24 shlokas
- 1
पराशर उवाच
प्रद्युम्नाद्या हरेः पुत्रा रुक्मिण्याः कथितास्तव
भानुं भैमरिकं चैव सत्यभामा व्यजायत
parāśara uvāca
pradyumnādyā hareḥ putrā rukmiṇyāḥ kathitāstava
bhānuṃ bhaimarikaṃ caiva satyabhāmā vyajāyata
- 2
दीप्तिमन्तः प्रयक्षाद्या रोहिण्यास्तनया हरेः
बभूवुर्जाम्बवत्यां च साम्बाद्या बाहुशालिनः
dīptimantaḥ prayakṣādyā rohiṇyāstanayā hareḥ
babhūvurjāmbavatyāṃ ca sāmbādyā bāhuśālinaḥ
- 3
तनया भद्रविन्दाद्या नाग्नजित्यां महाबलाः
संग्रामजित्प्रधानास्तु शैब्यायाश्चाभवन्सुताः
tanayā bhadravindādyā nāgnajityāṃ mahābalāḥ
saṃgrāmajitpradhānāstu śaibyāyāścābhavansutāḥ
- 4
वृकाद्याश्च सुता माद्र्यां गात्रवत्प्रमुखान्सुतान्
अवाप लक्ष्मणा पुत्राः कालिन्द्याश्च श्रुतादयः
vṛkādyāśca sutā mādryāṃ gātravatpramukhānsutān
avāpa lakṣmaṇā putrāḥ kālindyāśca śrutādayaḥ
- 5
अन्यासां चैव भार्याणां समुत्पन्नानि चक्रिणः
अष्टायुतानि पुत्राणां सहस्राणां शतं तथा
anyāsāṃ caiva bhāryāṇāṃ samutpannāni cakriṇaḥ
aṣṭāyutāni putrāṇāṃ sahasrāṇāṃ śataṃ tathā
- 6
प्रद्युम्नः प्रथमस्तेषां सर्वेषां रुक्मिणीसुतः
प्रद्युम्नादनिरुद्धो ऽभूद्वज्रस्तस्मादजायत
pradyumnaḥ prathamasteṣāṃ sarveṣāṃ rukmiṇīsutaḥ
pradyumnādaniruddho 'bhūdvajrastasmādajāyata
- 7
अनिरुद्धो रणे रुद्धो बलेः पौत्रीं महाबलः
बाणस्य तनयाम् ऊषामुपयेमे द्विजोत्तम
aniruddho raṇe ruddho baleḥ pautrīṃ mahābalaḥ
bāṇasya tanayām ūṣāmupayeme dvijottama
- 8
यत्र युद्धम् अभूद्घोरं हरिशंकरयोर्महत्
छिन्नं सहस्रं बाहूनां यत्र बाणस्य चक्रिणा
yatra yuddham abhūdghoraṃ hariśaṃkarayormahat
chinnaṃ sahasraṃ bāhūnāṃ yatra bāṇasya cakriṇā
- 9
मैत्रेय उवाच
कथं युद्धमभूद्ब्रह्मन् उषार्थे हरकृष्णयोः
कथं क्षयं च बाणस्य बाहूनां कृतवान्हरिः
maitreya uvāca
kathaṃ yuddhamabhūdbrahman uṣārthe harakṛṣṇayoḥ
kathaṃ kṣayaṃ ca bāṇasya bāhūnāṃ kṛtavānhariḥ
- 10
एतत्सर्वं महाभाग ममाख्यातुं त्वमर्हसि
महत्कौतूहलं जातं कथां श्रोतुमिमां हरेः
etatsarvaṃ mahābhāga mamākhyātuṃ tvamarhasi
mahatkautūhalaṃ jātaṃ kathāṃ śrotumimāṃ hareḥ
- 11
पराशर उवाच
उषा बाणसुता विप्र पार्वतीं सह शम्भुना
क्रीडन्तीमुपलक्ष्योच्चैः स्पृहां चक्रे तदाश्रयाम्
parāśara uvāca
uṣā bāṇasutā vipra pārvatīṃ saha śambhunā
krīḍantīmupalakṣyoccaiḥ spṛhāṃ cakre tadāśrayām
- 12
ततः सकलचित्तज्ञा गौरी तामाह भामिनीम्
अलमत्यर्थतापेन भर्त्रा त्वमपि रंस्यसे
tataḥ sakalacittajñā gaurī tāmāha bhāminīm
alamatyarthatāpena bhartrā tvamapi raṃsyase
- 13
इत्युक्ते सा तदा चक्रे कदेति मतिमात्मनः
को वा भर्ता ममेत्येनां पुनरप्याह पार्वती
ityukte sā tadā cakre kadeti matimātmanaḥ
ko vā bhartā mametyenāṃ punarapyāha pārvatī
- 14
वैशाखशुक्लद्वादश्यां स्वप्ने यो ऽभिभवं तव
करिष्यति स ते भर्ता राजपुत्रि भविष्यति
vaiśākhaśukladvādaśyāṃ svapne yo 'bhibhavaṃ tava
kariṣyati sa te bhartā rājaputri bhaviṣyati
- 15
पराशर उवाच
तस्यां तिथौ पुमान्स्वप्ने यथा देव्या उदीरितम्
तथैवाभिभवं चक्रे रागं चक्रे च तत्र सा
parāśara uvāca
tasyāṃ tithau pumānsvapne yathā devyā udīritam
tathaivābhibhavaṃ cakre rāgaṃ cakre ca tatra sā
- 16
ततः प्रबुद्धा पुरुषम् अपश्यन्ती समुत्सुका
क्व गतो ऽसीति निर्लज्जा मैत्रेयोक्तवती सखीम्
tataḥ prabuddhā puruṣam apaśyantī samutsukā
kva gato 'sīti nirlajjā maitreyoktavatī sakhīm
- 17
बाणस्य मन्त्री कुम्भाण्डः चित्रलेखा च तत्सुता
तस्याः सख्यभवत्सा च प्राह को ऽयं त्वयोच्यते
bāṇasya mantrī kumbhāṇḍaḥ citralekhā ca tatsutā
tasyāḥ sakhyabhavatsā ca prāha ko 'yaṃ tvayocyate
- 18
यदा लज्जाकुला नास्यै कथयामास सा सखी
तदा विश्वासमानीय सर्वमेवाभ्यवादयत्
yadā lajjākulā nāsyai kathayāmāsa sā sakhī
tadā viśvāsamānīya sarvamevābhyavādayat
- 19
विदितार्थां तु तामाह पुनरूषा यथोदितम्
देव्या तथैव तत्प्राप्तौ यो ऽभ्युपायः कुरुष्व तम्
viditārthāṃ tu tāmāha punarūṣā yathoditam
devyā tathaiva tatprāptau yo 'bhyupāyaḥ kuruṣva tam
- 20
पराशर उवाच
ततः पटे सुरान्दैत्यान्गन्धर्वांश्च प्रधानतः
मनुष्यांश्चाभिलिख्यास्यै चित्रलेखा व्यदर्शयत्
parāśara uvāca
tataḥ paṭe surāndaityāngandharvāṃśca pradhānataḥ
manuṣyāṃścābhilikhyāsyai citralekhā vyadarśayat
- 21
अपास्य सा तु गन्धर्वांस्तथोरगसुरासुरान्
मनुष्येषु ददौ दृष्टिं तेष्वप्यन्धकवृष्णिषु
apāsya sā tu gandharvāṃstathoragasurāsurān
manuṣyeṣu dadau dṛṣṭiṃ teṣvapyandhakavṛṣṇiṣu
- 22
कृष्णरामौ विलोक्यासीत्सुभ्रूर्लज्जाजडेव सा
प्रद्युम्नदर्शने व्रीडादृष्टिं निन्ये ऽन्यतो द्विज
kṛṣṇarāmau vilokyāsītsubhrūrlajjājaḍeva sā
pradyumnadarśane vrīḍādṛṣṭiṃ ninye 'nyato dvija
- 23
दृष्टमात्रे ततः कान्ते प्रद्युम्नतनये द्विज
दृष्ट्वात्यर्थविलासिन्या लज्जा क्वापि निराकृता
dṛṣṭamātre tataḥ kānte pradyumnatanaye dvija
dṛṣṭvātyarthavilāsinyā lajjā kvāpi nirākṛtā
- 24
सो ऽयं सो ऽयमितीत्युक्ते तया सा योगगामिनी
व्झयं कृष्णस्य पौत्रस्ते भर्ता देव्या प्रसादितः
ययौ द्वारवतीम् ऊषां समाश्वास्य ततः सखीम्
so 'yaṃ so 'yamitītyukte tayā sā yogagāminī
vjhayaṃ kṛṣṇasya pautraste bhartā devyā prasāditaḥ
yayau dvāravatīm ūṣāṃ samāśvāsya tataḥ sakhīm

