21 shlokas
- 1
पराशर उवाच
इत्थं स्तुतस्तदा तेन मुचुकुन्देन धीमता
प्राहेशः सर्वभूतानामनादिर्भगवान्हरिः
parāśara uvāca
itthaṃ stutastadā tena mucukundena dhīmatā
prāheśaḥ sarvabhūtānāmanādirbhagavānhariḥ
- 2
यथाभिवाञ्छितान्दिव्यान्लोकान्गच्छ नरेश्वर
अव्याहतपरैश्वर्यो मत्प्रसादोपबृंहितः
yathābhivāñchitāndivyānlokāngaccha nareśvara
avyāhataparaiśvaryo matprasādopabṛṃhitaḥ
- 3
भुक्त्वा दिव्यान्महाभोगान्भविष्यसि महाकुले
जातिस्मरो मत्प्रसादात्ततो मोक्षमवाप्स्यसि
bhuktvā divyānmahābhogānbhaviṣyasi mahākule
jātismaro matprasādāttato mokṣamavāpsyasi
- 4
पराशर उवाच
इत्युक्तः प्रणिपत्येशं जगतामच्युतं नृपः
गुहामुखाद्विनिष्क्रान्तः ददृशे सो ऽल्पकान्नरान्
parāśara uvāca
ityuktaḥ praṇipatyeśaṃ jagatāmacyutaṃ nṛpaḥ
guhāmukhādviniṣkrāntaḥ dadṛśe so 'lpakānnarān
- 5
ततः कलियुगं ज्ञात्वा प्राप्तं तप्तुं नृपस्तपः
नरनारायणस्थानं प्रययौ गन्धमादनम्
tataḥ kaliyugaṃ jñātvā prāptaṃ taptuṃ nṛpastapaḥ
naranārāyaṇasthānaṃ prayayau gandhamādanam
- 6
कृष्णो ऽपि घातयित्वारिमुपायेन हि तद्बलम्
जग्राह मथुरामेत्य हस्त्यश्वस्यन्दनोज्ज्वलम्
kṛṣṇo 'pi ghātayitvārimupāyena hi tadbalam
jagrāha mathurāmetya hastyaśvasyandanojjvalam
- 7
आनीय चोग्रसेनाय द्वारवत्यां न्यवेदयत्
पराभिभवनिःशङ्कं बभूव च यदोः कुलम्
ānīya cograsenāya dvāravatyāṃ nyavedayat
parābhibhavaniḥśaṅkaṃ babhūva ca yadoḥ kulam
- 8
बलदेवो ऽपि मैत्रेय प्रशान्ताखिलविग्रहः
ज्ञातिदर्शनसोत्कण्ठः प्रययौ नन्दगोकुलम्
baladevo 'pi maitreya praśāntākhilavigrahaḥ
jñātidarśanasotkaṇṭhaḥ prayayau nandagokulam
- 9
ततो गोपांश्च गोपीश्च यथापूर्वममित्रजित्
तथैवाभ्यवदत्प्रेम्णा बहुमानपुरःसरम्
tato gopāṃśca gopīśca yathāpūrvamamitrajit
tathaivābhyavadatpremṇā bahumānapuraḥsaram
- 10
कैश्चापि सम्परिष्वक्तः कांश्चिच्च परिषस्वजे
हास्यं चक्रे समं कैश्चिद्गोपैर्गोपीजनैस्तथा
kaiścāpi sampariṣvaktaḥ kāṃścicca pariṣasvaje
hāsyaṃ cakre samaṃ kaiścidgopairgopījanaistathā
- 11
प्रियाण्यनेकान्यवदन्गोपास्तत्र हलायुधम्
गोप्यश्च प्रेमकुपिताः प्रोचुः सेर्ष्यमथापराः
priyāṇyanekānyavadangopāstatra halāyudham
gopyaśca premakupitāḥ procuḥ serṣyamathāparāḥ
- 12
गोप्यः पप्रच्छुरपरा नागरीजनवल्लभः
कच्चिदास्ते सुखं कृष्णश्चलत्प्रेमलवात्मकः
gopyaḥ papracchuraparā nāgarījanavallabhaḥ
kaccidāste sukhaṃ kṛṣṇaścalatpremalavātmakaḥ
- 13
अस्मच्चेष्टामपहसन्न कच्चित्पुरयोषिताम्
सौभाग्यमानमधिकं करोति क्षणसौहृदः
asmacceṣṭāmapahasanna kaccitpurayoṣitām
saubhāgyamānamadhikaṃ karoti kṣaṇasauhṛdaḥ
- 14
कच्चित्स्मरति नः कृष्णो गीतानुगमनं कलम्
अप्यसौ मातरं द्रष्टुं सकृदप्यागमिष्यति
kaccitsmarati naḥ kṛṣṇo gītānugamanaṃ kalam
apyasau mātaraṃ draṣṭuṃ sakṛdapyāgamiṣyati
- 15
अथवा किं तदालापैरपरा क्रियतां कथा
यस्यास्माभिर्विना तेन विनास्माकं भविष्यति
athavā kiṃ tadālāpairaparā kriyatāṃ kathā
yasyāsmābhirvinā tena vināsmākaṃ bhaviṣyati
- 16
पिता माता तथा भ्राता भर्ता बन्धुजनश्च किम्
न त्यक्तस्तत्कृते ऽस्माभिरकृतज्ञध्वजो हि सः
pitā mātā tathā bhrātā bhartā bandhujanaśca kim
na tyaktastatkṛte 'smābhirakṛtajñadhvajo hi saḥ
- 17
तथापि कच्चिदालापमिहागमनसंश्रयम्
करोति कृष्णो वक्तव्यं भवता राम नानृतम्
tathāpi kaccidālāpamihāgamanasaṃśrayam
karoti kṛṣṇo vaktavyaṃ bhavatā rāma nānṛtam
- 18
दामोदरः स गोविन्दः पुरस्त्रीसक्तमानसः
अपेतप्रीतिरस्मासु दुर्दर्शः प्रतिभाति नः
dāmodaraḥ sa govindaḥ purastrīsaktamānasaḥ
apetaprītirasmāsu durdarśaḥ pratibhāti naḥ
- 19
पराशर उवाच
आमन्त्रितः स कृष्णेति पुनर्दामोदरेति च
रुरुदुः सस्वरं गोप्यो हरिणा हृतचेतसः
parāśara uvāca
āmantritaḥ sa kṛṣṇeti punardāmodareti ca
ruruduḥ sasvaraṃ gopyo hariṇā hṛtacetasaḥ
- 20
संदेशैः साममधुरैः प्रेमगर्भैर् अगर्वितैः
रामेणाश्वासिता गोप्यः कृष्णस्यातिमनोहरैः
saṃdeśaiḥ sāmamadhuraiḥ premagarbhair agarvitaiḥ
rāmeṇāśvāsitā gopyaḥ kṛṣṇasyātimanoharaiḥ
- 21
गोपैश्च पूर्ववद्रामः परिहासमनोरमाः
कथाश्चकार रेमे च सह तैर्व्रजभूमिषु
gopaiśca pūrvavadrāmaḥ parihāsamanoramāḥ
kathāścakāra reme ca saha tairvrajabhūmiṣu

