25 shlokas
- 1
पराशर उवाच
महे प्रतिहते शक्रो मैत्रेयातिरुषान्वितः
संवर्तकं नाम गणं तोयदानामथाब्रवीत्
parāśara uvāca
mahe pratihate śakro maitreyātiruṣānvitaḥ
saṃvartakaṃ nāma gaṇaṃ toyadānāmathābravīt
- 2
भो भो मेघा निशम्यैतद्वचनं वदतो मम
आज्ञानन्तरमेवाशु क्रियतामविचारितम्
bho bho meghā niśamyaitadvacanaṃ vadato mama
ājñānantaramevāśu kriyatāmavicāritam
- 3
नन्दगोपः सुदुर्बुद्धिर्गोपैरन्यैः सहायवान्
कृष्णाश्रयबलाध्मातो महभङ्गमचीकरत्
nandagopaḥ sudurbuddhirgopairanyaiḥ sahāyavān
kṛṣṇāśrayabalādhmāto mahabhaṅgamacīkarat
- 4
आजीवो यः परस्तेषां गोपत्वस्य च कारणम्
ता गावो वृष्टिपातेन पीड्यन्तां वचनान्मम
ājīvo yaḥ parasteṣāṃ gopatvasya ca kāraṇam
tā gāvo vṛṣṭipātena pīḍyantāṃ vacanānmama
- 5
अहमप्यद्रिशृङ्गाभं तुङ्गमारुह्य वारणम्
साहाय्यं वः करिष्यामि वाय्वम्बूत्सर्गयोजितम्
ahamapyadriśṛṅgābhaṃ tuṅgamāruhya vāraṇam
sāhāyyaṃ vaḥ kariṣyāmi vāyvambūtsargayojitam
- 6
पराशर उवाच
इत्याज्ञप्ताः सुरेन्द्रेण मुमुचुस्ते बलाहकाः
वातवर्षं महाभीममभावाय गवां द्विज
parāśara uvāca
ityājñaptāḥ surendreṇa mumucuste balāhakāḥ
vātavarṣaṃ mahābhīmamabhāvāya gavāṃ dvija
- 7
ततः क्षणेन धरणी ककुभो ऽम्बरमेव च
एकं धारामहासारपूरणेनाभवन्मुने
tataḥ kṣaṇena dharaṇī kakubho 'mbarameva ca
ekaṃ dhārāmahāsārapūraṇenābhavanmune
- 8
विद्युल्लताकषाघातत्रस्तैरिव घनैर्घनम्
नादापूरितदिक्चक्रैर्धारासारम् अपात्यत
vidyullatākaṣāghātatrastairiva ghanairghanam
nādāpūritadikcakrairdhārāsāram apātyata
- 9
अन्धकारीकृते लोके वर्षद्भिरनिशं घनैः
अधश्चोर्ध्वं च तिर्यक्च जगदाप्यमिवाभवत्
andhakārīkṛte loke varṣadbhiraniśaṃ ghanaiḥ
adhaścordhvaṃ ca tiryakca jagadāpyamivābhavat
- 10
गावस्तु तेन पतता वर्षवातेन वेगिना
धूताः प्राणाञ्जहुः सन्नत्रिकसक्थिशिरोधराः
gāvastu tena patatā varṣavātena veginā
dhūtāḥ prāṇāñjahuḥ sannatrikasakthiśirodharāḥ
- 11
क्रोडेन वत्सानाक्रम्य तस्थुरन्या महामुने
गावो विवत्साश्च कृता वारिपूरेण चापराः
kroḍena vatsānākramya tasthuranyā mahāmune
gāvo vivatsāśca kṛtā vāripūreṇa cāparāḥ
- 12
वत्साश्च दीनवदनाः पवनाकम्पिकन्धराः
त्राहि त्राहीत्यल्पशब्दाः कृष्णमूचुरिवार्तकाः
vatsāśca dīnavadanāḥ pavanākampikandharāḥ
trāhi trāhītyalpaśabdāḥ kṛṣṇamūcurivārtakāḥ
- 13
ततस्तद्गोकुलं सर्वं गोगोपीगोपसंकुलम्
अतीवार्तं हरिर्दृष्ट्वा मैत्रेयाचिन्तयत्तदा
tatastadgokulaṃ sarvaṃ gogopīgopasaṃkulam
atīvārtaṃ harirdṛṣṭvā maitreyācintayattadā
- 14
एतत्कृतं महेन्द्रेण महभङ्गविरोधिना
तदेतदखिलं गोष्ठं त्रातव्यमधुना मया
etatkṛtaṃ mahendreṇa mahabhaṅgavirodhinā
tadetadakhilaṃ goṣṭhaṃ trātavyamadhunā mayā
- 15
इममद्रिमहं धैर्यादुत्पाट्योरुशिलाघनम्
धारयिष्यामि गोष्ठस्य पृथुच्छत्रमिवोपरि
imamadrimahaṃ dhairyādutpāṭyoruśilāghanam
dhārayiṣyāmi goṣṭhasya pṛthucchatramivopari
- 16
पराशर उवाच
इति कृत्वा मतिं कृष्णो गोवर्धनमहीधरम्
उत्पाट्यैककरेणैव धारयामास लीलया
parāśara uvāca
iti kṛtvā matiṃ kṛṣṇo govardhanamahīdharam
utpāṭyaikakareṇaiva dhārayāmāsa līlayā
- 17
गोपांश्चाह जगन्नाथः समुत्पाटितभूधरः
विशध्वमत्र सहिताः कृतं वर्षनिवारणम्
gopāṃścāha jagannāthaḥ samutpāṭitabhūdharaḥ
viśadhvamatra sahitāḥ kṛtaṃ varṣanivāraṇam
- 18
सुनिवातेषु देशेषु यथाजोषमिहास्यताम्
प्रविश्यतां न भेतव्यं गिरिपातस्य निर्भयैः
sunivāteṣu deśeṣu yathājoṣamihāsyatām
praviśyatāṃ na bhetavyaṃ giripātasya nirbhayaiḥ
- 19
इत्युक्तास्तेन ते गोपा विविशुर्गोधनैः सह
शकटारोपितैर्भाण्डैर्गोप्यश्चासारपीडिताः
ityuktāstena te gopā viviśurgodhanaiḥ saha
śakaṭāropitairbhāṇḍairgopyaścāsārapīḍitāḥ
- 20
कृष्णो ऽपि तं दधारैव शैलमत्यन्तनिश्चलम्
व्रजौकोवासिभिर्हर्षविस्मिताक्षैर्निरीक्षितः
kṛṣṇo 'pi taṃ dadhāraiva śailamatyantaniścalam
vrajaukovāsibhirharṣavismitākṣairnirīkṣitaḥ
- 21
गोपगोपीजनैर्हृष्टैः प्रीतिविस्तारितेक्षणैः
संस्तूयमानचरितः कृष्णः शैलमधारयत्
gopagopījanairhṛṣṭaiḥ prītivistāritekṣaṇaiḥ
saṃstūyamānacaritaḥ kṛṣṇaḥ śailamadhārayat
- 22
सप्तरात्रं महामेघा ववर्षुर्नन्दगोकुले
इन्द्रेण चोदिता विप्र गोपानां नाशकारिणः
saptarātraṃ mahāmeghā vavarṣurnandagokule
indreṇa coditā vipra gopānāṃ nāśakāriṇaḥ
- 23
ततो धृते महाशैले परित्राते च गोकुले
मिथ्याप्रतिज्ञो बलभिद्वारयामास तान्घनान्
tato dhṛte mahāśaile paritrāte ca gokule
mithyāpratijño balabhidvārayāmāsa tānghanān
- 24
व्यभ्रे नभसि देवेन्द्रे वितथात्मवचस्यथ
निष्क्रम्य गोकुलं हृष्टं स्वस्थानं पुनरागमत्
vyabhre nabhasi devendre vitathātmavacasyatha
niṣkramya gokulaṃ hṛṣṭaṃ svasthānaṃ punarāgamat
- 25
मुमोच कृष्णो ऽपि तदा गोवर्धनमहाचलम्
स्वस्थाने विस्मितमुखैर्दृष्टस्तैस्तु व्रजौकसैः
mumoca kṛṣṇo 'pi tadā govardhanamahācalam
svasthāne vismitamukhairdṛṣṭastaistu vrajaukasaiḥ

