवितं धर्मकामौ च धने यस्मात्प्रतिष्ठितौ
तस्मात्सर्वप्रयत्नेन धनहिंसां विवर्जयेत्
jīvitaṃ dharmakāmau ca dhane yasmātpratiṣṭhitau
tasmātsarvaprayatnena dhanahiṃsāṃ vivarjayet
- 17
प्राणिहिंसापरो यस्तु धनहिंसापरस्तथा
महद्दुःखम् अवाप्नोति धनहिंसापरस्तयोः
prāṇihiṃsāparo yastu dhanahiṃsāparastathā
mahadduḥkham avāpnoti dhanahiṃsāparastayoḥ

