61 shlokas
- 1
पराशर उवाच
गते शक्रे तु गोपालाः कृष्णमक्लिष्टकारिणम्
ऊचुः प्रीत्या धृतं दृष्ट्वा तेन गोवर्धनाचलम्
parāśara uvāca
gate śakre tu gopālāḥ kṛṣṇamakliṣṭakāriṇam
ūcuḥ prītyā dhṛtaṃ dṛṣṭvā tena govardhanācalam
- 2
वयमस्मान्महाभाग भवता महतो भयात्
गावश्च भवता त्राता गिरिधारणकर्मणा
vayamasmānmahābhāga bhavatā mahato bhayāt
gāvaśca bhavatā trātā giridhāraṇakarmaṇā
- 3
बालक्रीडेयमतुला गोपालत्वं जुगुप्सितम्
दिव्यं च कर्म भवतः किमेतत्तात कथ्यताम्
bālakrīḍeyamatulā gopālatvaṃ jugupsitam
divyaṃ ca karma bhavataḥ kimetattāta kathyatām
- 4
कालियो दमितस्तोये प्रलम्बो विनिपातितः
धृतो गोवर्धनश्चायं शङ्कितानि मनांसि नः
kāliyo damitastoye pralambo vinipātitaḥ
dhṛto govardhanaścāyaṃ śaṅkitāni manāṃsi naḥ
- 5
सत्यं सत्यं हरेः पादौ शपामो ऽमितविक्रम
यथा त्वद्वीर्यमालोक्य न त्वां मन्यामहे नरम्
satyaṃ satyaṃ hareḥ pādau śapāmo 'mitavikrama
yathā tvadvīryamālokya na tvāṃ manyāmahe naram
- 6
प्रीतिः सस्त्रीकुमारस्य व्रजस्य तव केशव
कर्म चेदमशक्यं यत्समस्तैस्त्रिदशैरपि
prītiḥ sastrīkumārasya vrajasya tava keśava
karma cedamaśakyaṃ yatsamastaistridaśairapi
- 7
बालत्वं चातिवीर्यं च जन्म चास्मासु शोभनम्
चिन्त्यमानममेयात्मञ्शङ्कां कृष्ण प्रयच्छति
bālatvaṃ cātivīryaṃ ca janma cāsmāsu śobhanam
cintyamānamameyātmañśaṅkāṃ kṛṣṇa prayacchati
- 8
देवो वा दानवो वा त्वं यक्षो गन्धर्व एव वा
किं वास्माकं विचारेण बान्धवो ऽसि नमो ऽस्तु ते
devo vā dānavo vā tvaṃ yakṣo gandharva eva vā
kiṃ vāsmākaṃ vicāreṇa bāndhavo 'si namo 'stu te
- 9
पराशर उवाच
क्षणं भूत्वा त्वसौ तूष्णीं किंचित्प्रणयकोपवान्
इत्येवमुक्तस्तैर्गोपैः कृष्णो ऽप्याह महामुने
parāśara uvāca
kṣaṇaṃ bhūtvā tvasau tūṣṇīṃ kiṃcitpraṇayakopavān
ityevamuktastairgopaiḥ kṛṣṇo 'pyāha mahāmune
- 10
भगवानुवाच
मत्संबन्धेन वो गोपा यदि लज्जा न जायते
श्लाघ्यो वाहं ततः किं वो विचारेण प्रयोजनम्
bhagavānuvāca
matsaṃbandhena vo gopā yadi lajjā na jāyate
ślāghyo vāhaṃ tataḥ kiṃ vo vicāreṇa prayojanam
- 11
यदि वो ऽस्ति मयि प्रीतिः श्लाघ्यो ऽहं भवतां यदि
तदात्मबन्धुसदृशी बुद्धिर्वः क्रियतां मयि
yadi vo 'sti mayi prītiḥ ślāghyo 'haṃ bhavatāṃ yadi
tadātmabandhusadṛśī buddhirvaḥ kriyatāṃ mayi
- 12
नाहं देवो न गन्धर्वो न यक्षो न च दानवः
अहं वो बान्धवो जातो नैतच्चिन्त्यमतो ऽन्यथा
nāhaṃ devo na gandharvo na yakṣo na ca dānavaḥ
ahaṃ vo bāndhavo jāto naitaccintyamato 'nyathā
- 13
पराशर उवाच
इति श्रुत्वा हरेर्वाक्यं बद्धमौनास्ततो वनम्
ययुर्गोपा महाभाग तस्मिन्प्रणयकोपिनि
parāśara uvāca
iti śrutvā harervākyaṃ baddhamaunāstato vanam
yayurgopā mahābhāga tasminpraṇayakopini
- 14
कृष्णस्तु विमलं व्योम शरच्चन्द्रस्य चन्द्रिकाम्
तथा कुमुदिनीं फुल्लामामोदितदिगन्तराम्
kṛṣṇastu vimalaṃ vyoma śaraccandrasya candrikām
tathā kumudinīṃ phullāmāmoditadigantarām
- 15
वनराजीं तथा कूजद्भृङ्गमालामनोरमाम्
विलोक्य सह गोपीभिर्मनश्चक्रे रतिं प्रति
vanarājīṃ tathā kūjadbhṛṅgamālāmanoramām
vilokya saha gopībhirmanaścakre ratiṃ prati
- 16
विना रामेण मधुरमतीव वनिताप्रियम्
जगौ कलपदं शौरिर्नानातन्त्रीकृतव्रतम्
vinā rāmeṇa madhuramatīva vanitāpriyam
jagau kalapadaṃ śaurirnānātantrīkṛtavratam
- 17
रम्यं गीतध्वनिं श्रुत्वा संत्यज्यावसथांस्तदा
आजग्मुस्त्वरिता गोप्यो यत्रास्ते मधुसूदनः
ramyaṃ gītadhvaniṃ śrutvā saṃtyajyāvasathāṃstadā
ājagmustvaritā gopyo yatrāste madhusūdanaḥ
- 18
शनैः शनैर्जगौ गोपी काचित्तस्य लयानुगम्
दत्तावधाना काचिच्च तमेव मनसास्मरत्
śanaiḥ śanairjagau gopī kācittasya layānugam
dattāvadhānā kācicca tameva manasāsmarat
- 19
काचित्कृष्णेति कृष्णेति प्रोक्त्वा लज्जामुपाययौ
ययौ च काचित्प्रेमान्धातत्पार्श्वम् अविलज्जिता
kācitkṛṣṇeti kṛṣṇeti proktvā lajjāmupāyayau
yayau ca kācitpremāndhātatpārśvam avilajjitā
- 20
काचिदावसथस्यान्तः स्थित्वा दृष्ट्वा बहिर्गुरुम्
तन्मयत्वेन गोविन्दं दध्यौ मीलितलोचना
kācidāvasathasyāntaḥ sthitvā dṛṣṭvā bahirgurum
tanmayatvena govindaṃ dadhyau mīlitalocanā
- 21
तच्चिन्ताविपुलाह्लादक्षीणपुण्यचया तथा
तदप्राप्तिमहादुःखविलीनाशेषपातका
taccintāvipulāhlādakṣīṇapuṇyacayā tathā
tadaprāptimahāduḥkhavilīnāśeṣapātakā
- 22
चिन्तयन्ती जगत्सूतिं परब्रह्मस्वरूपिणम्
निरुच्छ्वासतया मुक्तिं गतान्या गोपकन्यका
cintayantī jagatsūtiṃ parabrahmasvarūpiṇam
nirucchvāsatayā muktiṃ gatānyā gopakanyakā
- 23
गोपीपरिवृतो रात्रिं शरच्चन्द्रमनोरमाम्
मानयामास गोविन्दो रासारम्भरसोत्सुकः
gopīparivṛto rātriṃ śaraccandramanoramām
mānayāmāsa govindo rāsārambharasotsukaḥ
- 24
गोप्यश्च वृन्दशः कृष्णचेष्टास्वायत्तमूर्तयः
अन्यदेशं गते कृष्णे चेरुर्वृन्दावनान्तरम्
gopyaśca vṛndaśaḥ kṛṣṇaceṣṭāsvāyattamūrtayaḥ
anyadeśaṃ gate kṛṣṇe cerurvṛndāvanāntaram
- 25
कृष्णो ऽहमेतल्ललितं व्रजाम्यालोक्यतां गतिः
अन्या ब्रवीति कृष्णस्य मम गीतिर्निशम्यताम्
kṛṣṇo 'hametallalitaṃ vrajāmyālokyatāṃ gatiḥ
anyā bravīti kṛṣṇasya mama gītirniśamyatām
- 26
दुष्ट कालिय तिष्ठात्र कृष्णो ऽहमिति चापरा
बाहुमास्फोट्य कृष्णस्य लीलासर्वस्वमाददे
duṣṭa kāliya tiṣṭhātra kṛṣṇo 'hamiti cāparā
bāhumāsphoṭya kṛṣṇasya līlāsarvasvamādade
- 27
अन्या ब्रवीति भो गोपा निःशङ्कैः स्थीयतामिह
अलं वृष्टिभयेनात्र धृतो गोवर्धनो मया
anyā bravīti bho gopā niḥśaṅkaiḥ sthīyatāmiha
alaṃ vṛṣṭibhayenātra dhṛto govardhano mayā
- 28
धेनुको ऽयं मया क्षिप्तो विचरन्तु यथेच्छया
गोपी ब्रवीति चैवान्या कृष्णलीलानुकारिणी
dhenuko 'yaṃ mayā kṣipto vicarantu yathecchayā
gopī bravīti caivānyā kṛṣṇalīlānukāriṇī
- 29
एवं नानाप्रकारासु कृष्णचेष्टासु तास्तदा
गोप्यो व्यग्राः समं चेरू रम्यं वृन्दावनं वनम्
evaṃ nānāprakārāsu kṛṣṇaceṣṭāsu tāstadā
gopyo vyagrāḥ samaṃ cerū ramyaṃ vṛndāvanaṃ vanam
- 30
विलोक्यैका भुवं प्राह गोपी गोपवराङ्गना
पुलकाञ्चितसर्वाङ्गी विकासिनयनोत्पला
vilokyaikā bhuvaṃ prāha gopī gopavarāṅganā
pulakāñcitasarvāṅgī vikāsinayanotpalā

