33 shlokas
- 1
अथातो मिश्रकमध्यायं व्याख्यास्यामः
athāto miśrakamadhyāyaṃ vyākhyāsyāmaḥ
- 2
यथोवाच भगवान्धन्वन्तरिः
yathovāca bhagavāndhanvantariḥ
- 3
मातुलुङ्गाग्निमन्थौ च भद्रदारु महौषधम्
अहिंस्रा चैव रास्ना च प्रलेपो वातशोफजित्
mātuluṅgāgnimanthau ca bhadradāru mahauṣadham
ahiṃsrā caiva rāsnā ca pralepo vātaśophajit
- 4
दूर्वा च नलमूलं च मधुकं चन्दनं तथा
शीतलाश्च गणाः सर्वे प्रलेपः पित्तशोफहृत्
dūrvā ca nalamūlaṃ ca madhukaṃ candanaṃ tathā
śītalāśca gaṇāḥ sarve pralepaḥ pittaśophahṛt
- 5
आगन्तुजे रक्तजे च ह्य् एष एव विधिः स्मृतः
विधिर्विषघ्नो विषजे पित्तघ्नो ऽपि हितस्तथा
āgantuje raktaje ca hy eṣa eva vidhiḥ smṛtaḥ
vidhirviṣaghno viṣaje pittaghno 'pi hitastathā
- 6
अजगन्धाश्वगन्धा च काला सरलया सह
एकैषिकाजशृङ्गी च प्रलेपः श्लेष्मशोफहृत्
ajagandhāśvagandhā ca kālā saralayā saha
ekaiṣikājaśṛṅgī ca pralepaḥ śleṣmaśophahṛt
- 7
एते वर्गास्त्रयो लोध्रं पथ्या पिण्डीतकानि च
अनन्ता चेति लेपो ऽयं सान्निपातिकशोफहृत्
ete vargāstrayo lodhraṃ pathyā piṇḍītakāni ca
anantā ceti lepo 'yaṃ sānnipātikaśophahṛt
- 8
स्निग्धाम्ललवणो वाते कोष्णः शीतः पयोयुतः
पित्ते चोष्णः कफे क्षारमूत्राढ्यस्तत्प्रशान्तये
snigdhāmlalavaṇo vāte koṣṇaḥ śītaḥ payoyutaḥ
pitte coṣṇaḥ kaphe kṣāramūtrāḍhyastatpraśāntaye
- 9
शणमूलकशिग्रूणां फलानि तिलसर्षपाः
सक्तवः किण्वमतसी द्रव्याण्युष्णानि पाचनम्
śaṇamūlakaśigrūṇāṃ phalāni tilasarṣapāḥ
saktavaḥ kiṇvamatasī dravyāṇyuṣṇāni pācanam
- 10
चिरबिल्वो ऽग्निको दन्ती चित्रको हयमारकः
कपोतगृध्रकङ्काणां पुरीषाणि च दारणम्
क्षारद्रव्याणि वा यानि क्षारो वा दारणं परम्
cirabilvo 'gniko dantī citrako hayamārakaḥ
kapotagṛdhrakaṅkāṇāṃ purīṣāṇi ca dāraṇam
kṣāradravyāṇi vā yāni kṣāro vā dāraṇaṃ param
- 11
द्रव्याणां पिच्छिलानां तु त्वङ्मूलानि प्रपीडनम्
यवगोधूममाषाणां चूर्णानि च समासतः
dravyāṇāṃ picchilānāṃ tu tvaṅmūlāni prapīḍanam
yavagodhūmamāṣāṇāṃ cūrṇāni ca samāsataḥ
- 12
शङ्खिन्यङ्कोठसुमनःकरवीरसुवर्चलाः
शोधनानि कषायाणि वर्गश्चारग्वधादिकः
śaṅkhinyaṅkoṭhasumanaḥkaravīrasuvarcalāḥ
śodhanāni kaṣāyāṇi vargaścāragvadhādikaḥ
- 13
अजगन्धाजशृङ्गी च गवाक्षी लाङ्गलाह्वया
पूतीकश्चित्रकः पाठा विडङ्गैलाहरेणवः
ajagandhājaśṛṅgī ca gavākṣī lāṅgalāhvayā
pūtīkaścitrakaḥ pāṭhā viḍaṅgailāhareṇavaḥ
- 14
कटुत्रिकं यवक्षारो लवणानि मनःशिला
कासीसं त्रिवृता दन्ती हरितालं सुराष्ट्रजा
kaṭutrikaṃ yavakṣāro lavaṇāni manaḥśilā
kāsīsaṃ trivṛtā dantī haritālaṃ surāṣṭrajā
- 15
संशोधनीनां वर्तीनां द्रव्याण्येतानि निर्दिशेत्
एतैर् एवौषधैः कुर्यात्कल्कान् अपि च शोधनान्
saṃśodhanīnāṃ vartīnāṃ dravyāṇyetāni nirdiśet
etair evauṣadhaiḥ kuryātkalkān api ca śodhanān
- 16
अर्कोत्तमां स्नुहीक्षीरं पिष्ट्वा क्षारोत्तमान् अपि
जातीमूलं हरिद्रे द्वे कासीसं कटुरोहिणीम्
arkottamāṃ snuhīkṣīraṃ piṣṭvā kṣārottamān api
jātīmūlaṃ haridre dve kāsīsaṃ kaṭurohiṇīm
- 17
पूर्वोद्दिष्टानि चान्यानि कुर्यात्संशोधनं घृतम्
मयूरको राजवृक्षो निम्बः कोशातकी तिलाः
pūrvoddiṣṭāni cānyāni kuryātsaṃśodhanaṃ ghṛtam
mayūrako rājavṛkṣo nimbaḥ kośātakī tilāḥ
- 18
बृहती कण्टकारी च हरितालं मनःशिला
शोधनानि च योज्यानि तैले द्रव्याणि शोधने
bṛhatī kaṇṭakārī ca haritālaṃ manaḥśilā
śodhanāni ca yojyāni taile dravyāṇi śodhane
- 19
कासीसे सैन्धवे किण्वे वचायां रजनीद्वये
शोधनाङ्गेषु चान्येषु चूर्णं कुर्वीत शोधनम्
kāsīse saindhave kiṇve vacāyāṃ rajanīdvaye
śodhanāṅgeṣu cānyeṣu cūrṇaṃ kurvīta śodhanam
- 20
सालसारादिसारेषु पटोलत्रिफलासु च
रसक्रिया विधातव्या शोधनी शोधनेषु च
sālasārādisāreṣu paṭolatriphalāsu ca
rasakriyā vidhātavyā śodhanī śodhaneṣu ca
- 21
श्रीवेष्टके सर्जरसे सरले देवदारुणि
सारेष्व् अपि च कुर्वीत मतिमान्व्रणधूपनम्
śrīveṣṭake sarjarase sarale devadāruṇi
sāreṣv api ca kurvīta matimānvraṇadhūpanam
- 22
कषायाणामनुष्णानां वृक्षाणां त्वक्षु साधितम्
शृतं शीतं कषायं वा रोपणार्थेषु शस्यते
kaṣāyāṇāmanuṣṇānāṃ vṛkṣāṇāṃ tvakṣu sādhitam
śṛtaṃ śītaṃ kaṣāyaṃ vā ropaṇārtheṣu śasyate
- 23
सोमामृताश्वगन्धासु काकोल्यादौ गणे तथा
क्षीरिप्ररोहेष्व् अपि च वर्तयो रोपणाः स्मृताः
somāmṛtāśvagandhāsu kākolyādau gaṇe tathā
kṣīripraroheṣv api ca vartayo ropaṇāḥ smṛtāḥ
- 24
समङ्गा सोमसरला सोमवल्कः सचन्दनः
काकोल्यादिश्च कल्कः स्यात्प्रशस्तो व्रणरोपणे
samaṅgā somasaralā somavalkaḥ sacandanaḥ
kākolyādiśca kalkaḥ syātpraśasto vraṇaropaṇe
- 25
पृथक्पर्ण्यात्मगुप्ता च हरिद्रे मालती सिता
काकोल्यादिश्च योज्यः स्याद्भिषजा रोपणे घृते
pṛthakparṇyātmaguptā ca haridre mālatī sitā
kākolyādiśca yojyaḥ syādbhiṣajā ropaṇe ghṛte
- 26
कालानुसार्यागुरुणी हरिद्रे देवदारु च
प्रियङ्गवश्च रोध्रं च तैले योज्यानि रोपणे
kālānusāryāguruṇī haridre devadāru ca
priyaṅgavaśca rodhraṃ ca taile yojyāni ropaṇe
- 27
कङ्गुका त्रिफला रोध्रं कासीसं श्रवणाह्वया
धवाश्वकर्णयोस्त्वक्च रोपणं चूर्णमिष्यते
kaṅgukā triphalā rodhraṃ kāsīsaṃ śravaṇāhvayā
dhavāśvakarṇayostvakca ropaṇaṃ cūrṇamiṣyate
- 28
प्रियङ्गुका सर्जरसः पुष्पकासीसम् एव च
त्वक्चूर्णं धवजं चैव रोपणार्थं प्रशस्यते
priyaṅgukā sarjarasaḥ puṣpakāsīsam eva ca
tvakcūrṇaṃ dhavajaṃ caiva ropaṇārthaṃ praśasyate
- 29
त्वक्षु न्यग्रोधवर्गस्य त्रिफलायास्तथैव च
रसक्रियां रोपणार्थे विदधीत यथाक्रमम्
tvakṣu nyagrodhavargasya triphalāyāstathaiva ca
rasakriyāṃ ropaṇārthe vidadhīta yathākramam
- 30
अपामार्गो ऽश्वगन्धा च तालपत्री सुवर्चला
उत्सादने प्रशस्यन्ते काकोल्यादिश्च यो गणः
apāmārgo 'śvagandhā ca tālapatrī suvarcalā
utsādane praśasyante kākolyādiśca yo gaṇaḥ

