78 shlokas
- 1
पराशर उवाच
गरुडो वारुणं छत्रं तथैव मणिपर्वतम्
सभार्यं च हृषीकेशं लीलयैव वहन्ययौ
parāśara uvāca
garuḍo vāruṇaṃ chatraṃ tathaiva maṇiparvatam
sabhāryaṃ ca hṛṣīkeśaṃ līlayaiva vahanyayau
- 2
ततः शङ्खमुपाध्मासीत्स्वर्गद्वारगतो हरिः
उपतस्थुस्ततो देवाः सार्घ्यपात्रा जनार्दनम्
tataḥ śaṅkhamupādhmāsītsvargadvāragato hariḥ
upatasthustato devāḥ sārghyapātrā janārdanam
- 3
स देवैरर्चितः कृष्णो देवमातुर्निवेशनम्
सिताभ्रशिखराकारं प्रविश्य ददृशे ऽदितिम्
sa devairarcitaḥ kṛṣṇo devamāturniveśanam
sitābhraśikharākāraṃ praviśya dadṛśe 'ditim
- 4
स तां प्रणम्य शक्रेण सह ते कुण्डलोत्तमे
ददौ नरकनाशं च शशंसास्यै जनार्दनः
sa tāṃ praṇamya śakreṇa saha te kuṇḍalottame
dadau narakanāśaṃ ca śaśaṃsāsyai janārdanaḥ
- 5
ततः प्रीता जगन्माता धातारं जगतां हरिम्
तुष्टावादितिरव्यग्रा कृत्वा तत्प्रवणं मनः
tataḥ prītā jaganmātā dhātāraṃ jagatāṃ harim
tuṣṭāvāditiravyagrā kṛtvā tatpravaṇaṃ manaḥ
- 6
अदितिर् उवाच
नमस्ते पुण्डरीकाक्ष भक्तानामभयंकर
सनातनात्मन्सर्वात्मन्भूतात्मन्भूतभावन
aditir uvāca
namaste puṇḍarīkākṣa bhaktānāmabhayaṃkara
sanātanātmansarvātmanbhūtātmanbhūtabhāvana
- 7
प्रणेता मनसो बुद्धेरिन्द्रियाणां गुणात्मक
त्रिगुणातीत निर्द्वन्द्व शुद्ध सर्वहृदिस्थित
praṇetā manaso buddherindriyāṇāṃ guṇātmaka
triguṇātīta nirdvandva śuddha sarvahṛdisthita
- 8
सितदीर्घादिनिःशेषकल्पनापरिवर्जित
जन्मादिभिर् असंस्पृष्ट स्वप्नादिपरिवर्जित
sitadīrghādiniḥśeṣakalpanāparivarjita
janmādibhir asaṃspṛṣṭa svapnādiparivarjita
- 9
संध्या रात्रिरहो भूमिर्गगनं वायुरम्बु च
हुताशनो मनो बुद्धिर्भूतादिस्त्वं तथाच्युत
saṃdhyā rātriraho bhūmirgaganaṃ vāyurambu ca
hutāśano mano buddhirbhūtādistvaṃ tathācyuta
- 10
सृष्टिस्थितिविनाशानां कर्ता कर्तृपतिर्भवान्
ब्रह्मविष्णुशिवाख्याभिरात्ममूर्तिभिरीश्वर
sṛṣṭisthitivināśānāṃ kartā kartṛpatirbhavān
brahmaviṣṇuśivākhyābhirātmamūrtibhirīśvara
- 11
देवा यक्षास्तथा दैत्या राक्षसाः सिद्धपन्नगाः
कूष्माण्डाश्च पिशाचाश्च गन्धर्वा मनुजास्तथा
devā yakṣāstathā daityā rākṣasāḥ siddhapannagāḥ
kūṣmāṇḍāśca piśācāśca gandharvā manujāstathā
- 12
पशवो मृगाः पतंगाश्च तथैव च सरीसृपाः
वृक्षगुल्मलतावल्लीसमस्ततृणजातयः
paśavo mṛgāḥ pataṃgāśca tathaiva ca sarīsṛpāḥ
vṛkṣagulmalatāvallīsamastatṛṇajātayaḥ
- 13
स्थूला मध्यास्तथा सूक्ष्माः सूक्ष्मात्सूक्ष्मतराश्च ये
देहभेदा भवान्सर्वे ये केचित्पुद्गलाश्रयाः
sthūlā madhyāstathā sūkṣmāḥ sūkṣmātsūkṣmatarāśca ye
dehabhedā bhavānsarve ye kecitpudgalāśrayāḥ
- 14
माया तवेयमज्ञातपरमार्थातिमोहिनी
अनात्मन्यात्मविज्ञानं यया मूढो निरुध्यते
māyā taveyamajñātaparamārthātimohinī
anātmanyātmavijñānaṃ yayā mūḍho nirudhyate
- 15
अहं ममेति भावो ऽत्र यत्पुंसाम् अभिजायते
संसारमातुर्मायायास्तवैतन्नाथ चेष्टितम्
ahaṃ mameti bhāvo 'tra yatpuṃsām abhijāyate
saṃsāramāturmāyāyāstavaitannātha ceṣṭitam
- 16
यैः स्वधर्मपरैर्नाथ नरैराराधितो भवान्
ते तरन्त्यखिलामेतां मायामात्मविमुक्तये
yaiḥ svadharmaparairnātha narairārādhito bhavān
te tarantyakhilāmetāṃ māyāmātmavimuktaye
- 17
ब्रह्माद्याः सकला देवा मनुष्याः पशवस्तथा
विष्णुमायामहावर्तमोहान्धतमसा वृताः
brahmādyāḥ sakalā devā manuṣyāḥ paśavastathā
viṣṇumāyāmahāvartamohāndhatamasā vṛtāḥ
- 18
आराध्य त्वामभीप्सन्ते कामानात्मभवक्षयम्
यदेते पुरुषा माया सैवेयं भगवंस्तव
ārādhya tvāmabhīpsante kāmānātmabhavakṣayam
yadete puruṣā māyā saiveyaṃ bhagavaṃstava
- 19
मया त्वं पुत्रकामिन्या वैरिपक्षक्षयाय च
आराधितो न मोक्षाय मायाविलसितं हि तत्
mayā tvaṃ putrakāminyā vairipakṣakṣayāya ca
ārādhito na mokṣāya māyāvilasitaṃ hi tat
- 20
कौपीनाच्छादनप्राया वाञ्छा कल्पद्रुमादपि
जायते यदपुण्यानां सो ऽपराधः स्वदोषजः
kaupīnācchādanaprāyā vāñchā kalpadrumādapi
jāyate yadapuṇyānāṃ so 'parādhaḥ svadoṣajaḥ
- 21
तत्प्रसीदाखिलजगन्मायामोहकराव्यय
अज्ञानं ज्ञानसद्भावभूतं भूतेश नाशय
tatprasīdākhilajaganmāyāmohakarāvyaya
ajñānaṃ jñānasadbhāvabhūtaṃ bhūteśa nāśaya
- 22
नमस्ते चक्रहस्ताय शार्ङ्गहस्ताय ते नमः
गदाहस्ताय ते विष्णो शङ्खहस्ताय ते नमः
namaste cakrahastāya śārṅgahastāya te namaḥ
gadāhastāya te viṣṇo śaṅkhahastāya te namaḥ
- 23
एतत्पश्यामि ते रूपं स्थूलचिह्नोपलक्षितम्
न जानामि परं यत्ते प्रसीद परमेश्वर
etatpaśyāmi te rūpaṃ sthūlacihnopalakṣitam
na jānāmi paraṃ yatte prasīda parameśvara
- 24
पराशर उवाच
अदित्यैवं स्तुतो विष्णुः प्रहस्याह सुरारणिम्
माता देवि त्वमस्माकं प्रसीद वरदा भव
parāśara uvāca
adityaivaṃ stuto viṣṇuḥ prahasyāha surāraṇim
mātā devi tvamasmākaṃ prasīda varadā bhava
- 25
अदितिर् उवाच
एवमस्तु यथेच्छा ते त्वमशेषैः सुरासुरैः
अजेयः पुरुषव्याघ्र मर्त्यलोके भविष्यसि
aditir uvāca
evamastu yathecchā te tvamaśeṣaiḥ surāsuraiḥ
ajeyaḥ puruṣavyāghra martyaloke bhaviṣyasi
- 26
पराशर उवाच
ततो ऽनन्तरमेवास्य शक्राणी सहितादितिम्
सत्यभामा प्रणम्याह प्रसीदेति पुनः पुनः
parāśara uvāca
tato 'nantaramevāsya śakrāṇī sahitāditim
satyabhāmā praṇamyāha prasīdeti punaḥ punaḥ
- 27
अदितिरुवाच
मत्प्रसादान्न ते सुभ्रु जरा वैरूप्यमेव च
भविष्यत्यनवद्याङ्गि सर्वकालं भविष्यसि
aditiruvāca
matprasādānna te subhru jarā vairūpyameva ca
bhaviṣyatyanavadyāṅgi sarvakālaṃ bhaviṣyasi
- 28
पराशर उवाच
अदित्या तु कृतानुज्ञो देवराजो जनार्दनम्
यथावत्पूजयामास बहुमानपुरःसरम्
parāśara uvāca
adityā tu kṛtānujño devarājo janārdanam
yathāvatpūjayāmāsa bahumānapuraḥsaram
- 29
ततो ददर्श कृष्णो ऽपि सत्यभामासहायवान्
देवोद्यानानि हृद्यानि नन्दनादीनि सत्तम
tato dadarśa kṛṣṇo 'pi satyabhāmāsahāyavān
devodyānāni hṛdyāni nandanādīni sattama
- 30
ददर्श च सुगन्धाढ्यं मञ्जरीपुष्पधारिणम्
शैत्याह्लादकरं ताम्रबालपल्लवशोभितम्
dadarśa ca sugandhāḍhyaṃ mañjarīpuṣpadhāriṇam
śaityāhlādakaraṃ tāmrabālapallavaśobhitam

