24 shlokas
- 1
पराशर उवाच
ककुद्मिनि हते ऽरिष्टे धेनुके विनिपातिते
प्रलम्बे निधनं नीते धृते गोवर्धनाचले
parāśara uvāca
kakudmini hate 'riṣṭe dhenuke vinipātite
pralambe nidhanaṃ nīte dhṛte govardhanācale
- 2
दमिते कालिये नागे भग्ने तुङ्गद्रुमद्वये
हतायां पूतनायां च शकटे परिवर्तिते
damite kāliye nāge bhagne tuṅgadrumadvaye
hatāyāṃ pūtanāyāṃ ca śakaṭe parivartite
- 3
कंसाय नारदः प्राह यथावृत्तमनुक्रमात्
यशोदादेवकीगर्भपरिवर्ताद्यशेषतः
kaṃsāya nāradaḥ prāha yathāvṛttamanukramāt
yaśodādevakīgarbhaparivartādyaśeṣataḥ
- 4
श्रुत्वा तत्सकलं कंसो नारदाद्देवदर्शनात्
वसुदेवं प्रति तदा कोपं चक्रे सुदुर्मतिः
śrutvā tatsakalaṃ kaṃso nāradāddevadarśanāt
vasudevaṃ prati tadā kopaṃ cakre sudurmatiḥ
- 5
सो ऽतिकोपादुपालभ्य सर्वयादवसंसदि
जगर्ह यादवांश्चैव कार्यं चैतदचिन्तयत्
so 'tikopādupālabhya sarvayādavasaṃsadi
jagarha yādavāṃścaiva kāryaṃ caitadacintayat
- 6
यावन्न बलमारूढौ रामकृष्णौ सुबालकौ
तावदेव मया वध्यावसाध्यौ रूढयौवनौ
yāvanna balamārūḍhau rāmakṛṣṇau subālakau
tāvadeva mayā vadhyāvasādhyau rūḍhayauvanau
- 7
चाणूरो ऽत्र महावीर्यो मुष्टिकश्च महाबलः
एताभ्यां मल्लयुद्धेन घातयिष्यामि दुर्मदौ
cāṇūro 'tra mahāvīryo muṣṭikaśca mahābalaḥ
etābhyāṃ mallayuddhena ghātayiṣyāmi durmadau
- 8
धनुर्महमहायागव्याजेनानीय तौ व्रजात्
तथा तथा यतिष्यामि यास्येते संक्षयं यथा
dhanurmahamahāyāgavyājenānīya tau vrajāt
tathā tathā yatiṣyāmi yāsyete saṃkṣayaṃ yathā
- 9
श्वफल्कतनयं सो ऽहमक्रूरं यदुपुंगवम्
तयोरानयनार्थाय प्रेषयिष्यामि गोकुलम्
śvaphalkatanayaṃ so 'hamakrūraṃ yadupuṃgavam
tayorānayanārthāya preṣayiṣyāmi gokulam
- 10
वृन्दावनचरं घोरमादेक्ष्यामि च केशिनम्
तत्रैवासावतिबलस्तावुभौ घातयिष्यति
vṛndāvanacaraṃ ghoramādekṣyāmi ca keśinam
tatraivāsāvatibalastāvubhau ghātayiṣyati
- 11
गजः कुवलयापीडो मत्समीपमुपागतौ
घातयिष्यति वा गोपौ वसुदेवसुतावुभौ
gajaḥ kuvalayāpīḍo matsamīpamupāgatau
ghātayiṣyati vā gopau vasudevasutāvubhau
- 12
पराशर उवाच
इत्यालोच्य स दुष्टात्मा कंसो रामजनार्दनौ
हन्तुं कृतमतिर्वीरमक्रूरं वाक्यमब्रवीत्
parāśara uvāca
ityālocya sa duṣṭātmā kaṃso rāmajanārdanau
hantuṃ kṛtamatirvīramakrūraṃ vākyamabravīt
- 13
कंस उवाच
भो भो दानपते वाक्यं क्रियतां प्रीतये मम
इतः स्यन्दनमारुह्य गम्यतां नन्दगोकुलम्
kaṃsa uvāca
bho bho dānapate vākyaṃ kriyatāṃ prītaye mama
itaḥ syandanamāruhya gamyatāṃ nandagokulam
- 14
वसुदेवसुतौ तत्र विष्णोरंशसमुद्भवौ
नाशाय किल सम्भूतौ मम दुष्टौ प्रवर्धतः
vasudevasutau tatra viṣṇoraṃśasamudbhavau
nāśāya kila sambhūtau mama duṣṭau pravardhataḥ
- 15
धनुर्महो ममाप्यत्र चतुर्दश्यां भविष्यति
आनेयौ भवता गत्वा मल्लयुद्धाय तावुभौ
dhanurmaho mamāpyatra caturdaśyāṃ bhaviṣyati
āneyau bhavatā gatvā mallayuddhāya tāvubhau
- 16
चाणूरमुष्टिकौ मल्लौ नियुद्धकुशलौ मम
ताभ्यां सहानयोर्युद्धं सर्वलोको ऽत्र पश्यतु
cāṇūramuṣṭikau mallau niyuddhakuśalau mama
tābhyāṃ sahānayoryuddhaṃ sarvaloko 'tra paśyatu
- 17
नागः कुवलयापीडो महामात्रप्रचोदितः
स वा हनिष्यते पापौ वसुदेवात्मजौ शिशू
nāgaḥ kuvalayāpīḍo mahāmātrapracoditaḥ
sa vā haniṣyate pāpau vasudevātmajau śiśū
- 18
तौ हत्वा वसुदेवं च नन्दगोपं च दुर्मतिम्
हनिष्ये पितरं चेममुग्रसेनं च दुर्मतिम्
tau hatvā vasudevaṃ ca nandagopaṃ ca durmatim
haniṣye pitaraṃ cemamugrasenaṃ ca durmatim
- 19
ततः समस्तगोपानां गोधनान्यखिलान्यहम्
वित्तं चापहरिष्यामि दुष्टानां मद्वधैषिणाम्
tataḥ samastagopānāṃ godhanānyakhilānyaham
vittaṃ cāpahariṣyāmi duṣṭānāṃ madvadhaiṣiṇām
- 20
त्वाम् ऋते यादवाश्चैते दुष्टा दानपते मयि
एतेषां च वधायाहं यतिष्ये ऽनुक्रमात्ततः
tvām ṛte yādavāścaite duṣṭā dānapate mayi
eteṣāṃ ca vadhāyāhaṃ yatiṣye 'nukramāttataḥ
- 21
ततो निष्कण्टकं सर्वं राज्यमेतद् अयादवम्
प्रशासिष्ये त्वया तस्मान्मत्प्रीत्या वीर गम्यताम्
tato niṣkaṇṭakaṃ sarvaṃ rājyametad ayādavam
praśāsiṣye tvayā tasmānmatprītyā vīra gamyatām
- 22
यथा च माहिषं सर्पिर्दधि चाप्युपहार्य वै
गोपाः समानयन्त्याशु त्वया वाच्यास्तथा तथा
yathā ca māhiṣaṃ sarpirdadhi cāpyupahārya vai
gopāḥ samānayantyāśu tvayā vācyāstathā tathā
- 23
पराशर उवाच
इत्याज्ञप्तस्तदाक्रूरो महाभागवतो द्विज
प्रीतिमानभवत्कृष्णं श्वो द्रक्ष्यामीति सत्वरः
parāśara uvāca
ityājñaptastadākrūro mahābhāgavato dvija
prītimānabhavatkṛṣṇaṃ śvo drakṣyāmīti satvaraḥ
- 24
तथेत्युक्त्वा च राजानं रथम् आरुह्य शोभनम्
निश्चक्राम तदा पुर्या मथुराया मधुप्रियः
tathetyuktvā ca rājānaṃ ratham āruhya śobhanam
niścakrāma tadā puryā mathurāyā madhupriyaḥ

