18 shlokas
- 1
पराशर उवाच
संस्तुतो भगवानित्थं देवराजेन केशवः
प्रहस्य भावगम्भीरमुवाचेन्द्रं द्विजोत्तम
parāśara uvāca
saṃstuto bhagavānitthaṃ devarājena keśavaḥ
prahasya bhāvagambhīramuvācendraṃ dvijottama
- 2
भगवान् उवाच
देवराजो भवानिन्द्रो वयं मर्त्या जगत्पते
क्षन्तव्यं भवतैवैतदपराधकृतं मम
bhagavān uvāca
devarājo bhavānindro vayaṃ martyā jagatpate
kṣantavyaṃ bhavataivaitadaparādhakṛtaṃ mama
- 3
पारिजाततरुश्चायं नीयतामुचितास्पदम्
गृहीतो ऽयं मया शक्र सत्यावचनकारणात्
pārijātataruścāyaṃ nīyatāmucitāspadam
gṛhīto 'yaṃ mayā śakra satyāvacanakāraṇāt
- 4
वज्रं चेदं गृहाण त्वं यद्ग्रस्तं प्रहितं त्वया
तवैवैतत्प्रहरणं शक्र वैरिविदारणम्
vajraṃ cedaṃ gṛhāṇa tvaṃ yadgrastaṃ prahitaṃ tvayā
tavaivaitatpraharaṇaṃ śakra vairividāraṇam
- 5
शक्र उवाच
विमोहयसि मामीश मर्त्यो ऽहमिति किं वदन्
जानीमस्त्वां भगवतो न तु सूक्ष्मविदो वयम्
śakra uvāca
vimohayasi māmīśa martyo 'hamiti kiṃ vadan
jānīmastvāṃ bhagavato na tu sūkṣmavido vayam
- 6
यो ऽसि सो ऽसि जगत्त्राणप्रवृत्तौ नाथ संस्थितः
जगतः शल्यनिष्कर्षं करोष्यसुरसूदन
yo 'si so 'si jagattrāṇapravṛttau nātha saṃsthitaḥ
jagataḥ śalyaniṣkarṣaṃ karoṣyasurasūdana
- 7
नीयतां पारिजातो ऽयं कृष्ण द्वारवतीं पुरीम्
मर्त्यलोके त्वया मुक्ते नायं संस्थास्यते भुवि
nīyatāṃ pārijāto 'yaṃ kṛṣṇa dvāravatīṃ purīm
martyaloke tvayā mukte nāyaṃ saṃsthāsyate bhuvi
- 8
पराशर उवाच
तथेत्युक्त्वा च देवेन्द्रमाजगाम भुवं हरिः
प्रसक्तैः सिद्धगन्धर्वैः स्तूयमानः सुरर्षिभिः
parāśara uvāca
tathetyuktvā ca devendramājagāma bhuvaṃ hariḥ
prasaktaiḥ siddhagandharvaiḥ stūyamānaḥ surarṣibhiḥ
- 9
ततः शङ्खमुपाध्माय द्वारकोपरि संस्थितः
हर्षमुत्पादयामास द्वारकावासिनां द्विज
tataḥ śaṅkhamupādhmāya dvārakopari saṃsthitaḥ
harṣamutpādayāmāsa dvārakāvāsināṃ dvija
- 10
अवतीर्याथ गरुडात्सत्यभामासहायवान्
निष्कुटे स्थापयामास पारिजातं महातरुम्
avatīryātha garuḍātsatyabhāmāsahāyavān
niṣkuṭe sthāpayāmāsa pārijātaṃ mahātarum
- 11
यमभ्येत्य जनः सर्वो जातिं स्मरति पौर्विकीम्
वास्यते यस्य पुष्पोत्थगन्धेनोर्वी त्रियोजनम्
yamabhyetya janaḥ sarvo jātiṃ smarati paurvikīm
vāsyate yasya puṣpotthagandhenorvī triyojanam
- 12
ततस्ते यादवाः सर्वे देहबन्धानमानुषान्
ददृशुः पादपे तस्मिन्कुर्वतो मुखदर्शनम्
tataste yādavāḥ sarve dehabandhānamānuṣān
dadṛśuḥ pādape tasminkurvato mukhadarśanam
- 13
किंकरैः समुपानीतं हस्त्यश्वादि ततो धनम्
स्त्रियश्च कृष्णो जग्राह नरकस्य परिग्रहान्
kiṃkaraiḥ samupānītaṃ hastyaśvādi tato dhanam
striyaśca kṛṣṇo jagrāha narakasya parigrahān
- 14
ततः काले शुभे प्राप्ते उपयेमे जनार्दनः
ताः कन्या नरकेणासन्सर्वतो याः समाहृताः
tataḥ kāle śubhe prāpte upayeme janārdanaḥ
tāḥ kanyā narakeṇāsansarvato yāḥ samāhṛtāḥ
- 15
एकस्मिन् एव गोविन्दः काले तासां महामुने
जग्राह विधिवत्पाणीन्पृथग्गेहेषु धर्मतः
ekasmin eva govindaḥ kāle tāsāṃ mahāmune
jagrāha vidhivatpāṇīnpṛthaggeheṣu dharmataḥ
- 16
षोडशस्त्रीसहस्राणि शतमेकं तथाधिकम्
तावन्ति चक्रे रूपाणि भगवान्मधुसूदनः
ṣoḍaśastrīsahasrāṇi śatamekaṃ tathādhikam
tāvanti cakre rūpāṇi bhagavānmadhusūdanaḥ
- 17
एकैकश्येन ताः कन्या मेनिरे मधुसूदनः
ममैव पाणिग्रहणं भगवान्कृतवानिति
ekaikaśyena tāḥ kanyā menire madhusūdanaḥ
mamaiva pāṇigrahaṇaṃ bhagavānkṛtavāniti
- 18
निशासु च जगत्स्रष्टा तासां गेहेषु केशवः
उवास विप्र सर्वासां विश्वरूपधरो हरिः
niśāsu ca jagatsraṣṭā tāsāṃ geheṣu keśavaḥ
uvāsa vipra sarvāsāṃ viśvarūpadharo hariḥ

