19 shlokas
- 1
पराशर उवाच
वने विचरतस्तस्य सह गोपैर्महात्मनः
मानुषछद्मरूपस्य शेषस्य धरणीभृतः
parāśara uvāca
vane vicaratastasya saha gopairmahātmanaḥ
mānuṣachadmarūpasya śeṣasya dharaṇībhṛtaḥ
- 2
निष्पादितोरुकार्यस्य कार्येणोर्वीविचारिणः
उपभोगार्थमत्यर्थं वरुणः प्राह वारुणीम्
niṣpāditorukāryasya kāryeṇorvīvicāriṇaḥ
upabhogārthamatyarthaṃ varuṇaḥ prāha vāruṇīm
- 3
अभीष्टा सर्वदा यस्य मदिरे त्वं महौजसः
अनन्तस्योपभोगाय तस्य गच्छ मुदे शुभे
abhīṣṭā sarvadā yasya madire tvaṃ mahaujasaḥ
anantasyopabhogāya tasya gaccha mude śubhe
- 4
इत्युक्ता वारुणी तेन संनिधानमथाकरोत्
वृन्दावनवनोत्पन्नकदम्बतरुकोटरे
ityuktā vāruṇī tena saṃnidhānamathākarot
vṛndāvanavanotpannakadambatarukoṭare
- 5
विचरन्बलदेवो ऽपि मदिरागन्धमुत्तमम्
आघ्राय मदिरातर्षमवापाथ पुरातनम्
vicaranbaladevo 'pi madirāgandhamuttamam
āghrāya madirātarṣamavāpātha purātanam
- 6
ततः कदम्बात्सहसा मद्यधारां स लाङ्गली
पतन्तीं वीक्ष्य मैत्रेय प्रययौ परमां मुदम्
tataḥ kadambātsahasā madyadhārāṃ sa lāṅgalī
patantīṃ vīkṣya maitreya prayayau paramāṃ mudam
- 7
पपौ च गोपगोपीभिः समवेतो मुदान्वितः
प्रगीयमानो ललितं गीतवाद्यविशारदैः
papau ca gopagopībhiḥ samaveto mudānvitaḥ
pragīyamāno lalitaṃ gītavādyaviśāradaiḥ
- 8
स मत्तो ऽत्यन्तघर्माम्भःकणिकामौक्तिकोज्ज्वलः
आगच्छ यमुने स्नातुमिच्छामीत्याह विह्वलः
sa matto 'tyantagharmāmbhaḥkaṇikāmauktikojjvalaḥ
āgaccha yamune snātumicchāmītyāha vihvalaḥ
- 9
तस्य वाचं नदी सा तु मत्तोक्तामवमन्य वै
नाजगाम ततः क्रुद्धो हलं जग्राह लाङ्गली
tasya vācaṃ nadī sā tu mattoktāmavamanya vai
nājagāma tataḥ kruddho halaṃ jagrāha lāṅgalī
- 10
गृहीत्वा तां तटे तेन चकर्ष मदविह्वलः
पापे नायासि नायासि गम्यतामिच्छयान्यतः
gṛhītvā tāṃ taṭe tena cakarṣa madavihvalaḥ
pāpe nāyāsi nāyāsi gamyatāmicchayānyataḥ
- 11
साकृष्टा सहसा तेन मार्गं संत्यज्य निम्नगा
यत्रास्ते बलभद्रो ऽसौ प्लावयामास तद्वनम्
sākṛṣṭā sahasā tena mārgaṃ saṃtyajya nimnagā
yatrāste balabhadro 'sau plāvayāmāsa tadvanam
- 12
शरीरिणी तथोपेत्य त्रासविह्वललोचना
प्रसीदेत्यब्रवीद्रामं मुञ्च मां मुसलायुध
śarīriṇī tathopetya trāsavihvalalocanā
prasīdetyabravīdrāmaṃ muñca māṃ musalāyudha
- 13
सो ऽब्रवीद् अवजानासि मम शौर्यबले नदि
सो ऽहं त्वां हलपातेन विनेष्यामि सहस्रधा
so 'bravīd avajānāsi mama śauryabale nadi
so 'haṃ tvāṃ halapātena vineṣyāmi sahasradhā
- 14
पराशर उवाच
इत्युक्तयातिसंत्रासात्तया नद्या प्रसादितः
भूभागे प्लाविते तस्मिन्मुमोच यमुनां बलः
parāśara uvāca
ityuktayātisaṃtrāsāttayā nadyā prasāditaḥ
bhūbhāge plāvite tasminmumoca yamunāṃ balaḥ
- 15
ततः स्नातस्य वै कान्तिराजगाम महात्मनः
अवतंसोत्पलं चारु गृहीत्वैकं च कुण्डलम्
tataḥ snātasya vai kāntirājagāma mahātmanaḥ
avataṃsotpalaṃ cāru gṛhītvaikaṃ ca kuṇḍalam
- 16
वरुणप्रहितां चास्मै मालामम्लानपङ्कजाम्
समुद्राभे तथा वस्त्रे नीले लक्ष्मीरयच्छत
varuṇaprahitāṃ cāsmai mālāmamlānapaṅkajām
samudrābhe tathā vastre nīle lakṣmīrayacchata
- 17
कृतावतंसः स तदा चारुकुण्डलभूषितः
नीलाम्बरधरः स्रग्वी शुशुभे कान्तिसंयुतः
kṛtāvataṃsaḥ sa tadā cārukuṇḍalabhūṣitaḥ
nīlāmbaradharaḥ sragvī śuśubhe kāntisaṃyutaḥ
- 18
इत्थं विभूषितो रेमे तत्र रामस्तदा व्रजे
मासद्वयेन यातश्च पुनः स द्वारकां पुरीम्
itthaṃ vibhūṣito reme tatra rāmastadā vraje
māsadvayena yātaśca punaḥ sa dvārakāṃ purīm
- 19
रेवतीं नाम तनयां रैवतस्य महीपतेः
उपयेमे बलस्तस्यां जज्ञाते निशठोल्मुकौ
revatīṃ nāma tanayāṃ raivatasya mahīpateḥ
upayeme balastasyāṃ jajñāte niśaṭholmukau

