17 shlokas
- 1
पराशर उवाच
कंसस्तत उद्विग्नमनाः प्राह सर्वान्महासुरान्
प्रलम्बकेशिप्रमुखानाहूयासुरपुंगवान्
parāśara uvāca
kaṃsastata udvignamanāḥ prāha sarvānmahāsurān
pralambakeśipramukhānāhūyāsurapuṃgavān
- 2
कंस उवाच
हे प्रलम्ब महाबाहो केशिन्धेनुक पूतने
अरिष्टाद्यैस्तथा चान्यैः श्रूयतां वचनं मम
kaṃsa uvāca
he pralamba mahābāho keśindhenuka pūtane
ariṣṭādyaistathā cānyaiḥ śrūyatāṃ vacanaṃ mama
- 3
मां हन्तुममरैर्यत्नः कृतः किल दुरात्मभिः
मद्वीर्यतापितैर्वीरा न त्वेतान्गणयाम्यहम्
māṃ hantumamarairyatnaḥ kṛtaḥ kila durātmabhiḥ
madvīryatāpitairvīrā na tvetāngaṇayāmyaham
- 4
किमिन्द्रेणाल्पवीर्येण किं हरेणैकचारिणा
हरिणा वापि किं साध्यं छिद्रेष्वसुरघातिना
kimindreṇālpavīryeṇa kiṃ hareṇaikacāriṇā
hariṇā vāpi kiṃ sādhyaṃ chidreṣvasuraghātinā
- 5
किमादित्यैः सवसुभिरल्पवीर्यैः किमग्निभिः
किं वान्यैरमरैः सर्वैर्मद्बाहुबलनिर्जितैः
kimādityaiḥ savasubhiralpavīryaiḥ kimagnibhiḥ
kiṃ vānyairamaraiḥ sarvairmadbāhubalanirjitaiḥ
- 6
किं न दृष्टो ऽमरपतिर्मया संयुगमेत्य सः
पृष्ठेनैव वहन्बाणानपागच्छन्न वक्षसा
kiṃ na dṛṣṭo 'marapatirmayā saṃyugametya saḥ
pṛṣṭhenaiva vahanbāṇānapāgacchanna vakṣasā
- 7
मद्राष्ट्रे वारिता वृष्टिर्यदा शक्रेण किं तदा
मद्बाणभिन्नैर्जलदैरापो मुक्ता यथेप्सिताः
madrāṣṭre vāritā vṛṣṭiryadā śakreṇa kiṃ tadā
madbāṇabhinnairjaladairāpo muktā yathepsitāḥ
- 8
किमुर्व्यामवनीपाला मद्बाहुबलभीरवः
न सर्वे सन्नतिं याता जरासंधमृते गुरुम्
kimurvyāmavanīpālā madbāhubalabhīravaḥ
na sarve sannatiṃ yātā jarāsaṃdhamṛte gurum
- 9
अमरेषु ममावज्ञा जायते दैत्यपुंगवाः
हास्यं मे जायते वीरास्तेषु यत्नपरेष्वपि
amareṣu mamāvajñā jāyate daityapuṃgavāḥ
hāsyaṃ me jāyate vīrāsteṣu yatnapareṣvapi
- 10
तथापि खलु दुष्टानां तेषामभ्यधिकं मया
अपकाराय दैत्येन्द्रा यतनीयं दुरात्मनाम्
tathāpi khalu duṣṭānāṃ teṣāmabhyadhikaṃ mayā
apakārāya daityendrā yatanīyaṃ durātmanām
- 11
तद्ये तपस्विनः केचित्पृथिव्यां ये च यज्विनः
कार्यो देवापकाराय तेषां सर्वात्मना वधः
tadye tapasvinaḥ kecitpṛthivyāṃ ye ca yajvinaḥ
kāryo devāpakārāya teṣāṃ sarvātmanā vadhaḥ
- 12
उत्पन्नश्चापि मृत्युर्मे भूतपूर्वश्च मे किल
इत्येतद्बालिका प्राह देवकीगर्भसंभवा
utpannaścāpi mṛtyurme bhūtapūrvaśca me kila
ityetadbālikā prāha devakīgarbhasaṃbhavā
- 13
तस्माद्बालेषु परमो यत्नः कार्यो महीतले
यत्रोद्रिक्तं बलं बाले स हन्तव्यः प्रयत्नतः
tasmādbāleṣu paramo yatnaḥ kāryo mahītale
yatrodriktaṃ balaṃ bāle sa hantavyaḥ prayatnataḥ
- 14
इत्याज्ञाप्यासुरान्कंसः प्रविश्यात्मगृहं ततः
मुमोच वसुदेवं च देवकीं च निरोधतः
ityājñāpyāsurānkaṃsaḥ praviśyātmagṛhaṃ tataḥ
mumoca vasudevaṃ ca devakīṃ ca nirodhataḥ
- 15
कंस उवाच
युवयोर्घातिता गर्भा वृथैवैते मयाधुना
को ऽप्यन्य एव नाशाय बालो मम समुद्गतः
kaṃsa uvāca
yuvayorghātitā garbhā vṛthaivaite mayādhunā
ko 'pyanya eva nāśāya bālo mama samudgataḥ
- 16
तदलं परितापेन नूनं तद्भाविनो हि ते
अर्भका युवयोः को वा नायुषो ऽन्ते विहन्यते
tadalaṃ paritāpena nūnaṃ tadbhāvino hi te
arbhakā yuvayoḥ ko vā nāyuṣo 'nte vihanyate
- 17
पराशर उवाच
इत्याश्वास्य विमुक्त्वा च कंसस्तौ परिशङ्कितः
अन्तर्गृहं द्विजश्रेष्ठ प्रविवेश पुनः स्वकम्
parāśara uvāca
ityāśvāsya vimuktvā ca kaṃsastau pariśaṅkitaḥ
antargṛhaṃ dvijaśreṣṭha praviveśa punaḥ svakam

