33 shlokas
- 1
पराशर उवाच
अक्रूरो ऽपि विनिष्क्रम्य स्यन्दनेनाशुगामिना
कृष्णसंदर्शनाकाङ्क्षी प्रययौ नन्दगोकुलम्
parāśara uvāca
akrūro 'pi viniṣkramya syandanenāśugāminā
kṛṣṇasaṃdarśanākāṅkṣī prayayau nandagokulam
- 2
चिन्तयामास चाक्रूरो नास्ति धन्यतरो मया
यो ऽहमंशावतीर्णस्य मुखं द्रक्ष्यामि चक्रिणः
cintayāmāsa cākrūro nāsti dhanyataro mayā
yo 'hamaṃśāvatīrṇasya mukhaṃ drakṣyāmi cakriṇaḥ
- 3
अद्य मे सफलं जन्म सुप्रभाता च मे निशा
यदुन्निद्राब्जपत्राक्षं विष्णोर्द्रक्ष्याम्यहं मुखम्
adya me saphalaṃ janma suprabhātā ca me niśā
yadunnidrābjapatrākṣaṃ viṣṇordrakṣyāmyahaṃ mukham
- 4
पापं हरति यत्पुंसां स्मृतं संकल्पनामयम्
तत्पुण्डरीकनयनं विष्णोर्द्रक्ष्याम्यहं मुखम्
pāpaṃ harati yatpuṃsāṃ smṛtaṃ saṃkalpanāmayam
tatpuṇḍarīkanayanaṃ viṣṇordrakṣyāmyahaṃ mukham
- 5
निर्जग्मुश्च यतो वेदा वेदाङ्गान्यखिलानि च
द्रक्ष्यामि तत्परं धाम देवानां भगवन्मुखम्
nirjagmuśca yato vedā vedāṅgānyakhilāni ca
drakṣyāmi tatparaṃ dhāma devānāṃ bhagavanmukham
- 6
यज्ञेषु यज्ञपुरुषः पुरुषैः पुरुषोत्तमः
इज्यते यो ऽखिलाधारस्तं द्रक्ष्यामि जगत्पतिम्
yajñeṣu yajñapuruṣaḥ puruṣaiḥ puruṣottamaḥ
ijyate yo 'khilādhārastaṃ drakṣyāmi jagatpatim
- 7
इष्ट्वा यमिन्द्रो यज्ञानां शतेनामरराजताम्
अवाप तम् अनन्तादिम् अहं द्रक्ष्यामि केशवम्
iṣṭvā yamindro yajñānāṃ śatenāmararājatām
avāpa tam anantādim ahaṃ drakṣyāmi keśavam
- 8
न ब्रह्मा नेन्द्ररुद्राश्विवस्वादित्यमरुद्गणाः
यस्य स्वरूपं जानन्ति स्प्रक्ष्यत्यङ्गं स मे हरिः
na brahmā nendrarudrāśvivasvādityamarudgaṇāḥ
yasya svarūpaṃ jānanti sprakṣyatyaṅgaṃ sa me hariḥ
- 9
सर्वात्मा सर्ववित्सर्वः सर्वभूतेष्ववस्थितः
यो वितत्याव्ययो व्यापी स वक्ष्यति मया सह
sarvātmā sarvavitsarvaḥ sarvabhūteṣvavasthitaḥ
yo vitatyāvyayo vyāpī sa vakṣyati mayā saha
- 10
मत्स्यकूर्मवराहाश्वसिंहरूपादिभिः स्थितिम्
चकार जगतो यो ऽजः सो ऽद्य मामालपिष्यति
matsyakūrmavarāhāśvasiṃharūpādibhiḥ sthitim
cakāra jagato yo 'jaḥ so 'dya māmālapiṣyati
- 11
साम्प्रतं च जगत्स्वामी कार्यमात्महृदि स्थितम्
कर्तुं मनुष्यतां प्राप्तः स्वेच्छादेहधृगव्ययः
sāmprataṃ ca jagatsvāmī kāryamātmahṛdi sthitam
kartuṃ manuṣyatāṃ prāptaḥ svecchādehadhṛgavyayaḥ
- 12
यो ऽनन्तः पृथिवीं धत्ते शेखरस्थितिसंस्थिताम्
सो ऽवतीर्णो जगत्यर्थे मामक्रूरेति वक्ष्यति
yo 'nantaḥ pṛthivīṃ dhatte śekharasthitisaṃsthitām
so 'vatīrṇo jagatyarthe māmakrūreti vakṣyati
- 13
पितृपुत्रसुहृद्भ्रातृमातृबन्धुमयीमिमाम्
यन्मायां नालमुत्तर्तुं जगत्तस्मै नमो नमः
pitṛputrasuhṛdbhrātṛmātṛbandhumayīmimām
yanmāyāṃ nālamuttartuṃ jagattasmai namo namaḥ
- 14
तरत्यविद्यां विततां हृदि यस्मिन्निवेशिते
योगी मायाममेयाय तस्मै विद्यात्मने नमः
taratyavidyāṃ vitatāṃ hṛdi yasminniveśite
yogī māyāmameyāya tasmai vidyātmane namaḥ
- 15
यज्विभिर्यज्ञपुरुषो वासुदेवश्च सात्वतैः
वेदान्तवेदिभिर्विष्णुः प्रोच्यते यो नतो ऽस्मि तम्
yajvibhiryajñapuruṣo vāsudevaśca sātvataiḥ
vedāntavedibhirviṣṇuḥ procyate yo nato 'smi tam
- 16
यथा तत्र जगद्धाम्नि धातर्येतत्प्रतिष्ठितम्
सदसत्तेन सत्येन मय्यसौ यातु सौम्यताम्
yathā tatra jagaddhāmni dhātaryetatpratiṣṭhitam
sadasattena satyena mayyasau yātu saumyatām
- 17
स्मृते सकलकल्याणभाजनं यत्र जायते
पुरुषस्तमजं नित्यं व्रजामि शरणं हरिम्
smṛte sakalakalyāṇabhājanaṃ yatra jāyate
puruṣastamajaṃ nityaṃ vrajāmi śaraṇaṃ harim
- 18
पराशर उवाच
इत्थं संचिन्तयन्विष्णुं भक्तिनम्रात्ममानसः
अक्रूरो गोकुलं प्राप्तः किंचित्सूर्ये विराजति
parāśara uvāca
itthaṃ saṃcintayanviṣṇuṃ bhaktinamrātmamānasaḥ
akrūro gokulaṃ prāptaḥ kiṃcitsūrye virājati
- 19
स ददर्श तदा तत्र कृष्णम् आदोहने गवाम्
वत्समध्यगतं फुल्लनीलोत्पलदलच्छविम्
sa dadarśa tadā tatra kṛṣṇam ādohane gavām
vatsamadhyagataṃ phullanīlotpaladalacchavim
- 20
प्रस्पष्टपद्मपत्राक्षं श्रीवत्साङ्कितवक्षसम्
प्रलम्बबाहुमायामितुङ्गोरःस्थलमुन्नसम्
praspaṣṭapadmapatrākṣaṃ śrīvatsāṅkitavakṣasam
pralambabāhumāyāmituṅgoraḥsthalamunnasam
- 21
सविलासस्मिताधारं बिभ्राणं मुखपङ्कजम्
तुङ्गरक्तनखं पद्भ्यां धरण्यां सुप्रतिष्ठितम्
savilāsasmitādhāraṃ bibhrāṇaṃ mukhapaṅkajam
tuṅgaraktanakhaṃ padbhyāṃ dharaṇyāṃ supratiṣṭhitam
- 22
बिभ्राणं वाससी पीते वन्यपुष्पविभूषितम्
सान्द्रनीललताहस्तम्सिताम्भोजावतंसकम्
bibhrāṇaṃ vāsasī pīte vanyapuṣpavibhūṣitam
sāndranīlalatāhastamsitāmbhojāvataṃsakam
- 23
हंसकुन्देन्दुधवलं नीलाम्बरधरं द्विज
तस्यानु बलभद्रं च ददर्श यदुनन्दनः
haṃsakundendudhavalaṃ nīlāmbaradharaṃ dvija
tasyānu balabhadraṃ ca dadarśa yadunandanaḥ
- 24
प्रांशुमुत्तुङ्गबाह्वंसं विकासिमुखपङ्कजम्
मेघमालापरिवृतं कैलासाद्रिमिवापरम्
prāṃśumuttuṅgabāhvaṃsaṃ vikāsimukhapaṅkajam
meghamālāparivṛtaṃ kailāsādrimivāparam
- 25
तौ दृष्ट्वा विकसद्वक्त्रसरोजः स महामतिः
पुलकाञ्चितसर्वाङ्गस्तदाक्रूरो ऽभवन्मुने
tau dṛṣṭvā vikasadvaktrasarojaḥ sa mahāmatiḥ
pulakāñcitasarvāṅgastadākrūro 'bhavanmune
- 26
एतत्तत्परमं धाम तदेतत्परमं पदम्
भगवद्वासुदेवांशो द्विधा यो ऽयमवस्थितः
etattatparamaṃ dhāma tadetatparamaṃ padam
bhagavadvāsudevāṃśo dvidhā yo 'yamavasthitaḥ
- 27
साफल्यम् अक्ष्णोर्युगमेतदत्र दृष्टे जगद्धातरि यातमुच्चैः
अप्यङ्गमेतद्भगवत्प्रसादाद्दत्ते ऽङ्गसङ्गे फलवन्मम स्यात्
sāphalyam akṣṇoryugametadatra dṛṣṭe jagaddhātari yātamuccaiḥ
apyaṅgametadbhagavatprasādāddatte 'ṅgasaṅge phalavanmama syāt
- 28
अप्येष पृष्ठे मम हस्तपद्मं करिष्यति श्रीमदनन्तमूर्तिः
यस्याङ्गुलिस्पर्शहताखिलाघैरवाप्यते सिद्धिर् अनाशदोषा
apyeṣa pṛṣṭhe mama hastapadmaṃ kariṣyati śrīmadanantamūrtiḥ
yasyāṅgulisparśahatākhilāghairavāpyate siddhir anāśadoṣā
- 29
येनाग्निविद्युद्रविरश्मिमालाकरालम् अत्युग्रमपास्य चक्रम्
चक्रं घ्नता दैत्यपतेर्हृतानि दैत्याङ्गनानां नयनाञ्जनानि
yenāgnividyudraviraśmimālākarālam atyugramapāsya cakram
cakraṃ ghnatā daityapaterhṛtāni daityāṅganānāṃ nayanāñjanāni
- 30
यत्राम्बु विन्यस्य बलिर्मनोज्ञानवाप भोगान्वसुधातलस्थः
तथामरत्वं त्रिदशाधिपत्यं मन्वन्तरं पूर्णमपेतशत्रुः
yatrāmbu vinyasya balirmanojñānavāpa bhogānvasudhātalasthaḥ
tathāmaratvaṃ tridaśādhipatyaṃ manvantaraṃ pūrṇamapetaśatruḥ

