18 shlokas
- 1
पराशर उवाच
जरासंधसुते कंस उपयेमे महाबलः
अस्तिं प्राप्तिं च मैत्रेय तयोर्भर्तृहणं हरिम्
parāśara uvāca
jarāsaṃdhasute kaṃsa upayeme mahābalaḥ
astiṃ prāptiṃ ca maitreya tayorbhartṛhaṇaṃ harim
- 2
महाबलपरीवारो मगधाधिपतिर्बली
हन्तुमभ्याययौ कोपाज्जरासंधः स यादवम्
mahābalaparīvāro magadhādhipatirbalī
hantumabhyāyayau kopājjarāsaṃdhaḥ sa yādavam
- 3
उपेत्य मथुरां सो ऽथ रुरोध मगधेश्वरः
अक्षौहिणीभिः सैन्यस्य त्रयोविंशतिभिर्वृतः
upetya mathurāṃ so 'tha rurodha magadheśvaraḥ
akṣauhiṇībhiḥ sainyasya trayoviṃśatibhirvṛtaḥ
- 4
निष्क्रम्याल्पपरीवारावुभौ रामजनार्दनौ
युयुधाते समं तस्य बलिनौ बलिसैनिकैः
niṣkramyālpaparīvārāvubhau rāmajanārdanau
yuyudhāte samaṃ tasya balinau balisainikaiḥ
- 5
ततो रामश्च कृष्णश्च चक्राते मतिमुत्तमाम्
आयुधानां पुराणानामादाने मुनिसत्तम
tato rāmaśca kṛṣṇaśca cakrāte matimuttamām
āyudhānāṃ purāṇānāmādāne munisattama
- 6
अनन्तरं हरेः शार्ङ्गं तूणौ चाक्षयसायकौ
आकाशादागतौ विप्र तथा कौमोदकी गदा
anantaraṃ hareḥ śārṅgaṃ tūṇau cākṣayasāyakau
ākāśādāgatau vipra tathā kaumodakī gadā
- 7
हलं च बलभद्रस्य गगनादागतं ज्वलत्
मनसाभिमतं विप्र सौनन्दं मुसलं तथा
halaṃ ca balabhadrasya gaganādāgataṃ jvalat
manasābhimataṃ vipra saunandaṃ musalaṃ tathā
- 8
ततो युद्धे पराजित्य ससैन्यं मगधाधिपम्
पुरीं विविशतुर्वीरावुभौ रामजनार्दनौ
tato yuddhe parājitya sasainyaṃ magadhādhipam
purīṃ viviśaturvīrāvubhau rāmajanārdanau
- 9
जिते तस्मिन्सुदुर्वृत्ते जरासंधे महामुने
जीवमाने गते कृष्णस्तं नामन्यत निर्जितम्
jite tasminsudurvṛtte jarāsaṃdhe mahāmune
jīvamāne gate kṛṣṇastaṃ nāmanyata nirjitam
- 10
पुनरप्याजगामाथ जरासंधो बलान्वितः
जितश्च रामकृष्णाभ्यामपक्रान्तो द्विजोत्तम
punarapyājagāmātha jarāsaṃdho balānvitaḥ
jitaśca rāmakṛṣṇābhyāmapakrānto dvijottama
- 11
दश चाष्टौ च संग्रामानेवमत्यन्तदुर्मदः
यदुभिर्मागधो राजा चक्रे कृष्णपुरोगमैः
daśa cāṣṭau ca saṃgrāmānevamatyantadurmadaḥ
yadubhirmāgadho rājā cakre kṛṣṇapurogamaiḥ
- 12
सर्वेष्वेतेषु युद्धेषु यादवैः स पराजितः
अपक्रान्तो जरासंधः स्वल्पसैन्यैर्बलाधिकः
sarveṣveteṣu yuddheṣu yādavaiḥ sa parājitaḥ
apakrānto jarāsaṃdhaḥ svalpasainyairbalādhikaḥ
- 13
तद्बलं यादवानां तैरजितं यदनेकशः
तत्तु संनिधिमाहात्म्यं विष्णोरंशस्य चक्रिणः
tadbalaṃ yādavānāṃ tairajitaṃ yadanekaśaḥ
tattu saṃnidhimāhātmyaṃ viṣṇoraṃśasya cakriṇaḥ
- 14
मनुष्यधर्मशीलस्य लीला सा जगतः पतेः
अस्त्राण्यनेकरूपाणि यदरातिषु मुञ्चति
manuṣyadharmaśīlasya līlā sā jagataḥ pateḥ
astrāṇyanekarūpāṇi yadarātiṣu muñcati
- 15
मनसैव जगत्सृष्टिं संहारं च करोति यः
तस्यारिपक्षक्षपणे कियानुद्यमविस्तरः
manasaiva jagatsṛṣṭiṃ saṃhāraṃ ca karoti yaḥ
tasyāripakṣakṣapaṇe kiyānudyamavistaraḥ
- 16
तथापि ये मनुष्याणां धर्मास्तदनुवर्तनम्
कुर्वन्बलवता संधिं हीनैर्युद्धं करोत्यसौ
tathāpi ye manuṣyāṇāṃ dharmāstadanuvartanam
kurvanbalavatā saṃdhiṃ hīnairyuddhaṃ karotyasau
- 17
साम चोपप्रदानं च तथा भेदं प्रदर्शयन्
करोति दण्डपातं च क्वचिदेव पलायनम्
sāma copapradānaṃ ca tathā bhedaṃ pradarśayan
karoti daṇḍapātaṃ ca kvacideva palāyanam
- 18
मनुष्यदेहिनां चेष्टामित्येवमनुवर्ततः
लीला जगत्पतेस्तस्य छन्दतः सम्प्रवर्तते
manuṣyadehināṃ ceṣṭāmityevamanuvartataḥ
līlā jagatpatestasya chandataḥ sampravartate

