46 shlokas
- 1
पराशर उवाच
गार्ग्यं गोष्ठ्यां द्विजं श्यालः षण्ड इत्युक्तवान्द्विज
यदूनां संनिधौ सर्वे जहसुर्यादवास्ततः
parāśara uvāca
gārgyaṃ goṣṭhyāṃ dvijaṃ śyālaḥ ṣaṇḍa ityuktavāndvija
yadūnāṃ saṃnidhau sarve jahasuryādavāstataḥ
- 2
ततः कोपसमाविष्टो दक्षिणापथमेत्य सः
सुतमिच्छंस्तपस्तेपे यदुचक्रभयावहम्
tataḥ kopasamāviṣṭo dakṣiṇāpathametya saḥ
sutamicchaṃstapastepe yaducakrabhayāvaham
- 3
आराधयन्महादेवं सो ऽयश्चूर्णमभक्षयत्
ददौ वरं च तुष्टो ऽस्मै वर्षे द्वादशमे हरः
ārādhayanmahādevaṃ so 'yaścūrṇamabhakṣayat
dadau varaṃ ca tuṣṭo 'smai varṣe dvādaśame haraḥ
- 4
सभाजयामास च तं यवनेशो ह्यनात्मजः
तद्योषित्संगमाच्चास्य पुत्रो ऽभूदलिसंनिभः
sabhājayāmāsa ca taṃ yavaneśo hyanātmajaḥ
tadyoṣitsaṃgamāccāsya putro 'bhūdalisaṃnibhaḥ
- 5
तं कालयवनं नाम राज्ये स्वे यवनेश्वरः
अभिषिच्य वनं यातो वज्राग्रकठिनोरसम्
taṃ kālayavanaṃ nāma rājye sve yavaneśvaraḥ
abhiṣicya vanaṃ yāto vajrāgrakaṭhinorasam
- 6
स तु वीर्यमदोन्मत्तः पृथिव्यां बलिनो नृपान्
पप्रच्छ नारदस्तस्मै कथयामास यादवान्
sa tu vīryamadonmattaḥ pṛthivyāṃ balino nṛpān
papraccha nāradastasmai kathayāmāsa yādavān
- 7
म्लेच्छकोटिसहस्राणां सहस्रैः सो ऽभिसंवृतः
गजाश्वरथसम्पन्नैश्चकार परमोद्यमम्
mlecchakoṭisahasrāṇāṃ sahasraiḥ so 'bhisaṃvṛtaḥ
gajāśvarathasampannaiścakāra paramodyamam
- 8
प्रययौ चाव्यवच्छिन्नं छिन्नयानो दिने दिने
यादवान्प्रति सामर्षो मैत्रेय मथुरां पुरीम्
prayayau cāvyavacchinnaṃ chinnayāno dine dine
yādavānprati sāmarṣo maitreya mathurāṃ purīm
- 9
कृष्णो ऽपि चिन्तयामास क्षपितं यादवं बलम्
यवनेन रणे गम्यं मागधस्य भविष्यति
kṛṣṇo 'pi cintayāmāsa kṣapitaṃ yādavaṃ balam
yavanena raṇe gamyaṃ māgadhasya bhaviṣyati
- 10
मागधेन बलं क्षीणं स कालयवनो बली
हन्ता तदिदमायातं यदूनां व्यसनं द्विधा
māgadhena balaṃ kṣīṇaṃ sa kālayavano balī
hantā tadidamāyātaṃ yadūnāṃ vyasanaṃ dvidhā
- 11
तस्माद्दुर्गं करिष्यामि यदूनामरिदुर्जयम्
स्त्रियो ऽपि यत्र युध्येयुः किं पुनर्वृष्णिपुंगवाः
tasmāddurgaṃ kariṣyāmi yadūnāmaridurjayam
striyo 'pi yatra yudhyeyuḥ kiṃ punarvṛṣṇipuṃgavāḥ
- 12
मयि मत्ते प्रमत्ते वा सुप्ते प्रवसिते तथा
यादवाभिभवं दुष्टा मा कुर्वंस्त्वरयो ऽधिकाः
mayi matte pramatte vā supte pravasite tathā
yādavābhibhavaṃ duṣṭā mā kurvaṃstvarayo 'dhikāḥ
- 13
इति संचिन्त्य गोविन्दो योजनानि महोदधिम्
ययाचे द्वादश पुरीं द्वारकां तत्र निर्ममे
iti saṃcintya govindo yojanāni mahodadhim
yayāce dvādaśa purīṃ dvārakāṃ tatra nirmame
- 14
महोद्यानां महावप्रां तडागशतशोभिताम्
प्राकारगृहसंबाधामिन्द्रस्येवामरावतीम्
mahodyānāṃ mahāvaprāṃ taḍāgaśataśobhitām
prākāragṛhasaṃbādhāmindrasyevāmarāvatīm
- 15
मथुरावासिनो लोकांस्तत्रानीय जनार्दनः
आसन्ने कालयवने मथुरां च स्वयं ययौ
mathurāvāsino lokāṃstatrānīya janārdanaḥ
āsanne kālayavane mathurāṃ ca svayaṃ yayau
- 16
बहिर् आवसिते सैन्ये मथुराया निरायुधः
निर्जगाम स गोविन्दो ददृशे यवनेश्वरम्
bahir āvasite sainye mathurāyā nirāyudhaḥ
nirjagāma sa govindo dadṛśe yavaneśvaram
- 17
स ज्ञात्वा वासुदेवं तं बाहुप्रहरणो नृपः
अनुयातो महायोगिचेतोभिः प्राप्यते न यः
sa jñātvā vāsudevaṃ taṃ bāhupraharaṇo nṛpaḥ
anuyāto mahāyogicetobhiḥ prāpyate na yaḥ
- 18
तेनानुयातः कृष्णो ऽपि प्रविवेश महागुहाम्
यत्र शेते महावीर्यो मुचुकुन्दो नरेश्वरः
tenānuyātaḥ kṛṣṇo 'pi praviveśa mahāguhām
yatra śete mahāvīryo mucukundo nareśvaraḥ
- 19
सो ऽपि प्रविष्टो यवनो दृष्ट्वा शय्यागतं नरम्
पादेन ताडयामास मत्वा कृष्णं सुदुर्मतिः
so 'pi praviṣṭo yavano dṛṣṭvā śayyāgataṃ naram
pādena tāḍayāmāsa matvā kṛṣṇaṃ sudurmatiḥ
- 20
दृष्टमात्रश्च तेनासौ जज्वाल यवनो ऽग्निना
तत्क्रोधजेन मैत्रेय भस्मीभूतश्च तत्क्षणात्
dṛṣṭamātraśca tenāsau jajvāla yavano 'gninā
tatkrodhajena maitreya bhasmībhūtaśca tatkṣaṇāt
- 21
स हि देवासुरे युद्धे गतो जित्वा महासुरान्
निद्रार्तः सुमहत्कालं निद्रां वव्रे वरं सुरान्
sa hi devāsure yuddhe gato jitvā mahāsurān
nidrārtaḥ sumahatkālaṃ nidrāṃ vavre varaṃ surān
- 22
प्रोक्तश्च देवैः संसुप्तं यस्त्वामुत्थापयिष्यति
देहजेनाग्निना सद्यः स तु भस्मीभविष्यति
proktaśca devaiḥ saṃsuptaṃ yastvāmutthāpayiṣyati
dehajenāgninā sadyaḥ sa tu bhasmībhaviṣyati
- 23
एवं दग्ध्वा स तं पापं दृष्ट्वा च मधुसूदनम्
कस्त्वमित्याह सो ऽप्याह जातो ऽहं शशिनः कुले
वसुदेवस्य तनयो यदोर्वंशसमुद्भवः
evaṃ dagdhvā sa taṃ pāpaṃ dṛṣṭvā ca madhusūdanam
kastvamityāha so 'pyāha jāto 'haṃ śaśinaḥ kule
vasudevasya tanayo yadorvaṃśasamudbhavaḥ
- 24
मुचुकुन्दो ऽपि तत्रासौ वृद्धगर्गवचो ऽस्मरत्
mucukundo 'pi tatrāsau vṛddhagargavaco 'smarat
- 25
संस्मृत्य प्रणिपत्यैनं सर्वं सर्वेश्वरं हरिम्
प्राह ज्ञातो भवान्विष्णोरंशस्त्वं परमेश्वर
saṃsmṛtya praṇipatyainaṃ sarvaṃ sarveśvaraṃ harim
prāha jñāto bhavānviṣṇoraṃśastvaṃ parameśvara
- 26
पुरा गर्गेण कथितमष्टाविंशतिमे युगे
द्वापरान्ते हरेर्जन्म यदोर्वंशे भविष्यति
purā gargeṇa kathitamaṣṭāviṃśatime yuge
dvāparānte harerjanma yadorvaṃśe bhaviṣyati
- 27
स त्वं प्राप्तो न संदेहो मर्त्यानामुपकारकृत्
sa tvaṃ prāpto na saṃdeho martyānāmupakārakṛt
- 28
तथा हि सुमहत्तेजो नालं सोढुमहं तव
तथा हि सजलाम्भोदनादधीरतरं तव
वाक्यं नमति चैवोर्वी युष्मत्पादप्रपीडिता
tathā hi sumahattejo nālaṃ soḍhumahaṃ tava
tathā hi sajalāmbhodanādadhīrataraṃ tava
vākyaṃ namati caivorvī yuṣmatpādaprapīḍitā
- 29
देवासुरमहायुद्धे दैत्यसैन्यमहाभटाः
न सेहुर्मम तेजस्ते त्वत्तेजो न सहाम्यहम्
devāsuramahāyuddhe daityasainyamahābhaṭāḥ
na sehurmama tejaste tvattejo na sahāmyaham
- 30
संसारपतितस्यैको जन्तोस्त्वं शरणं परम्
स प्रसीद प्रपन्नार्तिहन्तर्हर ममाशुभम्
saṃsārapatitasyaiko jantostvaṃ śaraṇaṃ param
sa prasīda prapannārtihantarhara mamāśubham

