70 shlokas
- 1
पराशर उवाच
एवं दैत्यवधं कृष्णो बलदेवसहायवान्
चक्रे दुष्टक्षितीशानां तथैव जगतः कृते
parāśara uvāca
evaṃ daityavadhaṃ kṛṣṇo baladevasahāyavān
cakre duṣṭakṣitīśānāṃ tathaiva jagataḥ kṛte
- 2
क्षितेश्च भारं भगवान्फाल्गुनेन समं विभुः
अवतारयामास हरिः समस्ताक्षौहिणीवधात्
kṣiteśca bhāraṃ bhagavānphālgunena samaṃ vibhuḥ
avatārayāmāsa hariḥ samastākṣauhiṇīvadhāt
- 3
कृत्वा भारावतरणं भुवो हत्वाखिलान्नृपान्
शापव्याजेन विप्राणामुपसंहृतवान्कुलम्
kṛtvā bhārāvataraṇaṃ bhuvo hatvākhilānnṛpān
śāpavyājena viprāṇāmupasaṃhṛtavānkulam
- 4
उत्सृज्य द्वारकां कृष्णस्त्यक्त्वा मानुष्यमात्मभूः
सांशो विष्णुमयं स्थानं प्रविवेश पुनर्निजम्
utsṛjya dvārakāṃ kṛṣṇastyaktvā mānuṣyamātmabhūḥ
sāṃśo viṣṇumayaṃ sthānaṃ praviveśa punarnijam
- 5
मैत्रेय उवाच
स विप्रशापव्याजेन संजह्रे स्वकुलं कथम्
कथं च मानुषं देहमुत्ससर्ज जनार्दनः
maitreya uvāca
sa vipraśāpavyājena saṃjahre svakulaṃ katham
kathaṃ ca mānuṣaṃ dehamutsasarja janārdanaḥ
- 6
पराशर उवाच
विश्वामित्रस्तथा कण्वो नारदश्च महामुनिः
पिण्डारके महातीर्थे दृष्ट्वा यदुकुमारकैः
parāśara uvāca
viśvāmitrastathā kaṇvo nāradaśca mahāmuniḥ
piṇḍārake mahātīrthe dṛṣṭvā yadukumārakaiḥ
- 7
ततस्ते यौवनोन्मत्ता भाविकार्यप्रचोदिताः
साम्बं जाम्बवतीपुत्रं भूषयित्वा स्त्रियं यथा
tataste yauvanonmattā bhāvikāryapracoditāḥ
sāmbaṃ jāmbavatīputraṃ bhūṣayitvā striyaṃ yathā
- 8
प्रसृतास्तान्मुनीनूचुः प्रणिपातपुरःसरम्
इयं स्त्री पुत्रकामस्य बभ्रोः किं जनयिष्यति
prasṛtāstānmunīnūcuḥ praṇipātapuraḥsaram
iyaṃ strī putrakāmasya babhroḥ kiṃ janayiṣyati
- 9
पराशर उवाच
दिव्यज्ञानोपपन्नास्ते विप्रलब्धाः कुमारकैः
मुनयः कुपिताः प्रोचुर्मुसलं जनयिष्यति
येनाखिलकुलोत्सादो यादवानां भविष्यति
parāśara uvāca
divyajñānopapannāste vipralabdhāḥ kumārakaiḥ
munayaḥ kupitāḥ procurmusalaṃ janayiṣyati
yenākhilakulotsādo yādavānāṃ bhaviṣyati
- 10
इत्युक्तास्तैः कुमारास्ते आचचक्षुर्यथातथम्
उग्रसेनाय मुसलं जज्ञे साम्बस्य चोदरात्
ityuktāstaiḥ kumārāste ācacakṣuryathātatham
ugrasenāya musalaṃ jajñe sāmbasya codarāt
- 11
तदुग्रसेनो मुसलमयश्चूर्णमकारयत्
जज्ञे स चैरकाश्चूर्णः प्रक्षिप्तस्तैर्महोदधौ
tadugraseno musalamayaścūrṇamakārayat
jajñe sa cairakāścūrṇaḥ prakṣiptastairmahodadhau
- 12
मुसलस्याथ लोहस्य चूर्णितस्यान्धकैर्द्विज
खण्डं चूर्णयितुं शेकुर्नैकं ते तोमराकृति
musalasyātha lohasya cūrṇitasyāndhakairdvija
khaṇḍaṃ cūrṇayituṃ śekurnaikaṃ te tomarākṛti
- 13
तदप्यम्बुनिधौ क्षिप्तं मत्स्यो जग्राह जालिभिः
घातितस्योदरात्तस्य लुब्धो जग्राह तं जराः
tadapyambunidhau kṣiptaṃ matsyo jagrāha jālibhiḥ
ghātitasyodarāttasya lubdho jagrāha taṃ jarāḥ
- 14
विज्ञातपरमार्थो ऽपि भगवान्मधुसूदनः
नैच्छत्तदन्यथाकर्तुं विधिना यत्समाहितम्
vijñātaparamārtho 'pi bhagavānmadhusūdanaḥ
naicchattadanyathākartuṃ vidhinā yatsamāhitam
- 15
देवैश्च प्रहितो दूतः प्रणिपत्याह केशवम्
रहस्येवमहं दूतः प्रहितो भगवन्सुरैः
devaiśca prahito dūtaḥ praṇipatyāha keśavam
rahasyevamahaṃ dūtaḥ prahito bhagavansuraiḥ
- 16
वस्वश्विमरुदादित्यरुद्रसाध्यादिभिः सह
विज्ञापयति वः शक्रस्तदिदं श्रूयतां प्रभो
vasvaśvimarudādityarudrasādhyādibhiḥ saha
vijñāpayati vaḥ śakrastadidaṃ śrūyatāṃ prabho
- 17
भारावतारणार्थाय वर्षाणामधिकं शतम्
भगवानवतीर्णो ऽत्र त्रिदशैः संप्रसादितः
bhārāvatāraṇārthāya varṣāṇāmadhikaṃ śatam
bhagavānavatīrṇo 'tra tridaśaiḥ saṃprasāditaḥ
- 18
दुर्वृत्ता निहता दैत्या भुवो भारो ऽवतारितः
त्वया सनाथास्त्रिदशा भवन्तु त्रिदिवे सदा
durvṛttā nihatā daityā bhuvo bhāro 'vatāritaḥ
tvayā sanāthāstridaśā bhavantu tridive sadā
- 19
तदतीतं जगन्नाथ वर्षाणामधिकं शतम्
इदानीं गम्यतां स्वर्गो भवता यदि रोचते
tadatītaṃ jagannātha varṣāṇāmadhikaṃ śatam
idānīṃ gamyatāṃ svargo bhavatā yadi rocate
- 20
देवैर्विज्ञाप्यते चेदं अथात्रैव रतिस्तव
तत्स्थीयतां यथाकालमाख्येयमनुजीविभिः
devairvijñāpyate cedaṃ athātraiva ratistava
tatsthīyatāṃ yathākālamākhyeyamanujīvibhiḥ
- 21
भगवान् उवाच
यत्त्वमात्थाखिलं दूत वेद्म्येतदहमप्युत
प्रारब्ध एव हि मया यादवानामपि क्षयः
bhagavān uvāca
yattvamātthākhilaṃ dūta vedmyetadahamapyuta
prārabdha eva hi mayā yādavānāmapi kṣayaḥ
- 22
भुवो नाद्यापि भारो ऽयं यादवैरनिबर्हितैः
अवतार्य करोम्येतत्सप्तरात्रेण सत्वरः
bhuvo nādyāpi bhāro 'yaṃ yādavairanibarhitaiḥ
avatārya karomyetatsaptarātreṇa satvaraḥ
- 23
यथा गृहीतम् अम्भोधेर्दत्त्वाहं द्वारकाभुवम्
यादवानुपसंहृत्य यास्यामि त्रिदशालयम्
yathā gṛhītam ambhodherdattvāhaṃ dvārakābhuvam
yādavānupasaṃhṛtya yāsyāmi tridaśālayam
- 24
मनुष्यदेहमुत्सृज्य संकर्षणसहायवान्
प्राप्त एवास्मि मन्तव्यो देवेन्द्रेण तथा सुरैः
manuṣyadehamutsṛjya saṃkarṣaṇasahāyavān
prāpta evāsmi mantavyo devendreṇa tathā suraiḥ
- 25
जरासंधादयो ये ऽन्ये निहता भारहेतवः
क्षितेस्तेभ्यः कुमारो ऽपि यदूनां नापचीयते
jarāsaṃdhādayo ye 'nye nihatā bhārahetavaḥ
kṣitestebhyaḥ kumāro 'pi yadūnāṃ nāpacīyate
- 26
तदेनं सुमहाभारमवतार्य क्षितेरहम्
यास्याम्यमरलोकस्य पालनाय ब्रवीहि तान्
tadenaṃ sumahābhāramavatārya kṣiteraham
yāsyāmyamaralokasya pālanāya bravīhi tān
- 27
पराशर उवाच
इत्युक्तो वासुदेवेन देवदूतः प्रणम्य तम्
मैत्रेय दिव्यया गत्या देवराजान्तिकं ययौ
parāśara uvāca
ityukto vāsudevena devadūtaḥ praṇamya tam
maitreya divyayā gatyā devarājāntikaṃ yayau
- 28
भगवानप्यथोत्पातान्दिव्यभौमान्तरिक्षगान्
ददर्श द्वारकापुर्यां विनाशाय दिवानिशम्
bhagavānapyathotpātāndivyabhaumāntarikṣagān
dadarśa dvārakāpuryāṃ vināśāya divāniśam
- 29
तान्दृष्ट्वा यादवानाह पश्यध्वमतिदारुणान्
महोत्पाताञ्छमायैषां प्रभासं याम माचिरम्
tāndṛṣṭvā yādavānāha paśyadhvamatidāruṇān
mahotpātāñchamāyaiṣāṃ prabhāsaṃ yāma māciram
- 30
पराशर उवाच
महाभागवतः प्राह प्रणिपत्योद्धवो हरिम्
भगवन्यन्मया कार्यं तदाज्ञापय साम्प्रतम्
मन्ये कुलमिदं सर्वं भगवान्संहरिष्यति
parāśara uvāca
mahābhāgavataḥ prāha praṇipatyoddhavo harim
bhagavanyanmayā kāryaṃ tadājñāpaya sāmpratam
manye kulamidaṃ sarvaṃ bhagavānsaṃhariṣyati

