29 shlokas
- 1
पराशर उवाच
एवमन्तर्जले विष्णुमभिष्टूय स यादवः
अर्चयामास सर्वेशं पुष्पधूपैर्मनोमयैः
parāśara uvāca
evamantarjale viṣṇumabhiṣṭūya sa yādavaḥ
arcayāmāsa sarveśaṃ puṣpadhūpairmanomayaiḥ
- 2
परित्यक्तान्यविषयं मनस्तत्र निवेश्य सः
ब्रह्मभूते चिरं स्थित्वा विरराम समाधितः
parityaktānyaviṣayaṃ manastatra niveśya saḥ
brahmabhūte ciraṃ sthitvā virarāma samādhitaḥ
- 3
कृतकृत्यमिवात्मानं मन्यमानो महामतिः
आजगाम रथं भूयो निर्गम्य यमुनाम्भसः
kṛtakṛtyamivātmānaṃ manyamāno mahāmatiḥ
ājagāma rathaṃ bhūyo nirgamya yamunāmbhasaḥ
- 4
रामकृष्णौ च ददृशे यथापूर्वं रथे स्थितौ
विस्मिताक्षस्तदाक्रूरस्तं च कृष्णो ऽभ्यभाषत
rāmakṛṣṇau ca dadṛśe yathāpūrvaṃ rathe sthitau
vismitākṣastadākrūrastaṃ ca kṛṣṇo 'bhyabhāṣata
- 5
नूनं ते दृष्टमाश्चर्यमक्रूर यमुनाजले
विस्मयोत्फुल्लनयनो भवान्संलक्ष्यते यतः
nūnaṃ te dṛṣṭamāścaryamakrūra yamunājale
vismayotphullanayano bhavānsaṃlakṣyate yataḥ
- 6
अक्रूर उवाच
अन्तर्जले यदाश्चर्यं दृष्टं तत्र मयाच्युत
तदत्रापि हि पश्यामि मूर्तिमत्पुरतः स्थितम्
akrūra uvāca
antarjale yadāścaryaṃ dṛṣṭaṃ tatra mayācyuta
tadatrāpi hi paśyāmi mūrtimatpurataḥ sthitam
- 7
जगदेतन्महाश्चर्यं रूपं यस्य महात्मनः
तेनाश्चर्यपरेणाहं भवता कृष्ण संगतः
jagadetanmahāścaryaṃ rūpaṃ yasya mahātmanaḥ
tenāścaryapareṇāhaṃ bhavatā kṛṣṇa saṃgataḥ
- 8
तत्किम् एतेन मथुरां प्रयामो मधुसूदन
बिभेमि कंसाद्धिग्जन्म परपिण्डोपजीविनाम्
tatkim etena mathurāṃ prayāmo madhusūdana
bibhemi kaṃsāddhigjanma parapiṇḍopajīvinām
- 9
इत्युक्त्वा चोदयामास तान्हयान्वातरंहसः
सम्प्राप्तश्चातिसायाह्ने सो ऽक्रूरो मथुरां पुरीम्
ityuktvā codayāmāsa tānhayānvātaraṃhasaḥ
samprāptaścātisāyāhne so 'krūro mathurāṃ purīm
- 10
विलोक्य मथुरां रामं रामं चाह स यादवः
पद्भ्यां यातं महावीर्यौ रथेनैको विशाम्यहम्
vilokya mathurāṃ rāmaṃ rāmaṃ cāha sa yādavaḥ
padbhyāṃ yātaṃ mahāvīryau rathenaiko viśāmyaham
- 11
गन्तव्यं वसुदेवस्य न भवद्भ्यां तथा गृहम्
युवयोर्हि कृते वृद्धः स कंसेन निरस्यते
gantavyaṃ vasudevasya na bhavadbhyāṃ tathā gṛham
yuvayorhi kṛte vṛddhaḥ sa kaṃsena nirasyate
- 12
पराशर उवाच
इत्युक्त्वा प्रविवेशाथ सो ऽक्रूरो मथुरां पुरीम्
प्रविष्टौ रामकृष्णौ च राजमार्गमुपागतौ
parāśara uvāca
ityuktvā praviveśātha so 'krūro mathurāṃ purīm
praviṣṭau rāmakṛṣṇau ca rājamārgamupāgatau
- 13
स्त्रीभिर्नरैश्च सानन्दं लोचनैरभिवीक्षितौ
जग्मतुर्लीलया वीरौ मत्तौ बालगजाविव
strībhirnaraiśca sānandaṃ locanairabhivīkṣitau
jagmaturlīlayā vīrau mattau bālagajāviva
- 14
भ्रममाणौ तु तौ दृष्ट्वा रजकं रङ्गकारकम्
अयाचेतां सुरूपाणि वासांसि रुचिराननौ
bhramamāṇau tu tau dṛṣṭvā rajakaṃ raṅgakārakam
ayācetāṃ surūpāṇi vāsāṃsi rucirānanau
- 15
कंसस्य रजकः सो ऽथ प्रसादारूढविस्मयः
बहून्याक्षेपवाक्यानि प्राहोच्चै रामकेशवौ
kaṃsasya rajakaḥ so 'tha prasādārūḍhavismayaḥ
bahūnyākṣepavākyāni prāhoccai rāmakeśavau
- 16
ततस्तलप्रहारेण कृष्णस्तस्य दुरात्मनः
पातयामास कोपेन रजकस्य शिरो भुवि
tatastalaprahāreṇa kṛṣṇastasya durātmanaḥ
pātayāmāsa kopena rajakasya śiro bhuvi
- 17
हत्वादाय च वस्त्राणि पीतनीलाम्बरौ ततः
कृष्णरामौ मुदा युक्तौ मालाकारगृहं गतौ
hatvādāya ca vastrāṇi pītanīlāmbarau tataḥ
kṛṣṇarāmau mudā yuktau mālākāragṛhaṃ gatau
- 18
विकासिनेत्रयुगलो मालाकारो ऽपि विस्मितः
एतौ कस्य कुतो वैतौ मैत्रेयाचिन्तयत्ततः
vikāsinetrayugalo mālākāro 'pi vismitaḥ
etau kasya kuto vaitau maitreyācintayattataḥ
- 19
पीतनीलाम्बरधरौ तौ दृष्ट्वातिमनोहरौ
स तर्कयामास तदा भुवं देवावुपागतौ
pītanīlāmbaradharau tau dṛṣṭvātimanoharau
sa tarkayāmāsa tadā bhuvaṃ devāvupāgatau
- 20
विकासिमुखपद्माभ्यां ताभ्यां पुष्पाणि याचितः
भुवं विष्टभ्य हस्ताभ्यां पस्पर्श शिरसा महीम्
vikāsimukhapadmābhyāṃ tābhyāṃ puṣpāṇi yācitaḥ
bhuvaṃ viṣṭabhya hastābhyāṃ pasparśa śirasā mahīm
- 21
प्रसादपरमौ नाथौ मम गेहमुपागतौ
धन्यो ऽहमर्चयिष्यामीत्याह तौ माल्यजीवकः
prasādaparamau nāthau mama gehamupāgatau
dhanyo 'hamarcayiṣyāmītyāha tau mālyajīvakaḥ
- 22
ततः प्रहृष्टवदनस्तयोः पुष्पाणि कामतः
चारूण्येतान्यथैतानि प्रददौ स विलोभयन्
tataḥ prahṛṣṭavadanastayoḥ puṣpāṇi kāmataḥ
cārūṇyetānyathaitāni pradadau sa vilobhayan
- 23
पुनः पुनः प्रणम्यासौ मालाकारो नरोत्तमौ
ददौ पुष्पाणि चारूणि गन्धवन्त्यमलानि च
punaḥ punaḥ praṇamyāsau mālākāro narottamau
dadau puṣpāṇi cārūṇi gandhavantyamalāni ca
- 24
मालाकाराय कृष्णो ऽपि प्रसन्नः प्रददौ वरम्
श्रीस्त्वां मत्संश्रया भद्र न कदाचित्त्यजिष्यति
mālākārāya kṛṣṇo 'pi prasannaḥ pradadau varam
śrīstvāṃ matsaṃśrayā bhadra na kadācittyajiṣyati
- 25
बलहानिर्न ते सौम्य धनहानिस्तथैव च
यावद्दिनानि तावच्च न नशिष्यति संततिः
balahānirna te saumya dhanahānistathaiva ca
yāvaddināni tāvacca na naśiṣyati saṃtatiḥ
- 26
भुक्त्वा च भोगान्विपुलांस्त्वमन्ते मत्प्रसादजम्
ममानुस्मरणं प्राप्य दिव्यं लोकमवाप्स्यसि
bhuktvā ca bhogānvipulāṃstvamante matprasādajam
mamānusmaraṇaṃ prāpya divyaṃ lokamavāpsyasi
- 27
धर्मे मनश्च ते भद्र सर्वकालं भविष्यति
युष्मत्संततिजातानां दीर्घमायुर्भविष्यति
dharme manaśca te bhadra sarvakālaṃ bhaviṣyati
yuṣmatsaṃtatijātānāṃ dīrghamāyurbhaviṣyati
- 28
नोपसर्गादिकं दोषं युष्मत्संततिसंभवः
सम्प्राप्स्यति महाभाग यावत्सूर्यो भविष्यति
nopasargādikaṃ doṣaṃ yuṣmatsaṃtatisaṃbhavaḥ
samprāpsyati mahābhāga yāvatsūryo bhaviṣyati
- 29
पराशर उवाच
इत्युक्त्वा तद्गृहात्कृष्णो बलदेवसहायवान्
निर्जगाम मुनिश्रेष्ठ मालाकारेण पूजितः
parāśara uvāca
ityuktvā tadgṛhātkṛṣṇo baladevasahāyavān
nirjagāma muniśreṣṭha mālākāreṇa pūjitaḥ

