26 shlokas
- 1
पराशर उवाच
धृते गोवर्धने शैले परित्राते च गोकुले
रोचयामास कृष्णस्य दर्शनं पाकशासनः
parāśara uvāca
dhṛte govardhane śaile paritrāte ca gokule
rocayāmāsa kṛṣṇasya darśanaṃ pākaśāsanaḥ
- 2
सो ऽधिरुह्य महानागमैरावतम् अमित्रजित्
गोवर्धनगिरौ कृष्णं ददर्श त्रिदशेश्वरः
so 'dhiruhya mahānāgamairāvatam amitrajit
govardhanagirau kṛṣṇaṃ dadarśa tridaśeśvaraḥ
- 3
चारयन्तं महावीर्यं गाश्च गोपवपुर्धरम्
कृत्स्नस्य जगतो गोपं वृतं गोपकुमारकैः
cārayantaṃ mahāvīryaṃ gāśca gopavapurdharam
kṛtsnasya jagato gopaṃ vṛtaṃ gopakumārakaiḥ
- 4
गरुडं च ददर्शोच्चैरन्तर्धानगतं द्विज
कृतच्छायं हरेर्मूर्ध्नि पक्षाभ्यां पक्षिपुंगवम्
garuḍaṃ ca dadarśoccairantardhānagataṃ dvija
kṛtacchāyaṃ harermūrdhni pakṣābhyāṃ pakṣipuṃgavam
- 5
अवरुह्य स नागेन्द्रादेकान्ते मधुसूदनम्
शक्रः सस्मितमाहेदं प्रीतिविस्तारितेक्षणः
avaruhya sa nāgendrādekānte madhusūdanam
śakraḥ sasmitamāhedaṃ prītivistāritekṣaṇaḥ
- 6
इन्द्र उवाच
कृष्ण कृष्ण शृणुष्वेदं यदर्थमहमागतः
त्वत्समीपं महाभाग नैतच्चिन्त्यं त्वयान्यथा
indra uvāca
kṛṣṇa kṛṣṇa śṛṇuṣvedaṃ yadarthamahamāgataḥ
tvatsamīpaṃ mahābhāga naitaccintyaṃ tvayānyathā
- 7
भारावतारणार्थाय पृथिव्याः पृथिवीतलम्
अवतीर्णो ऽखिलाधार त्वमेव परमेश्वरः
bhārāvatāraṇārthāya pṛthivyāḥ pṛthivītalam
avatīrṇo 'khilādhāra tvameva parameśvaraḥ
- 8
महभङ्गविरुद्धेन मया गोकुलनाशकाः
समादिष्टा महामेघास्तैश्चैतत्कदनं कृतम्
mahabhaṅgaviruddhena mayā gokulanāśakāḥ
samādiṣṭā mahāmeghāstaiścaitatkadanaṃ kṛtam
- 9
त्रातास्ताश्च त्वया गावः समुत्पाट्य महागिरिम्
तेनाहं तोषितो वीर कर्मणात्यद्भुतेन ते
trātāstāśca tvayā gāvaḥ samutpāṭya mahāgirim
tenāhaṃ toṣito vīra karmaṇātyadbhutena te
- 10
साधितं कृष्ण देवानामहं मन्ये प्रयोजनम्
त्वयायमद्रिप्रवरः करेणैकेन यद्धृतः
sādhitaṃ kṛṣṇa devānāmahaṃ manye prayojanam
tvayāyamadripravaraḥ kareṇaikena yaddhṛtaḥ
- 11
गोभिश्च चोदितः कृष्ण त्वत्सकाशमिहागतः
त्वया त्राताभिरत्यर्थं युष्मत्सत्कारकारणात्
gobhiśca coditaḥ kṛṣṇa tvatsakāśamihāgataḥ
tvayā trātābhiratyarthaṃ yuṣmatsatkārakāraṇāt
- 12
स त्वां कृष्णाभिषेक्ष्यामि गवां वाक्यप्रचोदितः
उपेन्द्रत्वे गवामिन्द्रो गोविन्दस्त्वं भविष्यसि
sa tvāṃ kṛṣṇābhiṣekṣyāmi gavāṃ vākyapracoditaḥ
upendratve gavāmindro govindastvaṃ bhaviṣyasi
- 13
पराशर उवाच
अथोपवाह्यादादाय घण्टामैरावताद्गजात्
अभिषेकं तया चक्रे पवित्रजलपूर्णया
parāśara uvāca
athopavāhyādādāya ghaṇṭāmairāvatādgajāt
abhiṣekaṃ tayā cakre pavitrajalapūrṇayā
- 14
क्रियमाणे ऽभिषेके तु गावः कृष्णस्य तत्क्षणात्
प्रस्नवोद्भूतदुग्धार्द्रां सद्यश्चक्रुर्वसुंधराम्
kriyamāṇe 'bhiṣeke tu gāvaḥ kṛṣṇasya tatkṣaṇāt
prasnavodbhūtadugdhārdrāṃ sadyaścakrurvasuṃdharām
- 15
अभिषिच्य गवां वाक्याद्देवेन्द्रो वै जनार्दनम्
प्रीत्या सप्रश्रयं कृष्णं पुनराह शचीपतिः
abhiṣicya gavāṃ vākyāddevendro vai janārdanam
prītyā sapraśrayaṃ kṛṣṇaṃ punarāha śacīpatiḥ
- 16
गवामेतत्कृतं वाक्यं तथान्यदपि मे शृणु
यद्ब्रवीमि महाभाग भारावतरणेच्छया
gavāmetatkṛtaṃ vākyaṃ tathānyadapi me śṛṇu
yadbravīmi mahābhāga bhārāvataraṇecchayā
- 17
ममांशः पुरुषव्याघ्र पृथायां पृथिवीतले
अवतीर्णो ऽर्जुनो नाम स रक्ष्यो भवता सदा
mamāṃśaḥ puruṣavyāghra pṛthāyāṃ pṛthivītale
avatīrṇo 'rjuno nāma sa rakṣyo bhavatā sadā
- 18
भारावतरणे साह्यं स ते वीरः करिष्यति
स रक्षणीयो भवता यथात्मा मधुसूदन
bhārāvataraṇe sāhyaṃ sa te vīraḥ kariṣyati
sa rakṣaṇīyo bhavatā yathātmā madhusūdana
- 19
भगवानुवाच
जानामि भारते वंशे जातं पार्थं तवांशकम्
तमहं पालयिष्यामि यावत्स्थास्यामि भूतले
bhagavānuvāca
jānāmi bhārate vaṃśe jātaṃ pārthaṃ tavāṃśakam
tamahaṃ pālayiṣyāmi yāvatsthāsyāmi bhūtale
- 20
यावन्महीतले शक्र स्थास्याम्यहमरिंदम
न तावदर्जुनं कश्चिद्देवेन्द्र युधि जेष्यति
yāvanmahītale śakra sthāsyāmyahamariṃdama
na tāvadarjunaṃ kaściddevendra yudhi jeṣyati
- 21
कंसो नाम महाबाहुर्दैत्यो ऽरिष्टस्तथापरः
केशी कुवलयापीडो नरकाद्यास्तथापरे
kaṃso nāma mahābāhurdaityo 'riṣṭastathāparaḥ
keśī kuvalayāpīḍo narakādyāstathāpare
- 22
हतेष्वेतेषु देवेन्द्र भविष्यति महाहवः
तत्र विद्धि सहस्राक्ष भारावतरणं कृतम्
hateṣveteṣu devendra bhaviṣyati mahāhavaḥ
tatra viddhi sahasrākṣa bhārāvataraṇaṃ kṛtam
- 23
स त्वं गच्छ न संतापं पुत्रार्थे कर्तुमर्हसि
नार्जुनस्य रिपुः कश्चिन्ममाग्रे प्रभविष्यति
sa tvaṃ gaccha na saṃtāpaṃ putrārthe kartumarhasi
nārjunasya ripuḥ kaścinmamāgre prabhaviṣyati
- 24
अर्जुनार्थे त्वहं सर्वान्युधिष्ठिरपुरोगमान्
निवृत्ते भारते युद्धे कुन्त्यै दास्याम्यविक्षतान्
arjunārthe tvahaṃ sarvānyudhiṣṭhirapurogamān
nivṛtte bhārate yuddhe kuntyai dāsyāmyavikṣatān
- 25
पराशर उवाच
इत्युक्तः सम्परिष्वज्य देवराजो जनार्दनम्
आरुह्यैरावतं नागं पुनरेव दिवं ययौ
parāśara uvāca
ityuktaḥ sampariṣvajya devarājo janārdanam
āruhyairāvataṃ nāgaṃ punareva divaṃ yayau
- 26
कृष्णो ऽपि सहितो गोभिर्गोपालैश्च पुनर्व्रजम्
आजगामाथ गोपीनां दृष्टिपूतेन वर्त्मना
kṛṣṇo 'pi sahito gobhirgopālaiśca punarvrajam
ājagāmātha gopīnāṃ dṛṣṭipūtena vartmanā

